I PIYER 1 - JAA TƏMARWAŊ

Mirkiŋ

¹ Jeere kefter toŋ kəya haa ten Piyer, *hulum bə gaa-ge kə Yeesu Kristuŋ. Ten jeereŋ kefter toŋ kəya a aŋ kaa gə minti Pepeŋ a ŋamtənaŋ wəraŋ. Aŋ hebkəna gə meertə-meerte warna aŋay giidə seŋka də Poŋ na, də Galatiŋ, də Kapadosiŋ, də Aziŋ, daana də Bitiniŋ naŋ.

² Aŋ haa kaa gə minti Pep Bar áŋ ŋamtənaŋ gud ɗiki nuutu bə minti wə a ɗuknu warda hãã cəərəŋ da. Wə əsnəŋ wəra dəra'i a kusru də səɓaki kə Tiiru Cetcetaŋ, kir minti aŋ doo ku Yeesu Kristu la daana minti aŋ jəə la wəra gə poorə-poore də kor duŋ. Pisiŋ daana kəkaɓi kə Pepeŋ jəə la cəərəŋa pisi jəə!

Pepeŋ aye dədərgə təmarwaŋ

³ Aŋ tokɗə Pep Bar Barkaŋ náŋ Yeesu Kristu la! Gud ji bə giidu pəsaŋ nuutu bə ablawa tə bə moŋ, wə ayaŋ dədərgə təmarwaŋ a áŋ gud hare bə Yeesu Kristu wəra dədərgə adordə meŋa, kir minti ɗiki də áŋ jəə la wəra bə malə-mele cuuru kaŋkaŋ.

⁴ Gud maa mo, wə ɗampaŋ kar pəsaŋ a áŋ, kar teŋ tewe hõy ba, yə zode wəra hõy bə gəm, pisi bə siriŋ tewe wəra hõy bə gəm. Wə bə ɗukuy na a nəənəŋ apəya na,

⁵ a aŋ kaa gə minti Pepeŋ bə amaŋa də səɓaki nuutuŋ gud de nəəti bə guuduŋaŋ. Wə bə amaŋa kir minti aŋ falə seereŋ la, seere tó bə minti wə bə vəɗu yaŋ wəra a kaŋ a tewe bə koŋaŋ.

⁶ Gud teŋa ta, aŋ máŋ hebkəna də waale, jəəne nuutu minti aŋ dər laawe gud gidiirə gəəli bə minti aŋ bə sawa dər ko weseki bə hebkənaŋaŋ ɗawmay.

⁷ Aŋ bə sawa haa bə gole koɗ de dəŋ minti wə haa de bə gəəzə-gəəzi nuutu mo, paapa mo? Aŋ gosə gole la kəm, maaway tewe wəra hõy bə mo? Də teŋ keɗe, yə hoga a cəwa hərhəraŋa bə reye zodi dəŋ wəra. Səma, karman bə minti dəŋaŋ maaway pisi kampa ablaw, haa de nəətiŋ bə minti əsəŋ ŋəŋ dər gəəli bə minti gulnu kuɗu ɗaw! Gud de nəəti toŋa ta, Pepeŋ bə ayaŋ tokɗeŋ, məyan, daana wə haŋ cəərəŋ yaŋ apəya dər hi bə minti Yeesu Kristu veɗe kusru yaŋ wəra a kaŋ.

⁸ Aŋ asaŋ Yeesu Kristu kəm hõy də dərəŋ ba, də teŋ keɗe aŋ bə bəlu. Hebkəna aŋ əsnu kəm bə pa, də teŋ keɗe aŋ gə doo-de guudu. Bədoona ana, waale boblo bə minti hulum neke bə wəətu səmu də ku baŋ, ɗosnoŋ ku tarməyaŋ ne wəra

⁹ gud bə minti aŋ bə fele karman bə minti aŋ a doŋ gud kel du bə fəluŋ, haa seereŋ.

¹⁰ *Kaa kə jogte ku mini kə Pep gə dayday vərgəŋ gud kel gə cəərə seere toŋa wəra anə kaŋkaŋ. Yə waataŋ wəra acekjewa haa cəərə karman tó pisi bə minti Pepeŋ a ɗomponoŋ dəŋ wardaŋ.

¹¹ Tiiru kə Kristu də minti a jəŋ giidiŋ, a wəətənəy wəra ajewa cəərə lese bə minti Kristu bə ɗe a saw yaŋ daana minti adordə lese toŋa, wə ɗe a fele aŋke yaŋ gəm. Kaa kə jogte ku mini kə Pep teŋ, goldoŋ hel bə ase minti kel teŋ ɗe a ji haa kotnə mo, daana naanaanə moŋ.

¹² Pepeŋ vəɗnəy kel wəra minti, kel gə minti yə bə wəətiya ha'aŋ, yə ɗe a ji diri ba, səma yə haa kel nəəti. Kaa gə minti bə waate *Kel pəsaŋ kəmarwaŋa hebkənaŋ, yə waatənaŋ kel teŋ wəra. Yə wəətənəy haa paapa də səɓaki neete ba, yə wəətənəy haa də səɓaki kə Tiiru Cetcetaŋ də minti bəŋ apəy daŋ. *Kaa kə digi kə Pepeŋ də kusri bə golde haa minti té asə gud kel teŋ la gəm ɗaw.

Ɗe bə minti de dər Pepeŋ

¹³ Gud teŋa ta, aŋ ɗampə ɗiki dəŋ la wəra kir minti aŋ jəə la wəra maŋ bə ji joŋre kə Pepeŋ. Aŋ əsə ɗiki dəŋ la soki, aŋ məlu la wəra keɗe cəərə pisi bə minti Pepeŋ ɗe a ayaŋ dəŋ dər hi bə minti Yeesu Kristu veɗe kusru yaŋ wəra a kaŋ.

¹⁴ Aŋ humə kosoŋ la saksaki cəərə Bəraŋ Pepeŋa. A dayday, bə minti aŋ kəm bay ase Kel pəsaŋ kəmarwaŋ, kel gə minti giidiŋ bələy a bə ɗe dəərəŋ haa té. Bə hebkəna ha'aŋ, aŋ a yəəkəy kəkəy pəda.

¹⁵ Pepeŋ ha'aŋ, wə wəra dəra də kar kaayaŋ keɗe. Bədoona ana, dər ɗe nəətiŋa keɗe, aŋ gaa gud kusrəŋ la wəra ada minti aŋ wəra gə ayə-aye kusrəŋ a Pepeŋ.

¹⁶ Gud maa mo Pepeŋ waataŋ giidə kefter nuutuŋa minti: «Aŋ ayə kusrəŋ la wəra anə soki a nəənən, gud bə minti ten wəra dəra də kar kaayaŋ keɗe.»

¹⁷ A kəkəy bə tooseŋa, aŋ mante minti «Barən» haa Pep bə minti jeme kəəti də kaŋ keɗe gəga'-gəga'i də aŋar də kel gə minti mindi mindi mo a jiiniy. Gud teŋa ta, də ko weseki bə minti aŋ kəm hebkəna zugi cəərə seŋkaŋa duuruŋ, aŋ gaa dər kaa la wəra minti aŋ bə jəw kese du haa də ɗe dəŋ faɗi.

¹⁸ Gud maa mo, karman bə minti Pepeŋ wirkunu bə bədəŋ warda ku ɗe dəŋ bə gud hate bə bay bəlam du bə minti kəmoomo dəŋ a hatnaŋ duuru ha'aŋ, wəra də dərəŋ. Wə werkeŋ paapa də karman bə minti bə tewe wəra hõy damdi anə soloy, anə maaway, ana ba.

¹⁹ Wə bədnəŋ warda ana ɗaw ha'aŋ, də kor də Kristu bə minti dəŋaŋ kar wəra neŋneŋ keɗe'iŋ. Kristu də kusru a haa damdi kormə taaməka bə bay dege suru anə weseki ana, bə minti yə ji keereŋ duuruŋ.

²⁰ Də ko bə minti Pepeŋ a kəm bay ji seŋkaŋ, wə a ŋəmaŋ Kristu warda hãã daana wə vəɗnu wəra dər ko tó bə adoroŋa haa guudəŋa.

²¹ Gud Kristu tə bə moŋ, aŋ doŋ gud Pep bə minti hərnu wəra dədərgə adordə meŋa daana bə minti əynu tokɗeŋ. Bədoona ana, de nəətiŋ daana ɗiki dəŋ wəra bə malə-mele cuuru.

²² Aŋ humuŋ kosoŋ cəərə gəəzi kə Pepeŋa, kəya baymele nəətiŋ fəlaŋ vəəgə bə giidu ne gəm. Aŋ koloŋ gə nakə-neke bə bele kumsəŋ gəəzə-gəəzi. Bədoona ta, aŋ balə kumsu la adəwaldə kumsəŋa saksaki wəra də ku tarməyaŋ soki məna.

²³ Aŋ fəlaŋ dədərgə təmarwaŋ də səɓaki də Kel kə dədərgə kə Pepeŋ gə minti tewe wəra hõy baŋ. Aynaŋ dədərgə taŋ haa Pep bə minti koloŋ bəraŋ. Wə paapa damdi hulum kisirki bə minti me wəra hõy ana ba, wə saksaki dədərgə.

²⁴ Gud maa mo, wəra gə jeerə-jeere giidə kefter kə Pepeŋa minti: «Kaa kəsarkaŋ keɗe haa akas kaɗəkawa ana, mele bə siriŋ damdi huufi bə kar ana. Cəwa ɗəmaŋ kar teŋ neŋ, yə lawɗe wəra, kəya huufi diŋ reye wəra faɗi.

²⁵ Səma, kel kə Barkaŋ, teŋ tewe ba anə ceki.» Kel teŋ ha'aŋ, yə haa *Kel pəsaŋ kəmarwaŋ gə minti yə a waatənaŋ dəŋ wəra.