I PIYER 3 - JAA TƏMARWAŊ

Kəram də kaŋkar neeteŋ

¹ Aŋ kəram gəm ha'aŋ, aŋ doo ku kaŋkar nəətiŋ la kir minti, sirdi gə minti paapa bə bele kel kə Pepeŋa baŋ, yə doo la máŋ haa gud ɗe dəŋ pisiŋa. Aŋ wəətənəy kel kə Pepeŋ nuutu baŋ,

² yə ase yaŋ nuutu minti ɗe dəŋ pisi, daana minti aŋ bə doy kuya ŋaanaanə mo.

³ Aŋ a aye ɗiki dəŋ cəərə kar gə minti aŋ bele kole kusrəŋ pəsaŋ dər kaŋa diiriŋ ba, damdi anə lapte cəŋ minti a daŋə kumsəŋ la wəra keɗe pəsaŋ, anə tere bə kar kə anul daana dəməəmə də awəy.

⁴ Ana ɗaw ha'aŋ, aŋ ayə ɗiki dəŋ la minti pəsaŋ dəŋ jəə da haa ku tarməyaŋ da aker da. Aŋ jəə la bə ji kese də kaŋa daana aŋ jəə la sããya, gud bə minti teŋ haa kar gə koloŋ pəsaŋ gə minti tewe hõy ba daana gə minti de dər Pepeŋ ablaw.

⁵ Kəram gə dayday gə minti a bə ɗe gud Pepeŋa daana gə malə-mele ɗiki di cuuruŋ, a kəkəy bə tope ku kaŋkar neeteŋaŋ, a bə gante haa bədoona.

⁶ Aŋ golə la haa cəərə Sara. A haa həlgə də minti doŋ ku gedra *Abraham, a məntunu minti «bərdən». Aŋ gəm, jəəne minti aŋ bə ji pisiŋa daana aŋ paapa bə yaake walka də kel kəmana bə jəŋa baŋ, aŋ koloŋ dayna haa damdi karməya ana faɗi.

⁷ Aŋ kaa kaŋkar gəm ha'aŋ, aŋ halə kəram nəətiŋ la pisi, aŋ asə la wəra cəərəŋa minti səɓaki neeteŋ paapa də ŋarə-ŋere də nəətiŋ ba. Aŋ jəy kese di la gəm gud bə minti, dədərgə də minti Pepeŋ ayaŋ di booboŋ ha'aŋ, wə əyəy di gəm, aŋ fəla ɓasi keɗe. Aŋ jəə la bədoona, kir minti karman a kele wəra dər toose nəətiŋa də Pepeŋ ba.

Kaa kə doo-deŋ, aŋ jəə la maŋ bə se gəəliŋ

⁸ A ge bə cəərə kel kətana taŋ, ten waataŋ minti ɗiki dəŋ jəə la məna də kumsəŋ, ku tarməyaŋ jəə la məna də kumsəŋ gəm. Aŋ balə kumsəŋ la, gud maa mo aŋ haa kəsaanə kumsəŋ, aŋ jəə la kaa kə ji gud kumsəŋ pisi, aŋ a ji kaa kə lete didiki dəŋ tiinə kumsəŋa ba.

⁹ Hulum jəŋ sərkə ne nuutu sarəŋaŋ, aŋ a jəw sərkə du ba. Wə sartənaŋ ne nuutu, aŋ a sərtu bə gəm. Ana ɗaw ha'aŋ, aŋ gaw pisi la cuuru gud bə minti Pepeŋ mantənaŋ haa bə bi a gaŋ pisiŋ cəərəŋa gəm.

¹⁰ Jeereŋ wəra bə jeerə-jeere giidə Kefter kə Pepeŋa minti: «Hulum waataŋ ne minti ko bə minti tó hebkəna duruŋ jəə la ku tó dihiŋ, tó jəə la də waale duru gəm, wə amə ku la cəərə kel kə baymeleŋa, wə yaakə ŋete bə kel la wəra gəm.

¹¹ Wə kolə kirku la a baymeleŋ, wə jəə nuutuŋ la máŋ haa pisiŋ daana wə goldə la haa kəkəy bə ji kəkaɓi də kaŋ keɗe.

¹² Gud maa mo, dər Pepeŋ cəərə kaa ɗekeriŋa daana wə əski toose neeteŋ. Səma kə kaa kaayaŋ gə ji baymeleŋ ha'aŋ, Barkaŋ awəya diiri.»

¹³ Jəəne minti aŋ ayaŋ kusrəŋ wəra a ji bə pisiŋ taltal, bə jəŋ baymele haa minti pə mo?

¹⁴ Jəəne nuutu minti aŋ se gəəliŋ gud ɗe nəəti ɗekeriŋaŋ, Pepeŋ gaŋ pisiŋ yaŋ cəərəŋa haa gud kel teŋa. Aŋ a ji walka kasi kaa gə minti goldoŋ bə jəŋ baymeleŋ ba anə ceki, ku tarməyaŋ jəə la ɗeketi.

¹⁵ Səma, aŋ haa cəərə Kristu Barkaŋ nəətiŋ la apəya ku tarməyaŋa. Hulum mundu mundu mo laanaŋ kuŋ ne cəərə karman bə minti aŋ məlaŋ ɗiki dəŋ cuuruŋ, aŋ jəə la saksaki wəra gə ɗampə-ɗampe bə daw guudu a nuunu.

¹⁶ Aŋ həru du la sããya, bə jəw kese du ada gəm. Aŋ jəə la ɗiki dəŋ bay kel, kir minti kaŋ jəŋ ne nuutu bə waate ku baymeleŋa cəərə ɗe dəŋ pisi bə gud Kristuŋaŋ, kese doy yaŋ a kel gə minti yə sartaŋ diiriŋ anə derra.

¹⁷ Giidə Pepeŋ bəlaŋ ne minti aŋ saa gəəli laŋ, marya diŋ aŋ saw la gud ji bə kel pəsaŋa dəŋaŋ bə minti aŋ saw gud kel kə bayməlaŋaŋ.

¹⁸ Kristu də kusru ləsaŋ warna gud baymele kə kaŋ na kampa məna faɗi. Tó bə minti jəŋ baymele hõy baŋ, wə ləsaŋ a koɗ kaa kə baymeleŋa kir minti tó ɗee la dəərəŋ a Pepeŋ. Kaŋ awaŋ haa kusuki du, səma Tiiru Cetcetaŋ haraŋ bə əyu dədərgəŋa.

¹⁹ Də səɓaki kə Tiiru taŋ tə bə moŋ, wə ɗeŋ a waate *Kel pəsaŋ kəmarwaŋ warda a kaa kə mee-me gə minti a daŋgayaŋ.

²⁰ Kaa teŋ haa kaa gə minti a gargaŋ də awəy dayday tiinə Pepeŋaŋ. Də ko bə minti Nowe ateŋa bə ceɗe turtiŋaŋ, Pepeŋ gəyaŋ geye bə məya. Kaa anə məka bagŋ, məna-məna azəgən, vaŋ giidə turtiŋa, kəya yə seereŋ wəra ku meŋa a kəkəy bə minti kan haŋ turtiŋ.

²¹ Kan té gə minti yə seereŋ diri daŋ, ge dər haa cəərə batema. Baade bə minti tam fəlu a ji bə batema ha'aŋ, toŋ paapa bə baadam zodi bə səram wəra ba. Wə haa bə ge dər minti hulum bə doo-deŋ haa ɗiki du wəra bay kel tiinə Pepeŋa, bə aye kusru a ɗe bə guuduŋa. Kel teŋ nəkaŋ bə ji wəra keɗe haa gud bə minti Yeesu Kristu haraŋ wəra dədərgə adordə meŋa.

²² Wə kooroŋ apəy na tarmə pepeŋ na, wə bə əsə-isi a kasi kemer kə Pepeŋa, wə bə əsə-isi kumna cəərə *kaa kə digi kə Pepeŋa, də kar kə saɓak-səɓakiŋ daana kar kə abay-abay gə apəyaŋ.