I TIMOTE 1 - JAA TƏMARWAŊ

Mirkiŋ

¹ Jeere kefter toŋ kəya haa ten Pol, ten bə minti Kristu Yeesu *gaanan bə waate kela də səmuŋ. Pepeŋ, Hulum bə seere áŋ daana Kristu Yeesu bə minti ɗiki də áŋ bə malə-mele cuuruŋ, əsnən a joŋreŋa haa té.

² Ten gam kefter toŋ kaynaŋ a nəənəm tam Timote, tam kormon bə gəəzə-gəəzi gud de nəmtiŋa gud Kristu Yeesuŋ. Pisiŋ, ji bə giidu pəsaŋ, də kəkaɓiŋ kə Pep Abaŋ daana kə Kristu Yeesu Barkaŋ náŋ jəə la cəərəŋa.

Hate bə bay bəlam duŋ

³ Bədoona ana, bə minti ten ɗəlaŋ koore warda bə ɗe Masedəwan, ten waatənam minti tam əsə la Efesi. Kaa kəman yaŋ ada bə duusi hate bə bay bəlam du. Gud teŋa ta, ten bele minti tam əsə la ada bə waate kaa teŋa minti yə yaakə hatə toŋ la.

⁴ Wəətəy la minti yə a geye kusri bə ke ajujuna daana bə tope bəlam də kəmoomo di gə daydaya boobo ba. Kel teŋ kəya yə ke awəy də bay guudə adəwaldə kaŋa boo daana yə keye kaa bə de gud karman bə minti giidə Pepeŋ bəluŋ ba. Karman bə minti Pepeŋ bəlu ha'aŋ, hulum əsu haa bə minti wə doŋ ne guuduŋ.

⁵ Kel gə minti tam wəətəy la bədoona ciiriŋ, haa minti yə kolə la bə bele kumsi. Bele toŋ faa da haa ku talma *cetcetaŋ da, bay ɗiki bə baymele ada, daana də de neeteŋ bə gəəzə-gəəziŋ ada gəm.

⁶ Sərdə kaa kəman lenteŋ, yə yaakaŋ kəkəy tó pisiŋ wəra. Máŋ kəyaŋ, yə waate haa kel gə bay bəlam di gə dawə-deweŋ.

⁷ Kaa teŋ bele minti té jəə la kaa kə hate kaŋ də ku gili kə Pepeŋ. Yə waate sam hate neeteŋ nuutu də səɓaki səma, də teŋ keɗe, kel gə minti té də kusri bə wəətiyaŋ daana gə hətəyaŋ, guudiŋ paapa də diri bə pa.

⁸ Jəəne minti hulum yaŋ bə ji joŋreŋa damdi ku giliŋ kə Pepeŋ bəlaŋ bədoona anaŋ, áŋ wəra gə asə-ase minti ku gili toŋ, haa karman pisi.

⁹ Bədoona ana ta, áŋ asə la wəra minti, Pepeŋ jəmaŋ ku giliŋ ha'aŋ, paapa cəərə kaa kə ji kel ɗekeriŋa ba. Wə jəmnu haa cəərə kaa gə minti paapa bə ɗe də ku baŋ, də gə minti ɓalke ku giliŋ; kaa gə minti paapa bə humi kosoŋa cəərə ku giliŋa baŋ, də kaa kə bayməlaŋ; kaa gə ji kel gə minti de dər Pepeŋ baŋ, də kaa gə minti awte hin cəərə de bə gud Pepeŋaŋ. Ku giliŋ haa cəərə kaa gə minti awte kəmni wəra, daana kaa kə awe titiŋ keɗe faɗi.

¹⁰ Kumsə kaa kə ji piwpiw, kaa gə minti tope kumsi kaŋkar kəram, kaa kə gusti kaa kəsarkaŋ wəra kafkam, kaa gə ŋete kel, kaa gə minti suurti cəərə kel gə gul-gulaŋaŋ, daana kel gaalaŋ gə bayməlaŋ gə minti ɓalke hate pisiŋ wəraŋ, Pepeŋ ayaŋ ku giliŋ haa cəərə kumsə kaa teŋa.

¹¹ Hate tó pisiŋ ha'aŋ, wə damdi *Kel pəsaŋ kəmarwaŋ gə daŋə-deŋe kumsi gə minti Pepeŋ aynan dən minti ten wəətəy la wəra a kaŋ ana. Kel teŋ ha'aŋ bəŋ kasi Pepeŋ da dər boblo nuutuŋ da.

Pol ji suuse a Pepeŋ gud pisi bə minti wə juunu suruŋ

¹² Ten ji suuse a Kristu Yeesu Barkaŋ náŋ bə minti aynan səɓakiŋ bə ji joŋre ninaŋ. Ten jəw suuse gud bə minti ten goloŋ duru hulum ɓeti a kəkəy bə minti wə ŋamnan minti ten jəə la hulum bə joŋre kə tó.

¹³ A dayday ha'aŋ, ten a bə wəətu səmu baymele, ten a bə ləsu daana ten a bə sərtutu gəm. Ana doloy də teŋ keɗeŋ, Yeesu jəŋ giidu pəsaŋ sarəna, gud bə minti kel gə minti ten a bə jiya dayday, guudiŋ a paapa də dərən ba, gud maa mo ten a paapa bə doo-de guudu bə gəm.

¹⁴ Bədoona ana, Barkaŋ náŋ jəŋ pisiŋ sarəna pisi jəə, wə aynan deŋ daana beleŋ gud tepe náŋa də Kristu Yeesu.

¹⁵ Kel gə minti ten wəətəy haa kəna yə kel kə gəəzə-gəəzi. Yə pəsaŋ kir minti kaŋ keɗe jiɓriy la daana yə doo la guudi də ku tərməyi keɗe'i. Kel teŋ haa minti bəŋa: Kristu Yeesu bəŋ cəərə seŋkaŋa kəna ha'aŋ, bə bi a seere kaa kə bayməlaŋ wəra. Adəwaldə kaa teŋa ha'aŋ, ten haa hulum bə minti baymele nin dəŋaŋ cəərə neeteŋ keɗeŋ.

¹⁶ Səma də teŋ keɗe, Kristu Yeesu jəŋ giidu pəsaŋ sarəna. Ten bə minti baymele nin dəŋaŋ kə kaa kaayaŋ keɗeŋ, wə jəŋ teŋ sarəna haa bə ge dər kaŋ minti tó haa hulum bə minti mi ku kelaŋ. Wə jəŋ bədoona haa bə teŋe dər kaa gə minti bə de yaŋ dəmaŋ guuduŋ minti yə fele dədərgə də bay tewe yaŋ.

¹⁷ Tokɗeŋ daana aŋkeŋ jəə la bə faɗnə-faɗna kə Pep bə minti kumna nuutuŋ tewe baŋ, bə minti saksaki caw dədərgə wə me baŋ, bə minti Pepeŋ tó ɗaaməna faɗiŋ, daana hulum əsu də duru baŋ! Amen.

Pol teŋe dər Timote

¹⁸ Timote kormonti, kel gə minti ten waatam dəm day haa kənaŋ, ten waatam dəm haa damdi *kaa kə jogte ku mini kə Pepeŋ a waataŋ wəra diidəday cəərəmaŋ ana. Kel teŋ damdi kar kə duuri nəmti ana, doŋ kir minti tam duurə la diiri haa duuri pisiŋ.

¹⁹ Bədoona ana, ayə ku tarməyam la saksaki a de bə gud Pepeŋa, a yaake ɗiki bə baymeleŋ ku tarməyama ba. Sərdə kaa kəman yaŋ teŋ də baymeleŋ ku tərməyi, gud teŋa ta, de neeteŋ səŋɗəŋ wəra.

²⁰ Kumsə kaa teŋ kəyaŋ, anə Himene daana Aleksandərə adəwaldi. Kaa té ɓasiŋ kəya, ten əynəy wəra a *Sataŋ kir minti yə əskə la, minti yə a doge bə sarte sam Pepeŋa pəda.