I KOREŊTƏŊ 5 - JAA TƏMARWAŊ

Hulum bə minti haŋ mar buruŋ wəraŋ

¹ Kaŋ bə waate wəra a koŋa keɗe minti kel kə dəglə-dəglə bə ji aduubə dəŋa. Sar dəglə taŋ kəyaŋ, koo nuutu kaa gə minti Pepeŋ paapa də diri baŋ, a wəra bayməla diri hasi ɗaw. Hulum guudəŋa haŋ mar buruŋ wəra.

² Kəya aŋ kəm bə hage sam kusrəŋa minti aŋ karman ŋaanaanə mo ɗe! A ta'a haa kel gə minti aŋ sə a laawe damdi titi falnaŋ ana ɗaw, aŋ sə a sarme hulum toŋ kəya wəra aduubə dəŋa.

³ Ten ha'aŋ, ten paapa saraŋ na gil də kusrən ba, səma dər ɗikiŋa ten saraŋ na. Hulum tó bə jəəti kel kə laŋə-leŋe teŋ kəyaŋ, ten jəmnu kəəti du ne wəra damdi ten saraŋ na ana ɗaw.

⁴ Aŋ tapə cəərəŋ la də sam Barkaŋ Yeesu daana səɓaki nuutuŋ ji yaŋ ada, ten ji yaŋ aduubə dəŋa dər ɗikiŋa gəm.

⁵ Gom də hulum toŋ kəya, aŋ kir əyu warna a *Sataŋ minti a ɓəlku kusuki du la wəra, kir minti wə seerə la wəra dər hi bə minti Barkaŋ hare daŋ.

⁶ Aŋ teke cəərə kusrəŋ apəya haa boo! Aŋ wəra gə asə-ase minti siipəŋ anə weseka fe kunti bə halɓə-halɓeŋ wəra faɗi.

⁷ Baymele bə minti damdi siipə də dayday anaŋ, aŋ haw la wəra aduubə dəŋa, kir minti aŋ jəə la bə kunti bə halɓə-halɓe bə bay siipə duruŋ ana. A gəəziŋaŋ, aŋ haa bə kunti bə bay siipə duruŋ ana ɗaw, gud bə minti yə awaŋ kormə taaməka bə *Pakiŋ wəra haa guudəŋa; kormə taaməka toŋ haa Kristu də kusru faɗi.

⁸ Gud teŋa ta, bə minti áŋ ji kəɗwəy náŋ gə Pakiŋ, áŋ a jəy də baymeleŋ daana də sərkəŋ ku tarmə áŋa ba; yə damdi mappa də siipə də dayday dərəŋ ana. Áŋ jəy la ha'aŋ də ku tarmə áŋ cetcetaŋ daana gəəziŋ damdi mappa də bay siipə dərəŋ ana.

⁹ Ten jeereneŋ giidə kefter katən naytoŋ na minti, hulum mundu mundu mo bə minti ji booboŋ, aŋ a tepe duuru ba.

¹⁰ Ten waataŋ ada na paapa sam kaa gə minti bay ase Pepeŋ ŋaanaanə mo ba. Kaa kə jəəti booboŋ, kaa kə həryəm-həryəm, kaa kə jəəti dəgaayaŋ, kaa gə minti ke awalna a kar gə minti yə guluy pepe neeteŋ, kəna cəərə seŋkaŋa haa té faɗi. Hulum waataŋ ne minti tó tepe diiri baŋ, wə kir yaake wəra haa seŋkaŋ keɗe faɗi gəm.

¹¹ Paapa bədoona ba. Ten bəlaŋ waataŋ na anə taki faɗi haa minti: hulum bə minti waate minti tó hulum bə doo-de, doloy ɗe du damdi kə kaa kə jəəti booboŋ, kaa kə həryəm-həryəm, kaa gə minti gole kar pepe neeteŋ, kaa kə waate sam kumsiŋ baymeleŋ, kaa kə ayə-aye kusri wəra a kumuy, kaa kə dəgaayaŋ anaŋ, aŋ a tepe duuru ba. Koo a hame bə soŋa, aŋ a hame duuru bə gəm.

¹² Kel də jeme bə kəəti də kaa gə minti paapa gə doo-de baŋ, teŋ paapa katən ba. Səma jeme bə kəəti də kaa gə minti a Tapi nəətiŋa, haa kaasəŋa faɗi.

¹³ Kə kaa gə minti paapa gə doo-de baŋ, Pepeŋ jəməy kəəti di yaŋ haa tó. Aŋ ha'aŋ, aŋ jəə la damdi kefter kə Pepeŋ waataŋ ana: «Aŋ sarmə hulum bə jəəti kel kə bayməlaŋ la wəra aduubə dəŋa.»