I KOREŊTƏŊ 7 - JAA TƏMARWAŊ

Pol hare kel cəərə tope bə kərama

¹ Hebkəna ten haraŋ kel cəərə kel gə minti aŋ a jiiriniy giidə kefter nəətiŋ daŋ. Hulum doŋ həlgə baŋ, haa pisi.

² Səma bə he ku booboŋ wəraŋ, marya diŋ ha'aŋ, mindi mindi mo jəə la də muru, həlgə məntə məntə mo jəə la də gedra gəm.

³ Hulum jəə kel kə koŋkor-koŋkor la wəra sar muruŋa. Həlgəŋ jəə kel kə həlgə-həlgə la wəra sar gedraŋa gəm.

⁴ Gud maa mo kusrə həlgəŋ paapa naata pəda, wə máŋ kə gedraŋ. Bədoona ana, kusrə hulum koŋkor paapa nuutu pəda, wə máŋ kə muruŋ gəm.

⁵ Aŋ a jəəti gõõya a kumsəŋ ba. Səma aŋ təpaŋ kuŋ ne minti aŋ ɓarsə la dər ko kəm weseka bə aye kusrəŋ bə toose Pepeŋaŋ, aŋ neke bə ji teŋ. Adordə ko toŋa kəya, aŋ harə la sar kumsəŋa damdi bə ajew ana. Jəəne paapaŋ, *Sataŋ neke bə fele ko bə kaŋ kuŋ wəra jəəne minti aŋ paapa gə nakə-neke bə de kusrəŋ baŋ.

⁶ Karman bə minti ten wəətunuŋ, he bə gud hulum paapa ada ba. Səma aŋ bəlaŋ ne minti aŋ jəw, kəkəy yaŋ nuutu.

⁷ Karman bə minti dərəna marya'iŋ haa minti kaŋ sə a jəə la bay kəram akas tena ana. Səma mindi mindi mo bə falə-fele ayeŋ kasi Pepeŋa dəra'-dəra'i. Wə aye a hulum haa səɓaki də isi bay həlgə, a baalaŋ haa səɓaki də minti wə doo həlgəŋ laŋ. Wə bə ayə-aye a kəram haa bədoona gəm.

⁸ Ten waate haa kaa kə bay kəram mo, kəram kə bay kaŋkar mo, daana kəram gə bay minti yə əsəŋ ne bədoonaŋ haa pisi, damdi ten bə əsə-isi anaŋ gəm.

⁹ Səma jəəne minti yə neke bə de kusri baŋ, marya diŋ yə goldə kəkəy bə tope kəram la mo, kaŋkar la mo, faɗi. Gud maa mo haa marya minti doo koŋkor la ɗawba doo həlgə la dəŋaŋ bə minti tam yaake kusrum bə halyəmaŋ.

¹⁰ Ten waate hebkəna haa kəram gə kaŋkar, kaŋkar gə kəram gəm. Kel gə minti ten wəətəy diŋ paapa kel katən ba, haa kel kə Barkaŋ. Kel teŋ haa minti həlgəŋ a yaake gedraŋ baŋ.

¹¹ (Jəəne nuutu minti a yəəkunuŋ, a a raawe a de baalaŋ ba, a goldə la haa kəkəy bə hare ger gedraŋ.) Kə hulum koŋkor ha'aŋ, wə a buusi muruŋ ba.

¹² Ten waate hebkəna haa kaa kaayaŋ gəm ta. Kel gə minti ten wəətəy diŋ, wəətəy kəm nuutu haa ten, Barkaŋ waataŋ kel ciiri anə derra ba. Jəəne minti seenə áŋ bə doo-de yaŋ, muruŋ táŋ bay deŋ, səma a duunu ku bə isi duuruŋ, wə a buusə wəra ba.

¹³ Jəəne minti nawrə áŋ də doo-de yaŋ, gedraŋ toŋ bay deŋ, səma wə doona ku bə isi dəərəŋ, a a buusi wəra ba.

¹⁴ Gud maa mo hulum bə bay de bə minti muruŋ də doo-deŋ, wə maŋ sar Pepeŋa gud bə minti wə bə tapə-tepe dəərə. Kə həlgə də bay deŋ, haa bədoona gəm, a maŋ sar Pepeŋa gud bə minti a də tapə-tepe də gedraŋ. A jəə la paapa gud teŋa baŋ, kərməyiŋ a wəra haa tooto sar Pepeŋa faɗi. A gəəziŋa ha'aŋ, yə wəra maŋ sar Pepeŋa ɗaw.

¹⁵ Jəəne minti naayaw tó bə bay deŋ bəlaŋ ne minti tó buusi də kumsə toŋ, kəkəy cuuru. Kəya, seenə áŋ mo, nawrə áŋ mo gə doo-deŋ, yə wəra gə bədə-bidi də kaa neete teŋ, gud maa mo Pepeŋ mantaŋ áŋ warda haa minti áŋ jəə la kəkaɓi aduubə də kumsə áŋa.

¹⁶ Te həlgə də doo-deŋ, wəra də diri minti Pepeŋ bə seere gidriŋ hõy wəra guudi me'i mo? Paapa. Tam hulum bə doo-deŋ, wəra də dərəm minti Pepeŋ bə seere məram hõy wəra guuduma me'i mo? Paapa faɗi.

Əsə la damdi tam a jəŋ bədoona ana bə minti Pepeŋ mantənam

¹⁷ Kel kayiŋ gə tapə-tepe də kumsiŋ gəm, haa kel gə minti ten bə hətəya wəra giidə Tapiŋa keɗe'iŋ. Kel teŋ haa minti, mindi mindi mo raawə la bə əsə-isi damdi Barkaŋ a ŋəmnu du wəraŋ ana, daana bə minti wə fəlaŋ mante kə Pepeŋ, wə a bə əsə-isi bədoona anaŋ.

¹⁸ Jəəne minti Pepeŋ a mantaŋ hulum toŋ ne wəra bə *jamə-jeme tənturuŋ, wə a golde kəkəy bə hara wəra bay jeme ba. Jəəne minti Pepeŋ a mantaŋ nayto ne nuutuŋ bay jemeŋ, wə a golde kel bə jama bə gəm.

¹⁹ Tanta də jamə-jemeŋ daana nayta də bay jemeŋ haa paapa kel kəmtəŋ ba. Kəmtəŋ də kel haa humi bə kosoŋ cəərə kel gə minti Pepeŋ wəətəy.

²⁰ Mindi mindi mo əsə la damdi Pepeŋ məntunu ha'aŋ, wə a bə əsə-isi bədoona ana'iŋ.

²¹ Jəəne minti Pepeŋ a mantənam ha'aŋ, tam a kafkam, a hoye ɗiki dəm minti tam bədoona ana səm moŋ ba. Səma tam fəlaŋ kəkəy ne bə biti wəra ku kafkamaŋ, bandə la faɗi.

²² Gud maa mo, kafkam bə minti Pepeŋ məntunu wəra bə tepe də Barkaŋ, haa kafkam bə minti Barkaŋ wəra bə bədə-bidi duuru. Kə hulum bə minti Pepeŋ a məntunu, wə a paapa kafkam baŋ, wə haa kafkam kə Kristu ɗaw.

²³ Pepeŋ ayaŋ karman bə minti kir aye cəərəŋa bə məɗəŋ warda a kusru. Gud teŋa ta, aŋ a kole kusrəŋ kafkam kə kaŋ ba.

²⁴ Bədoona ana kəsaananti, mindi mindi mo jəə la bə əsə-isi tiinə Pepeŋa damdi wə a bə əsə-isi ana bə minti wə a məntunuŋ.

Kel cəərə kaa gə bay kərama, gə bay kaŋkara, daana kəram gə baya

²⁵ Ten waate hebkəna haa a kaa kə bay kəram, a kəram gə bay kaŋkar gəm. Barkaŋ paapa bə waatə-waate karman a nəənən wəra cəərəna bəy ba, səma ten əyəy kəm haa ɗiki dən faɗi. Aŋ gə nakə-neke bə mele ɗiki dəŋ cəərəna nuutu gud giidu pəsaŋ gə minti Barkaŋ jiini sarənaŋ.

²⁶ Gud kel kə gəəli bə hebkənaŋaŋ, dərəna pisiŋ haa minti mindi mo əsə la damdi wə a jəŋ ana.

²⁷ Tam jəəne də həlgəŋ, a golde kəkəy bə buusə ba. Tam jəəne bay həlgəŋ, a golde kəkəy bə de bə gəm.

²⁸ Ten waataŋ ne nuutu anaŋ, hulum doŋ həlgə neŋ, wə jəŋ paapa baymele ba. Tər terewkaŋ doŋ koŋkor neŋ, a jəŋ paapa baymele bə gəm. Səma kaa kə kəram, kəram gə kaŋkar, yə bə hale gəəli ablaw. Ten a bəlaŋ fətəŋ wəra ku haa fiti.

²⁹ Kəsaananti, ten bə waataŋa haa kənaŋ minti: koŋ wəra bə kosə-kose. Bədoona ta, də ko bə hebkənaŋ hãã ajew naŋ, hulum bə minti a jəəne də həlgəŋ, wə jəə la haa damdi wə paapa də həlgə ba ana.

³⁰ Kaa gə minti bə hageŋ jəə la damdi yə paapa bə hage ba ana. Kaa gə minti bə waaleŋ jəə la damdi yə paapa bə waale ba ana. Kaa gə minti bə gusti karaŋ jəə la damdi kaa gə minti karman paapa kəəsiya ba ana.

³¹ Kaa gə minti bə ji joŋreŋa də kar gə cəərə seŋkaŋ, yə jəə la damdi yə paapa bə ji joŋre diiri ba ana. Gud maa mo, kar gə minti bə ji hebkəna cəərə seŋkaŋa lamaŋ, yə bə ji saksaki ba.

³² Ten a bəlaŋ haa minti ɗiki dəŋ a ji bə hoyə-hoye ba. Gud maa mo, hulum bə bay həlgəŋ gole duru haa cəərə kar kə Barkaŋa təwa, wə golde haa kəkəy bə daw duruŋ faɗi.

³³ Səma hulum bə həlgəŋ gole duru haa cəərə kar gə cəərə seŋkaŋa, wə golde haa kəkəy bə de dər muruŋ gəm,

³⁴ kəya kel cuuru ɓasi. Bədoona ana gəm ha'aŋ, həlgə də bay koŋkor daana tər terewkaŋ caw, gole diri haa cəərə kar kə Barkaŋa bə ayə kusri daana ɗiki di a nuunu keɗe. Səma həlgə də koŋkor gole dərə haa cəərə kar gə cəərə seŋkaŋa, a golde haa kəkəy bə de dər gedraŋ gəm.

³⁵ Ten waate kel teŋ haa paapa bə isi wəra a kəkəy dəŋa ba, ten wəətəy haa bə kəyaŋ ɗaw. Ten bele ɗaw haa minti aŋ jəə la marya haa karman bə minti de dər Barkaŋ, daana minti aŋ jəə la saksaki gə gargə-garge suru wəra də ku tarməyaŋ soki məna.

³⁶ Jəəne minti puranul kəman yaŋ bə balə-bele tər, walka jəəne bə jəwa minti tó leŋe wəra dəərə bə anə laŋ gud bə minti kusru paapa bə de kəəsu baŋ, wə jəəne də caadə dooraŋ, wə haa ɗiki bə daw duru la, wə doorə la wəra faɗi. Kəya wə jəŋ paapa baymele ba.

³⁷ Səma jəəne minti wə ɗəkəŋ ne tó də kusru faɗi minti tó doora pəda, ɗiki toŋ faŋ da ne ku tərmuyu daŋ, hulum zugtunu guudu zogte baŋ, daana wə ɗəkəŋ ne minti tó bə nakə-neke bə ame kusru toŋ, bay dooraŋ wə jəŋ haa pisi gəm.

³⁸ Bədoona ana, hulum bə minti doŋ tər nuutuŋ ne wəra guuduŋ, wə jəŋ haa pisi. Nayto bə minti ɗiki minti tó de kə toŋ pədaŋ, toŋ jəŋ pisi dəŋaŋ naytoŋ pə ɗaw.

³⁹ Həlgə də minti gedraŋ kəm caw, kəkəy paapa cəərə bə ɗe a golde baalaŋ ba. Wə meŋ ne wəra taŋ, kəkəy cəərə bə hare bə ɗe a de koŋkor baalaŋ bə minti giidə bəlnuŋ, səma wə jəə la hulum bə doo-de.

⁴⁰ A ɗiki katəna, a əsəŋ ne je'i faɗiŋ, a sə a ji yaŋ də waale ɗaw. Haa ɗiki dən, səma wəra də dərən minti Tiirə Pepeŋ dəərən gəm.