I PIYER 4 - JAA TƏMARWAŊ

Ɗe dəm bə dayday daana ɗe dəm kimirwiŋ

¹ Kristu saŋ gəəliŋ gud áŋa dər kusuki du tə bə moŋ, aŋ ɗampə ɗiki dəŋ la wəra bə se gəəliŋ akas tó ana gəm. Gud maa mo, hulum bə minti halaŋ gəəli bə dər kusuki duŋ neŋ, wə jəmaŋ wəra də baymele haa jeme faɗi.

² Də ko toŋ kəya faɗiŋ, dər ko bə minti aŋ bə ji yaŋ duru lam adawra kənaŋ, aŋ raawə la máŋ bə ji na haa karman bə minti giidə Pepeŋ bəluŋ, aŋ a ji karman bə giidəŋ beleŋ pəda.

³ Gud maa mo aŋ a fəlaŋ dərəŋ warda anə kaŋkaŋ dər ko bə raawə-raaweŋ da bə ji kar gə minti giidə kaa gə minti Pepeŋ paapa də diri baŋ. Aŋ a jəŋ kaa kə jəəti booboŋ, bə ɗe gud kel kə bayməlaŋ gə minti giidəŋ bələy, aŋ a bə markete saksaki, aŋ jəətəŋ kəɗwəy bə hame daana bə se həryəm-həryəm hãã bə minti aŋ kole harse wəra harseŋ, aŋ a bə tapte bə satete haa kumuy, aŋ a bə ke awalna a kar gə minti aŋ kulnuy Pep nəətiŋ, karman toŋ a wəra baymele hasi. Aŋ a raawe də ji bə kel teŋ ajew na pəda.

⁴ Bə hebkənaŋ, aŋ paapa gə tapə-tepe diiri a jəəti bə kel hayam-hayamiŋa pəda. Kəya kel dəŋ kole bə ŋiliya ablaw, yə kole kuy bə sartəŋa faɗi.

⁵ Səma yə bə ɗe yaŋ hõy a tope bəlam də joŋre neeteŋ tiinə Pep bə minti wəra maŋ bə jeme kəəti də kaa kə dədərgəŋa, də kaa kə mee-meŋ gəm.

⁶ Kaa kə mee-meŋ, bə minti yə a kəm zugi cəərə seŋkaŋaŋ, Pepeŋ jəmnəy kəəti di damdi wə jeme kəəti kə kaŋ keɗe'iŋ ana. Bə minti yə wəra gə mee-meŋ, Kristu wəətənəy *Kel pəsaŋ kəmarwaŋ warda gəm kir minti, də səɓaki kə Tiiru Cetcetaŋ, dədərgə di jəə la haa nayta də minti giidə Pepeŋ bəlaŋ.

Aŋ jəə la kaa kə ji joŋre pisi də aye kə Pepeŋ

⁷ Hi máŋ wəra maŋ bə minti kar keɗe tewe wəraŋ. Gud teŋa ta, aŋ amə kusrəŋ la pisi daana aŋ ɗampə ɗiki dəŋ la wəra, kir minti aŋ jəə la gə nakə-neke saksaki bə toose Pepeŋ.

⁸ Ajewa faɗi ha'aŋ, aŋ balə kumsəŋ la saksaki adəwaldə kumsəŋa wəra də ku tarməyaŋ soki məna'i. Gud maa mo, bele bə kaŋ jəəne ku tarməyaŋaŋ, aŋ neke bə vəəgi giidəŋ wəra cəərə baymele kə kaŋa gəm.

⁹ Aŋ topə irku də kumsəŋ la gerdeŋa pisi, bay ŋorme ku.

¹⁰ Pepeŋ bə ayə-aye hel hal-hal a mindi mindi mo bə ji karman tə bə moŋ, mindi mindi mo kayə kaa la dəərə. Aŋ jəəne bə ji bədoona anaŋ, aŋ kole kaa gə minti bə ji joŋre pisi də gidiirə hel tá də minti Pepeŋ ayaŋ.

¹¹ Hulum a fəlaŋ ne haa hel də waate bə kel, wə waatə la wəra haa kel gə minti bəŋ kasi Pepeŋ daŋ. Hulum baalaŋ a fəlaŋ ne haa ji bə digiŋ a kaŋ, wə jəərə la haa də səɓaki də minti Pepeŋ əynu duŋ. A ji bə kar teŋa keɗe'iŋ, aŋ jəy la kir minti kaŋ tokɗə Pepeŋ la gud Yeesu Kristu haa guudiya faɗi. Gud maa mo, tokɗeŋ daana səɓakiŋ haa kə Pepeŋ bə faɗnə-faɗna. *Amen.

Aŋ saa lasiŋ la a kəkəy kə kaa kə doo-deŋa

¹² Gədaarənti, aŋ a ŋili kas gəəli kəmtəŋ bə minti awte cəərəŋa bə goloŋ koɗ de nəətiŋ damdi yə haa karman bə minti aŋ kəm bay əsu ana ba.

¹³ Ana ɗaw ha'aŋ, aŋ jəə la wəra də waale bə tepe də Kristu dər gəəli bə minti wə a səənuŋ gəm kir minti, dər ko bə minti wə veɗe məyan nuutuŋ wəra a kaŋ keɗeŋ, ku tarməyaŋ ɗosə la wəra də waaleŋ faɗi.

¹⁴ Jəəne minti kaŋ sartaŋ gud bə minti aŋ kaa kə Kristuŋ, pisiŋ cəərəŋa gud bə minti lasi taŋ ge dər minti, Tiiru də minti dəŋaŋ kar wəra keɗeŋ, haa Tiirə Pepeŋ, a də əsə-isi giidiŋa.

¹⁵ Jəəne minti hulum guudəŋa bə se gəəliŋ, wə a saw gud bə minti wə a jəŋ kel kə bayməlaŋ, wə a awaŋ hulum, wə a jəŋ dəgaaya, ɗawba wə a kəlaŋ ku a kel kə kaa kəmana ba.

¹⁶ Səma jəəne minti hulum bə se gəəliŋa haa gud bə minti wə hulum kə Kristuŋ, wə a ji kese ba. Wə jəə suuse la a Pepeŋ gud səmu bə hulum kə Kristuŋa ɗaw.

¹⁷ Koŋ wəra maŋ bə minti Pepeŋ ɗele jeme kəəti də kaŋ, wə məlu guudu acekjew haa cəərə kaa kə doo-deŋa faɗi. Jəəne minti wə jeme ajew haa kəəti də kaa nuutuŋ ɗaw, gəəli ablaw cəərə kaa gə minti doŋ gud *Kel pəsaŋ kəmarwaŋ nuutuŋa baŋ!

¹⁸ Jeereŋ wəra bə jeerə-jeere minti: jəəne minti kaa ɗekeriŋ fele seereŋ gəəli-gəəliŋ, kaa kə bayməlaŋ gə minti paapa bə bele Pepeŋa baŋ, neeteŋ bə ɗe a ji máŋ naanaanə gəm tə moi?

¹⁹ Bədoona ta, kaa gə minti bə se gəəliŋa gud bə minti giidə Pepeŋ bəlaŋ bədoona anaŋ, yə a yaake ɓeti neeteŋ ba, yə yaakə kusri la neŋneŋ keɗe kasi Pep bə minti a jiiniy, tó bə minti yaake kel gə minti wə a wəətənəy wəraŋ bay ji baŋ.