I KOREŊTƏŊ 8 - JAA TƏMARWAŊ

Kusuki bə minti yə keereŋ kar gə minti yə guluy pepe neeteŋ duuruŋ

¹ Hebkəna ten waate haa cəərə kusuki bə minti yə keere kar gə minti kaŋ guluy pepe neeteŋ duuruŋ. Aŋ bə waate minti áŋ keɗe gə asə-ase kar ablaw. Gəəzi nuutu, səma ase toŋ kəya haa ase bə minti kaŋ teke cəərə kusri apəya duuruŋ. Karman bə minti keye áŋ bə si də kumsə áŋ, haa beleŋ.

² Hulum jəəne bə ɗiki minti tó bə asə-ase karman, wə asə la faɗi minti ase kə toŋ paapa kəm a kuɗuŋa ba.

³ Səma hulum bə minti bele Pepeŋ, Pepeŋ bə asə-ase duuru minti wə kə tó gəm.

⁴ Cəərə le ku bə hame bə kusuki bə minti yə jəŋ keere duuru a kar gə minti yə guluy pepe neeteŋ moŋ, wəra də dər áŋ minti, kar teŋ neke bə ɗoote də kusri ba, daana minti Pepeŋ ɗaaməna, baalaŋ paapa.

⁵ Gəəzi kar yaŋ apəya daana adawra, sərdə kaa bə ɗiki ciiri minti yə haa pepe kəman. Bədoona ana pepe toŋ daana kəkamna teŋ yaŋ ablaw.

⁶ Səma kə áŋ kaayaŋ ha'aŋ, Pepeŋ ɗaaməna, wə haa Abaŋ. Kar keɗe bi haa kəəsu da, daana áŋ lam haa a nuunu gəm. Barkaŋ məna gəm, haa Yeesu Kristu. Jəŋ kar keɗe haa tó, áŋ lam dədərgə haa kir kəəsu gəm.

⁷ Kaa kə doo-de ablaw paapa gə hatə-hate gəəzi toŋ wəra kəya ba. Kəsar də ɗiki bə jəəti kiɗi ku a kar gə minti yə guluy pepe neeteŋ wəra gə vaa-ve siri. Kəya bə minti yə hamaŋ kusuki bə keere toŋ neŋ, yə ɗiki haa minti té hamaŋ haa kusuki kə kar té gə minti kaŋ guluy pepe neeteŋ gəəzi. Gud ɗiki di bə kerpə-kerpeŋa, yə gole dər kusri haa minti té wəra gə ɓalkə-ɓalke tiinə Pepeŋa.

⁸ Də teŋ keɗe ze áŋ sar Pepeŋa haa paapa karman bə hame ba. Aŋ həmnu baŋ, aŋ kuŋ paapa ki bə gəm. Aŋ həmnu neŋ, aŋ fele karman ada dəŋaŋ toŋ bə gəm.

⁹ Kəkəy cəərəŋa bə hame karman bə minti giidəŋ bəluŋ. Səma aŋ jəə la pisi də kel teŋ, kir minti kaayaŋ gə minti paapa də səɓaki a deŋa baŋ a kole bə awte dər baymele gud kel dəŋa ba.

¹⁰ Aŋ golə la kəm, hulum bə ɗiki du bə kerpə-kerpeŋ asaŋ tam bə asə-ase ablaw ne ɗaw bə hame giidə kuli bə minti yə a juunu a kar gə minti yə guluy pepe neeteŋ, ɗiki du zew guudu ada pisi ze bə ɗe a hame kusuki kə kar teŋ máŋ bə ɗaw mo?

¹¹ Bədoona ana, gud ase nəmti toŋa taŋ, kəkəy kə seenem bə minti paapa də səɓaki a deŋa baŋ, ɓalke wəra. Ana haa seenem bə minti Kristu ayaŋ dədərgə du wəra guuduŋ.

¹² Jəəne minti aŋ bə ji gom də baymele toŋa sar kəsaanaŋaŋ daana aŋ hitiy dəlay a ɗiki neete bə kerpə-kerpeŋ, aŋ ji baymele toŋ haa sar Kristu gadi faɗi.

¹³ Gud teŋa ta, jəəne minti karman bə minti ten bə həmuŋ, seenən ɗe a awe dər baymeleŋa guuduŋ, ten hame kusukiŋ pəda anə ceki faɗi kir minti ten a kole bə lintu kəkəy nuutuŋ ba.