I KOREŊTƏŊ 6 - JAA TƏMARWAŊ

Ɗe də seenem bə doo-deŋ ku kəətiŋ

¹ Jəəne minti kaa kəman koloŋ awəy də kumsi aduubə dəŋaŋ, gole diri pisi naanaanə minti yə ɗe a mante kumsi warna tiinə kaa kə bay ase Pepeŋ naŋ mo? Sə a jəməy kəətiŋ haa kaa kə Pepeŋ faɗi.

² Jəə la də dərəŋ minti ɗe a jeme kəəti də kaa gə cəərə seŋkaŋ haa kaa kə Pepeŋ. Jəəne bədoona, aŋ bə jəŋ paapa gə nakə-neke bə jeme kəəti də karmə kel wesekiŋ kəya baŋ naanaanə mo?

³ Jəə la də dərəŋ minti ɗe a jeme kəəti də *kaa kə digi kə Pepeŋ haa áŋ. Bədoona ana tə gəm, áŋ sə a ji gə nakə-neke bə jeme kəəti də kel náŋ gə hebkənaŋ bə mo?

⁴ Bə minti gom də awəy taŋ kəya awaŋ ne aduubə dəŋaŋ, aŋ ɗe a golde bə jeme kəətiŋ haa kaa gə minti paapa karman aduubə də kaa kə Tapiŋa baŋ, haa naanaanə mo?

⁵ Kəya paapa kel kə kes-kese dərəŋa bə mo? A gəəziŋa hulum paapa guudəŋa anə məna bə asə-ase kir jeme kəəti də kəsəənuŋ ba anə faɗi?

⁶ Kəya pisi tə mo minti aŋ kole kel də seenem, kəya aŋ ɗe a jeme kəəti diy haa tiinə kaa gə bay deŋ paŋ?

⁷ Daana pa, kel gə minti aŋ kultuy də kumsəŋ, ge dər minti aŋ paapa bə ɗe a kəkəy kə Pepeŋa a kuɗuŋa ba. Hulum jəŋ kel kə gul-gula ne sarəŋa, aŋ neke bə hələy anə weseka baŋ, haa səm mo? Aŋ neke bə yaake karman nəəti bə koore anə weseki bə gəm, haa səm mo?

⁸ A kəkəy bə minti aŋ bə jəəti kəsaanaŋa bədoonaŋ, koloŋ kaa kə jəəti kel kə gul-gulaŋ daana gə humti kar neeteŋ haa aŋ ɗaw!

⁹ Jəə la də dərəŋ minti kaa kə jəəti kel kə gul-gulaŋ fele ko a *Kumna kə Pepeŋa ba. Aŋ a ji tiniini də kusrəŋ ba! Kaa kə jəəti booboŋ, kaa gə minti gole kar pepe neeteŋ, kaa kə piwpiw, kaa gə minti əsti də kumsi kaŋkar,

¹⁰ kaa kə dəgaayaŋ, kaa kə həryəm-həryəm, kaa gə minti kafkam kə kumuy, kaa kə waate sam kumsi baymeleŋ, kaa kə ɓətti kar kə kaŋ, hulum anə məna gud kaa teŋa laka fele ko a Kumna kə Pepeŋa ba.

¹¹ A dayday, sərdə kaa guudəŋa a bə jəəti haa kel teŋ gəm. Səma Tiirə Pepeŋ baadənaŋ baymele nəətiŋ wəra, a kolnoŋ wəra dəra'i a nuunu daana ɗeker duru, haa gud sam Barkaŋ Yeesu Kristu.

Aŋ ayə tokɗe la a Barkaŋ də kusrəŋ keɗe

¹² Sərdə kaa aduubə dəŋa waate minti: «Kəkəy wəra cəərəna hoŋ bə ji kar keɗe.» Gəəzi, kəkəy hoŋ bə jəy, səma yə keye keɗe ba. «Kəkəy wəra cəərəna hoŋ bə ji kar keɗe», səma ten toŋ bele yaake kusrən kafkam a karman ba.

¹³ Sərdəŋ waate pa minti kar kə hameŋ gə jəə-ji haa a giidim, daana giidim gə jəə-ji haa cəərə kar kə hameŋa gəm. Bədoona gəəzi, səma Pepeŋ ɗe a ɓalke kar té ɓasiŋ yaŋ wəra hõy. Səma kusuki də áŋ bə jəə-ji haa paapa minti áŋ jəə boobo la duuru ba. Wə haa kə Barkaŋ, kumna cuuru haa Barkaŋ gəm.

¹⁴ Gud maa mo Pep bə minti haraŋ Barkaŋ náŋ wəra dədərgə adordə meŋaŋ, wə hare áŋ yaŋ wəra dədərgə adordə meŋa də səɓaki nuutuŋ gəm.

¹⁵ Jəə la də dərəŋ minti kusrəŋ haa sərdə kusrə Kristu faɗi. Ten he surdu yaŋ bə ɗe a təpu də kə həlgə də ji boobo mo? Paapa hasi!

¹⁶ Paapa də dərəŋ bə mo minti hulum bə minti təpaŋ ne də həlgə də jəəti booboŋ, yə kole wəra ɓasi keɗe hulum bə mənaŋ? Gud maa mo wəra bə jeerə-jeere giidə Kefter kə Pepeŋa minti: «Kəya yə ɓasi keɗe, yə kole haa hulum bə mənaŋ.»

¹⁷ Bədoona ana hulum bə minti təpaŋ ne də Barkaŋ, yə kole a tiiruŋa wəra məna gəm.

¹⁸ Aŋ haa giidiŋ la wəra sar jəəti bə booboŋa! Baymele nayto bə minti hulum neke bə jəw keɗe, jəw karman dər kusuki du ba. Səma hulum bə jəəti booboŋ ɓalke kusru wəra neŋneŋ keɗe haa tó də kusru gadi faɗi.

¹⁹ Ana paŋ, paapa də dərəŋ bə mo minti kusrəŋ haa kuli kə Tiiru Cetcetaŋ də minti Pepeŋ aynaŋ dəŋ, də minti hebkəna giidəŋaŋ? Kusrəŋ paapa nəəti pəda, wə máŋ kə Pepeŋ.

²⁰ Gud maa mo Pepeŋ ayaŋ karman bə minti kir aye cəərəŋa bə məɗəŋ warda. Gud teŋa ta, karman muntu muntu mo bə minti aŋ jəw də kusuki dəŋ, jəə la haa bə aye tokɗeŋ a Pepeŋ.