I PIYER 2 - JAA TƏMARWAŊ

Pepeŋ ŋamnaŋ wəra a kusru

¹ Gud teŋa ta, gidiirə baymeleŋ keɗe, aŋ yəəku la wəra. Anə ŋete bə kel, kel kə waate bə kuy təwa-təwa, jəəti bə sərkəŋ cəərə kumsuŋa, acakiŋ, aŋ yəəkəy la wəra keɗe.

² Aŋ jəə la bə bele kel cetceti kə Pepeŋa damdi beebe konce bə kasi nuru bele kaw də nuruŋ ana gəm, kir minti aŋ say la bə si hãã a ko bə minti Pepeŋ ɗe a de ku seereŋ wəra a nəənəŋ.

³ Gud maa mo, aŋ gosoŋ disi də pisi bə minti Barkaŋ a juunu sarəŋa ne wəra.

⁴ Aŋ zee la maŋ sar Barkaŋ Yeesu, wə haa pərki bə minti dədərgəŋ. Wə haa pərki bə minti kaŋ a gəənu warna, səma wə gole dər Pep bə minti ŋəmnuŋ, pərki bə deŋe kumsuŋ haa tó ɗaw.

⁵ Aŋ jəə la haa damdi pərki bə dədərgəŋ ana gəm, kir minti Pepeŋ hərsə kuli nuutuŋ la dəərəŋ. Haa kuli bə minti Tiiru Cetcetaŋ isi adaŋ. Giidə kuli toŋa, bə jəəti keere bə minti Tiiru Cetcetaŋ waataŋ səmu, bə minti de dər Pepeŋ gud Yeesu Kristuŋ, haa aŋ.

⁶ Gud maa mo, kefter kə Pepeŋ wəra bə jeerə-jeere minti: «Aŋ golə laŋ, ten ŋəɓaŋ pərki pisi bə deŋe kumsuŋ, ten gəənu giidə vil də Siyoŋa minti ten hərsi kuli katən cuuru. Tam hulum bə minti doŋ ne guuduŋ, tam kole kese hõy ba anə hasi.»

⁷ Aŋ kaa kə doo-deŋ, karman pisi bə deŋe kumsuŋ dərəŋa haa tó faɗi. Səma kə kaa kə bay deŋ ha'aŋ, jeereŋ wəra bə jeerə-jeere giidə kefter kə Pepeŋa minti: «Pərki tó bə minti kaa kə hərsiŋ a gəənu warna ha'aŋ, wə koloŋ hebkəna pərki pisi bə deŋe kumsuŋ a hərsi bə kuliŋa haa tó ɗaw.»

⁸ Yə jeereŋ pa minti: «Kaŋ daste haa a pərki toŋa, yə awte anə kurup-kurupi.» Kaa teŋ dabte ada haa kas minti yə paapa bə bele kel kə Pepeŋa baŋ. Pepeŋ a waataŋ warda anə hãã cəərə kel teŋ da minti yə bə ɗe a ji bədoona ana'i.

⁹ Səma, aŋ teŋ ha'aŋ, aŋ haa kaa gə minti Pepeŋ ŋamtənaŋ wəra, kaa kə keere kə kumna bobloŋ, kaa gə minti wə zeeneŋ wəra dəra'i a kusruŋ, aŋ haa kaa nuutuŋ faɗi. Wə ŋamtənaŋ wəra haa minti aŋ ɗee la a waate sam kar kəmtəŋ pəsaŋ gə minti tó a jiiniy wəra a kaŋ, tó bə minti humnəŋ warda dər tilməŋ da bə bi a vaŋ wəra dər pəɗaki nuutu də deŋe kumsəŋaŋ.

¹⁰ Gud maa mo, a dayday, aŋ a paapa kaa nuutu ba; bə hebkənaŋ, aŋ máŋ kaa nuutu. Ji bə giidu pəsaŋ gə minti Pepeŋ a bə jiya sar kaŋaŋ, a paapa nəəti ba; hebkəna wə máŋ bə jiya pəsaŋ sarəŋa gəm.

Aŋ jəə la kaa kə joŋre kə Pepeŋ

¹¹ Gədaarənti, aŋ gə minti cəərə seŋkaŋa kəna bə kə irku ana, bə kaa gə minti bəŋ cəərə a gəryi ana'iŋ, ten bə waataŋa wəra anə kaŋkaŋ minti: aŋ a yaake kusrəŋ a kar gə minti giidəŋ bələy pəda, gud maa mo, kar teŋ bə golde haa minti té awe dədərgə də minti Pepeŋ aynaŋ dəŋ wəra.

¹² Hebkəna, bə minti aŋ adəwaldə kaa gə minti Pepeŋ paapa də diri ba tə bə moŋ, ɗe dəŋ jəə la saksaki pisi kir minti, yə waataŋ ne nuutu minti aŋ kaa kə bayməlaŋ ŋaanaanə moŋ, yə bə ase yaŋ minti kel nəətiŋ pəsaŋ, daana yə tokɗe Pepeŋ yaŋ də hi bə minti wə bəŋ neŋ.

¹³ Gud kese də Barkaŋa tə bə moŋ, aŋ jəə kese də govornəmaŋ la keɗe: kumna boblo bə cəərə seŋkaŋ,

¹⁴ kaa gə minti wə istiniy bə ji joŋreŋ bə tope kaa kə ji kel kə hãy-hãy, daana bə aŋke kaa gə minti ji kel pəsaŋ.

¹⁵ Gud maa mo, kel gə minti giidə Pepeŋ bələy ha'aŋ, haa minti aŋ zenə kaa kə bay ɗiki gə minti bə cəmaŋ guudəŋa də kel kə bay ase neeteŋ la wəra. Aŋ neke bə jəy bədoona haa də joŋre pisi bə minti aŋ bə jəwaŋ.

¹⁶ Ɗe dəŋ jəə la bə kə hulum bə bədə-bidi ana. Səma, aŋ a ɗiki minti aŋ wəra gə bədə-bidiŋa, aŋ ji kel kə bayməlaŋ giidəŋ beleŋ, aŋ a ɗiki bədoona ba. Ɗe dəŋ jəə la haa bə kə kaa kə ji joŋre kə Pepeŋ ana ɗaw.

¹⁷ Aŋ jəə kese də kaa la keɗe, aŋ balə kəsaanaŋ gə doo-deŋ la, aŋ haa cəərə Pepeŋ la apəya, aŋ jəə kese də kumna boblo bə cəərə seŋka la gəm.

¹⁸ Ten waate haa aŋ kafkam gə minti bə ji joŋreŋa a kəmnə dəŋ. Yə bə jəŋa pisi, ɗalba yə paapa bə jəŋa pisi ba, aŋ doy kuy la keɗe, aŋ jəy kese di la wəra a kuɗuŋa.

¹⁹ Gud maa mo, jəəne nuutu minti hulum bə se gəəliŋa cəərə kel nuutu kemera gud bə minti wə bə de ku Pepeŋaŋ, pisi kə Pepeŋ yaŋ cuuru.

²⁰ Gəəli bə minti aŋ saw gilaŋ gud bə minti aŋ jəŋ ɓalkeŋ, aŋ fele aŋke guudu ba anə ceki. Səma, aŋ saŋ gəəli ne gud ji bə kel ɗekeriŋa daana aŋ məŋ ne dər gəəli toŋaŋ, toŋ haa karman pisi dər Pepeŋa.

²¹ Pepeŋ mantənaŋ haa bə hale gəəli tó bə gul-gulaŋ, gud maa mo Kristu də kusru saŋ gəəli guudəŋa gəm. Bədoona ana, wə gaanaŋ dərəŋ wəra cəərə kəkəya kir minti aŋ haa bəlam də tó la.

²² Wə də kusru, wə jəŋ baymele hõy ba, wə jəmaŋ tete hõy a hulum bə gəm.

²³ Də ko bə minti kaŋ sərtunuŋ, wə bəŋəŋ ku wəra bə sarte huluma ba anə ceki. Bə minti yə bə ləsuŋ, wə wəətənəy minti tó bə ləsəy yaŋ bə gəm. Səma wə yaakaŋ kusru haa kasi Pep bə minti jeme kəətiŋ ɗeker.

²⁴ Wə də kusru, wə haŋ baymele náŋ cuuru, wə saŋ lasiŋ də baymele náŋ toŋ warna suru na də bə minti yə ɓəlnu wəra a kəbaŋ gə largaŋaŋ, kir minti aŋ jəə la wəra gə mee-me agal də ji bə baymeleŋa, səma aŋ jəə la máŋ dədərgə agal də ɗe ɗekeriŋa ɗaw. Wə saŋ lasiŋ bədoona tə bə moŋ, aŋ seereŋ wəra haa gud teŋa.

²⁵ Gud maa mo aŋ a jəŋ dayday wəra gə lentə-lente damdi kaamaŋ gə lentə-lente ana. Bə hebkənaŋ, aŋ haraŋ ne gud hulum bə minti jəŋ guudəŋ daana bə minti amaŋ cəərəŋ pisi, damdi hulum bə ame kaamaŋ pisi bə jəy guudi ana'i.