I KOREŊTƏŊ 9 - JAA TƏMARWAŊ

Kel cəərə kaa kə vaa-veŋa

¹ Kəkəy wəra cəərəna hoŋ keɗe bə mo? Ten *hulum bə gaa-ge kə Barkaŋ bə mo? Ten asaŋ Yeesu Barkaŋ náŋ də dərən bə mo? Aŋ haa joŋre bə minti ten juunu a Barkaŋ bə mo?

² Jəəne nuutu minti kaayaŋ paapa gə doo-de haa minti ten hulum bə gaa-ge baŋ, aŋ teŋ, aŋ gə asə-ase bədoona ana. Gud maa mo, gud tepe nəətiŋa də Barkaŋ tə pə moŋ, aŋ koloŋ haa karman bə ge dər wəra faɗi minti ten hulum bə gaa-geŋ.

³ Haa kəna kel gə minti ten wəətəy wəra cəərə kusrəna a kaa gə minti kan də kel.

⁴ Damdi are ana ha'aŋ, kəkəy a cəərə are bə fele hameŋ daana karman bə se naareŋ haa kaasəŋa bə mo?

⁵ Kəkəy a cəərə are bə ɗe lam kəna də kəram naare gə doo-de gud are gəm bə mo? Kaa kə vaa-ve kaayaŋ, kəsaanə Barkaŋ, daana Piyer, teŋ bə ji bədoona.

⁶ Kumundu ba ten də Barnabasi, are teŋ kir ji joŋre bə fele hame bə ku areŋ haa are təwa mo?

⁷ Aŋ gosə waatan la kəm mo: aŋ əskəŋ hõy mo minti sootoŋ a joŋreŋa hare a werke ada na werke pə ɗaw? Aŋ əskəŋ hõy mo minti hulum keɗe akaŋ, karman bə minti jəŋ giidəŋ, wə mele ku ada baŋ? Aŋ əskəŋ hõy mo minti hulum bə minti gud begeŋa mele ku a kaw diŋa baŋ?

⁸ Kel gə minti ten wəətənəy haa kənaŋ paapa gə əsə-isi cəərə karman bə minti kaa kəsarkaŋ bə ɗuku təwa ba. *Ku gili kə *Moyisiŋ wəra bə waatə-waate bədoona ana gəm.

⁹ Gud maa mo wəra bə jeerə-jeere giidə ku giliŋa minti: «A dere akoŋkooro wəra ku kurki bə tayte kaasawa bə tu'uy wəraŋ ba.» Pepeŋ ɗəkəŋ paapa cəərə kərkəwa təwa ba bə minti wə waataŋ kel teŋ.

¹⁰ Wə wəətənəy haa gud áŋa bə mo? Gəəzi, wə jiiriniy haa gud áŋa. Gud maa mo, hulum bə minti bə keɗe giidə akaŋa daana bə minti bə tu'i kaasawa, yə jəŋ joŋreŋ ne də ɗiki di bə malə-mele minti té fele guuduŋ, haa pisi.

¹¹ Jo'onoŋ kar gə minti a tiiruŋa ku tarməyaŋa haa are. Are ɗəkəŋ ne minti are falə karman la kaasəŋaŋ, kel naareŋ bə raawaŋ haa a məntəŋa mo?

¹² Jəəne minti kəkəy cəərə kaayaŋa bə fele karman kaasəŋaŋ, kəkəy a cəərə are dəŋaŋ neete bə ɗaw moŋ? Də teŋ keɗe, are jəŋ bədoona ba. Are doŋ hale bə gəəliŋ keɗe ɗaw kir minti kaŋ əskə *Kel pəsaŋ kəmarwaŋ gə cəərə Kristuŋ la, are a kole karman bə hay kuy wəra bay iskiy ba.

¹³ Wəra də dərəŋ minti kaa gə minti ji joŋreŋ giidə *Kuli kə Pepeŋaŋ, fele hame neeteŋ haa ada. Kaayaŋ gə minti ji joŋreŋ giidu a ko bə jəəti keereŋaŋ, fele gud kar gə minti yə əyəy bə keereŋ gəm.

¹⁴ Barkaŋ waataŋ cəərə kaa gə minti bə waate Kel pəsaŋ kəmarwaŋaŋ haa bədoona gəm minti, yə falə hame neeteŋ la ada.

¹⁵ Səma ten toŋ jəŋ joŋre də kumundu gud kel teŋa anə məna ba. Ten jeereŋ ciiri haa paapa bə waate minti aŋ jən dən la bə gəm. Ten meŋ neŋ, dərəna marya dəŋaŋ bə minti ten mante karman kaasəŋaŋ. Ten yaake kəkəy a hulum bə ɓalkan karman katən bə minti ten bə he cəərə kusrəna apəya guudu wəra ba anə ceki!

¹⁶ A gəəziŋaŋ, ten paapa kir he cəərə kusrən apəya də waate bə Kel pəsaŋ kəmarwaŋ wəra a kaŋ ba gud bə minti aynan joŋre toŋ haa Pepeŋ. Gəəli cəərəna jəəne minti ten wəətənəy wəra baŋ!

¹⁷ Gəəzi, a haa ɗiki bə ji digi də kaasən la kəyaŋ kəna ten, ten a sə a mi werke guudə nuutu. Ten haŋ ɗiki bə jəərəŋ paapa ten ba tə bə moŋ, ten ji haa digi də minti Pepeŋ aynan dən minti ten jəərə la bədoonaŋ təwa faɗi.

¹⁸ Bədoona ana, werke katən haa maa mo? Haa waale bə minti dəərən a ko bə minti ten waate Kel pəsaŋ kəmarwaŋ wəra bay mante karman kasi kaŋa, koo də kəkəy bə minti a nuutu cəərəna bə fele karman guudiŋ.

¹⁹ Kəkəy wəra cəərəna hoŋ keɗe. Də teŋ keɗe, ten yaakaŋ kusrən bə ji kafkam kə kaŋ keɗe kir minti ten falə kaa la ablaw a Kristu gə minti ten bə nakə-neke kir fələy.

²⁰ Ten jəŋ ne də kaanə Ziwifiŋ, ten ɗe haa bə té ana gəm bə fələy da a nuunu. Ji abay cəərəna paapa ku gili kə Moyisiŋ pəda. Səma ten jəŋ ne də kaa gə minti bə humi kosoŋa cuuruŋ, ten ɗe haa bə té ana gəm, kir minti ten fələy da a Kristu.

²¹ Ten jəŋ ne də kaayaŋ gə minti ku gili kə Moyisi paapa də diri baŋ, ten ɗe haa bə té ana gəm bə fələy da. Ten jəŋ teŋ ne bədoonaŋ, ge dər minti ten paapa bə humi kosoŋa cəərə ku gili kə Pepeŋa pəda moŋ, paapa. Ana ha'aŋ, ten bə humi kosoŋa cəərə ku gili kə Kristuŋa ɗaw.

²² Ten jəŋ ne də kaayaŋ gə minti paapa də səɓaki a deŋa baŋ, ten ji damdi ten paapa də səɓaki ba ana gəm, bə fələy da a nuunu. Hulum toŋ jəəne naanaanaŋ, ten mele kel kə ji bə tó ana gəm. Bədoona ana, də gidiirə hel dəra'-dəra'a taŋ, ten neke yaŋ bə mele sirdi a seereŋa nuutu maki to'i.

²³ Kar teŋ gila keɗe, ten jiiniy haa minti Kel pəsaŋ kəmarwaŋ duusə la wəra daana kir minti ten falə la gud pisi bə guudiŋa gəm.

²⁴ Wəra də dərəŋ minti a ko bə minti kaŋ fi taraŋ adaŋ, kaa gə fi taraŋ mele guudi bə fəərə keɗe, səma ɗe a he werke bə bulum haa hulum məna təwa. Aŋ fəə taraŋ la haa bə hulum toŋ ana bə ɗe a he werke toŋ gəm.

²⁵ Hulum bə fi tara mundu mundu mo jeŋe kusru ha'aŋ, paapa boomə-boome ba. Yə jeŋe kusri ha'aŋ gud werke bə bulum kəman bə minti ɓalke wəra ɗaw. Áŋ jeŋe kusrə áŋ ɗaw ha'aŋ, gud werke bə bulum bə minti ɓalke hõy baŋ gadi faɗi.

²⁶ Gud teŋa ta, ten fi tara katən paapa dər bəwiŋ na anə hãy ba. Ten haa damdi hulum bə le godboŋ ana, səma ten lete koŋ warna boobo ba.

²⁷ Ten le ku kusrən wəra haa le faɗi, ten gədu ku wəra haa gedeŋ faɗi. Jəəne paapaŋ, ɗawba ten bə minti a waataŋ kel wəra a kaŋ, ten kole hulum bə minti neke a werke bə buluma pəda.