I PIYER 5 - JAA TƏMARWAŊ

Kaa kə tapə-tepe kə Kristuŋ

¹ Ten waate hebkəna haa kaa kəmtəŋ gə tiinə kaa kə Tapi gə adəwaldəŋ. Ten də kusrən haa hulum bə tiinə kaa gəm, lasi də minti Kristu saanaŋ, ten asna də dərən daana məyan nuutu də minti Pepeŋ bə vaɗə yaŋ wəra a kaŋ, ten bə fele yaŋ ada gəm. Ten bə wəətiya wəra anə kaŋkaŋ haa kənaŋ minti

² yə golə cəərə kaa gə minti Pepeŋ əynəy di kəəsiŋ la pisi, damdi hulum bə minti gole cəərə kaamaŋ nuutuŋ pisi ana. Yə guluy la də ku tərməyi pəsaŋ, damdi Pepeŋ bele bədoona ana'i, paapa kas doole ba. Yə jəə joŋre toŋ la paapa bə fele werke guudu təwa ba, yə jəw la haa gud bə minti yə bele keye kaŋ gəəzə-gəəziŋ.

³ Yə a isi cəərə kaa gə minti Pepeŋ əynəy di kəəsiyaŋ bə kəkamna ana ba, ɗe neeteŋ jəə la pisi kir minti kaŋ goldə la bə ɗe bədoona ana gəm ɗaw.

⁴ Yə jəəne bə ji bədoonaŋ, werke bə bay tewe bə minti dəŋaŋ kumsuŋ wəra keɗeŋ, yə bə fəlu yaŋ dər hi bə minti Kumna bə kaa kə ameŋ veɗe kusru yaŋ wəraŋ.

⁵ Aŋ kəmar kaalay gəm ha'aŋ, aŋ əskə ku kaa kəmtəŋ gə tiinə kaa kə Tapiŋ la. Aŋ kaa kə doo-deŋ keɗe, a kəkəy bə joŋre bə adəwaldəŋa ha'aŋ, aŋ harə cəərə kusrəŋ la adawra tiinə kumsəŋa. Gud maa mo, wəra bə jeerə-jeere giidə kefter kə Pepeŋa minti: «Pepeŋ hẽŋe wəra tiinə kaa gə minti teke cəərə kusri apəyaŋ, səma wə ji pisiŋ sar kaa gə minti harte cəərə kusri adoro tiinuŋ».

⁶ Gud teŋa ta, aŋ harə cəərəŋ la adoro tiinə Pep bə minti səɓakiŋ keɗe kəəsuŋ, kir minti wə haŋ cəərəŋ la apəya haa tó də kusru də hi bə minti gole duru pisi bə ji bədoona anaŋ.

⁷ Ɗiki bə minti bə gəyaŋaŋ, aŋ əyu du la keɗe kəəsu gud bə minti wə jəŋ guudəŋ haa tó.

⁸ Aŋ jəə la wəra gə ɗampə-ɗampe saksaki, aŋ amə kusrəŋ la pisi. Nərtitiŋ, hulum bə acukur nəətiŋ, bə ɓəkti agəjaŋ dəŋa, bə golde huluma bə ɓəlku wəra damdi googoŋ hage bə golde karman bə liki ana.

⁹ Aŋ a yəəku ko sarəŋa ba anə hasi, aŋ əsə la ŋəŋ a deŋa. Jəə la wəra cəərəŋa minti, giidə seŋkaŋa keɗeŋ, kəsaanaŋ gə minti a kəkəy kə Pepeŋa bə se gəəliŋa bə aŋ ana gəm.

¹⁰ Aŋ hebkəna bə se gəəliŋa nuutu gəəzi, səma paapa bə hiti ablaw pəda. Pep bə minti bə ji pisiŋa sarəŋa saksakiŋ, bə minti mantənaŋ warda bə ɗe a vaŋ dər məyan nuutu də bay teweŋaŋ gud tepe nəətiŋa də Kristuŋ, wə də kusru, wə hare yaŋ bə ɗompoŋa adordə lasiŋa. Wə jeŋeŋ yaŋ wəra, wə ayaŋ səɓaki yaŋ, wə ji yaŋ kir minti aŋ a daɓye ba.

¹¹ Səɓakiŋ jəə la nuutu bə faɗnə-faɗnaŋ! *Amen.

Mirki bə tewe cəərə kefter

¹² Kormə kefter bə minti ten jeereneŋ dəŋ kaynaŋ, jeerenen dən haa Silasi. Wə dərəna seenən bə doo-de kaŋkaŋi gud Kristu. Ten jiirunu haa bə teŋeŋ dərəŋ daana bə waataŋ wəra kaŋkaŋ minti, pisi kə Pep bə minti aŋ gə əsə-isi duruŋ, haa pisi bə gəəzə-gəəziŋ!

¹³ Kaa kə Tapi gə giidə vil də Babilon, kaa té gə minti Pepeŋ ŋəmnəy damdi wə a ŋamnaŋ ana gəm, yaŋ bə mirkiŋ na. Markə, kormon a kel kə Pepeŋaŋ, yaŋ bə mirkiŋ na gəm.

¹⁴ Aŋ mirkə kumsəŋ gə doo-deŋ la wəra anə təfaɗ-təfaɗi aduubə də kumsəŋa. Kəkaɓiŋ jəə la cəərəŋa, aŋ kaa gə minti wəra gə tapə-tepe də Kristuŋ keɗe!