I KOREŊTƏŊ 4 - JAA TƏMARWAŊ

Kaa kə vaa-veŋ a joŋre kə Kristuŋa

¹ Kaŋ kir gole are *kaa kə vaa-ve kə Kristuŋ bə kaa kə joŋre nuutu anəkay faɗi. Are haa kaa gə minti Pepeŋ ayaŋ kasi are haa joŋre bə veɗe hel nuutu də metə-meteŋ wəra a kaŋ.

² Yə mante kasi hulum bə minti yə əynu joŋreŋ kəəsu anə ŋel məna haa minti wə jəə la ɓeti.

³ Agal katənaŋ, jəəne minti aŋ jamnan kəəti dən neŋ, kumundu ba kaa kə ceme kəəti jəmnuŋ ne haa teŋ, jən karman ba. Ana pə ɗaw ten jeme kəəti də kusrən bə gəm.

⁴ A gəəziŋaŋ, ɗiki dən paapa bə hoyona minti baymele yaŋ bə yaakə-yaake sarəna ba. Də teŋ keɗe, ten paapa bə kolə-kole ɗeker gud ɗiki toŋa kəm bə pa. Hulum bə minti jəman kəəti dən, haa Barkaŋ.

⁵ Gud teŋa ta, aŋ a jeme kəəti də hulum wəra ajew-ajew ba jamə ba, aŋ məə hare kə Barkaŋ la kəm. Bi a ke gud kar gə minti gə ŋoyə-ŋoye wəra dər tilməŋa daana bi a veɗe ɗiki bə ku tarmə kaŋ wəra haa tó. A ko toŋa, mindi mindi mo fele aŋke nuutu yaŋ kasi Pepeŋa də aŋar də joŋre bə minti wə a juunuŋ.

⁶ Kəsaananti, ten a vaɗənaŋ gud kel warda kandaŋ də Apolo daana də kusrən. Ten a goldoŋ də kəkəy toŋ haa minti aŋ hatə kel ha'iŋ la minti: aŋ jəə la haa kel gə minti gə jeerə-jeereŋ təwa faɗi, aŋ a raawe cəərə teŋ ba. Kəya hulum neke bə he cəərə kusru apəya də kumsu kəman daana naytoŋ gole duru paapa karman ba ŋaanaanə moŋ pəda gəm.

⁷ Tam gəm taŋ, mindi waatənam minti tam dəŋaŋ kumsum mo? Karman bə minti dər nəmtiŋ adaŋ, haa maa mo? Jəəne minti yə aynam dəm haa aye keɗeŋ, tam bə he cəərə kusrum apəya damdi yə aynam dəm paapa aye ba anaŋ, haa səm mo?

⁸ Hebkəna aŋ bə ɗiki minti aŋ wəra gə seepə-seepe ɗaw! Aŋ wəra kaa kə hurma a tiiruŋa! Aŋ wəra gə topə-tope kusrəŋ kəkamna bay are kəm ceki ɗaw! Aŋ a jəə la kəkamna gəəziŋ, a haa pisi ta, are a sə a ve kuŋa ada vaa, aŋ a sə a hame abay taŋ ta!

⁹ Golə dərəna kəna ɗaw minti are kaa kə vaa-ve kə Kristuŋ, Pepeŋ əsəŋ are adordə kaŋa anə ne'-ne'i. Are haa damdi kaa gə minti kəətiŋ gə doo-de diiri minti əwəy la wəraŋ ana. Yə jəŋ are damdi kaa gə minti yə əwəy wəra haa tiinə kaŋa anə tiktiki gil ana; tiinə *kaa kə digi kə Pepeŋa daana tiinə kaa kəsarkaŋaŋ gəm.

¹⁰ Are teŋ damdi kaa gə tiniini gud Kristu ana, səma aŋ teŋ, gud tapi nəətiŋa də Kristuŋ, aŋ ɗiki haa minti aŋ gə asə-ase. Are teŋ golə dər kaŋa kaa kə bay səɓaki, səma aŋ teŋ ɗiki minti aŋ də səɓaki. Aŋ teŋ, kaŋ təkaŋ cəərəŋ apəya, are teŋ gole dər kaŋa paapa karman bə ɗaw.

¹¹ Hãã hebkəna, are haa ku taya daana kinkin. Are gəlaana, are bə ŋafte də leteŋ, kuli naare paapa gəm,

¹² are bə geye də joŋre bə minti are bə jəwa də kasi areŋ faɗi. Bə minti kaŋ sarte areŋ, are gay naareŋ ciiri haa pisiŋ. Bə minti yə lese areŋ, are həlu haa hale təwa.

¹³ Bə minti yə waate ku baymeleŋ cəərə areŋ, are hərəy kel haa də keɗpe pisiŋ. Hãã dayna are haa damdi soti bə minti yə hərwu warna bə ɗe a ve cəərə dibidiŋ na ana, damdi karman bə boobo bə daŋə-deŋe kumsuŋ wəra keɗe ana faɗi.

Kaanə Koreŋtəŋ haa karmə Pol gə minti wə bələy ablaw

¹⁴ Jəəne minti ten jeereŋ a nəənəŋ bədoonaŋ, haa paapa bə koloŋ kese ba, haa bə gaŋ kosnoŋ gud bə minti aŋ karman gə minti ten bəlaŋ ablaw.

¹⁵ Gud maa mo, jəəne nuutu minti kaa gə minti tiinəŋa bə maləŋa a kəkəy kə Kristuŋa guɓ-guɓi hor ɗaw, bəraŋ haa saksaki məna. Dər ɗe nəətiŋa gud Yeesu Kristuŋ, ten koloŋ haa bəraŋ gud bə minti waatənaŋ *Kel pəsaŋ kəmarwaŋ wəra haa ten.

¹⁶ Bədoona ana ta, ten bə jəŋ kamkama, aŋ haa la haa ɗe nin.

¹⁷ Gud teŋa ta, ten gaanaŋ Timote na haa naŋ. Wə haa kormon gud kel kə Barkaŋa, wə ɓeti gəm, daana ten bəlu ablaw. Wə hare bə gaŋ kosnoŋa yaŋ cəərə ɗe dəna minti ten bə ɗewa gud Kristu naanaanə moŋ. Wə hataŋ dəŋ yaŋ bədoona dege'-dege'i damdi ten bə hətu giidə Tapiŋa wəra neŋneŋ keɗe anaŋ.

¹⁸ Kaŋ ɗəkəŋ haa minti ten hare hõy gerdeŋ na pəda ŋaanaanə moŋ, sirdiŋ əsəŋ bə ji kusri máŋ haa minti té karman gadi faɗi.

¹⁹ Səma Barkaŋ doŋ haa neŋ, ten yaŋ nuutu bə ɗe na cəlam gerdeŋ na. Kaa té gə minti ji kusri minti té karman, ten ɗe yaŋ a əsəy minti yə naakte haa kuy təwa mo, kumundu ba joŋre neete yaŋ nuutu bə nakə-neke mo?

²⁰ Gud maa mo, *Kumna kə Pepeŋ haa paapa cəərə naakte bə ku təwa ba, wə ji joŋreŋ haa də kel gə nakə-nekeŋ.

²¹ Bə minti ten ɗe gerdeŋ naŋ, ten haa na cəərəŋ na haa gədəwa mo, ten ɗee na də beleŋ daana kel sããyiŋ mo? Aŋ bele muntu mo, aŋ ŋamə la.