I KOREŊTƏŊ 3 - JAA TƏMARWAŊ

Joŋre kə kaa gə minti bə waate Kel pəsaŋ kəmarwaŋa wəraŋ

¹ A gəəziŋa kəsaananti, ten nəkaŋ bə waataŋ kel ateŋa paapa damdi ten wəətəy a kaa gə minti də Tiirə Pepeŋ ana ba. Ten waatənaŋ dəŋ haa damdi a kaa gə minti a kusukiŋa ana faɗi, damdi a kəmar koncoŋ a de bə gud Kristuŋa ana gəm.

² Gud teŋa ta, ten aynaŋ paapa so ba, ten aynaŋ haa kaw, gud bə minti aŋ a sə a neke bə təmu ba. Koo nuutu hãã hebkəna, aŋ paapa gə nakə-neke ba

³ gud bə minti aŋ kəm a kusukiŋa. Giidiŋ bə yaakte cəərə kumsəŋa daana aŋ a gəbaŋa də kumsəŋ. Aŋ bə ji bədoona tə gəm, aŋ haa a kusukiŋa daana aŋ ji kel haa damdi kaa kəsarkaŋ ana derra faɗi.

⁴ Bə minti mindi mindi mo guudəŋa waate minti: «Ten toŋ gud Polaŋ», nayto minti: «Ten toŋ gud Apoloŋ», aŋ ji haa damdi kaa kəsarkaŋ ana derra faɗi bə mo?

⁵ A kuɗiŋa, Apolo haa mindi mo, Pol haa mindi mo? Are haa kaa kə joŋre gə minti Pepeŋ jəŋ joŋreŋ də are bə məlaŋ a deŋa təwa. Mindi mindi mo ji haa joŋre bə minti Pepeŋ a əynu du kəəsuŋ.

⁶ Ten toŋ gaŋ haa dər karman adawra, Apolo kəənu kan, səma hulum bə minti dəynu wardaŋ, haa Pepeŋ.

⁷ Hulum bə minti gaŋ dər karman adawraŋ, hulum bə minti kəənu kan, teŋ paapa karman kəm ba. Pep bə minti dəynu wardaŋ, karman haa tó.

⁸ Hulum bə minti gaŋ dər karman adawraŋ, hulum bə minti kəənu kan, bə daŋə-deŋe kumsu paapa guudi ba. Pepeŋ bə ɗe a aye werkeŋ a mindi mindi mo guudi haa də aŋar də joŋre bə minti wə a juunuŋ.

⁹ Gud maa mo are haa a joŋre kə Pepeŋa keɗe. Aŋ haa damdi aka də minti Pepeŋ bə kəɗaŋ ana, damdi kuli bə minti wə bə hursuŋ ana gəm.

¹⁰ Pepeŋ aynan ayeŋ cəərə joŋre kəmana; ten haa damdi hulum bə hel a hərsi bə kuliŋa ana. Bədoona ana ta, ten gaŋ gud kuliŋ. Bə hebkənaŋ, raawaŋ də hərsi duŋ haa kaa gaalaŋ. Səma, mindi mindi mo jəə la pisi də hel də minti wə raawe bə hərsi kuliŋa dəərəŋ.

¹¹ Hulum neke bə ge gud kuli baalaŋ pəda, gud bə minti Pepeŋ wəra bə gaa-ge gud kuliŋ, haa Yeesu Kristu.

¹² Mindi mo neke bə raawe bə ɗampe kuli toŋ na də kooso bə gusi bə awəy-awəy, də kooso bə ji soloy, də pərki bə fele gəəli-gəəliŋ, də kəbaŋ, də təəsu, kumundu ba də kaɗəkaw cəərə gud kuli tó bə gaa-geŋa.

¹³ Səma Hi bə Kəəti ɗe yaŋ a ge gud joŋre kə mindi mindi mo wəra anə pəɗaki. Gud maa mo, hi toŋ bə ji haa damdi cəwa ana, yə ge joŋre kə mindi mindi mo yaŋ dərə bə ase pisi duŋ wəra.

¹⁴ Jəəne minti kuli bə ɗampə-ɗampe kə hulum kuŋ wəra baŋ, wə fele werke yaŋ guudu.

¹⁵ Jəəne minti kuli kə hulum kuŋ ne wəraŋ, wə fele werke guudu bə gəm. Tó də kusru seere yaŋ wəra, səma wə ji yaŋ damdi hulum bə minti dəŋaŋ wəra ku cəwa ana.

¹⁶ Aŋ gə asə-ase bə mo minti aŋ haa kuli kə Pepeŋ gadiŋ daana Tiiruŋ də əsə-isi giidəŋaŋ?

¹⁷ Hulum bə minti ɓalkaŋ kuli kə Pepeŋ ne wəraŋ, Pepeŋ bəsu yaŋ wəra gəm, gud maa mo kuli nuutuŋ wəra dəra'i a nuunu. Kuli toŋ, haa aŋ də kusrəŋ faɗi.

¹⁸ Hulum a leŋe kusru ba: hulum jəəne guudəŋa bə ɗiki minti tó haa bə asə-ase damdi kaa kəsarkaŋ bə ɗiki anaŋ, wə kolə la də tiniini diri ɗaw kir minti wə jəə la hulum bə ase bə gəəzə-gəəzi.

¹⁹ Gud maa mo, karman bə minti kaa kəsarkaŋ bə gulu damdi aseŋ anaŋ, wə gole dər Pepeŋa karman bə tiniini. Haa damdi wəra bə jeerə-jeere giidə Kefter kə Pepeŋa ana minti: «Tiwki də minti kaa kə asə-aseŋ jəərəŋ, Pepeŋ tupuy haa dəərə toki.»

²⁰ Wəra bə jeerə-jeere pa minti: «Ɗiki kə kaa kə asə-aseŋ wəra də dər Barkaŋ, wəra də duru minti wə karman bə boobo.»

²¹ Bədoona ana ta, hulum a neke bə he cəərə kusru apəya də kumsu hulum kisirki ba. Gud maa mo, kar keɗe haa nəəti:

²² jəəne nuutu kəna ten Pol, Apolo, Piyer, seŋkaŋ keɗe, ji caw, meŋ, ko bə hebkənaŋ, ko bə ajew naŋ; yə keɗe nəəti.

²³ Səma aŋ teŋ, aŋ kə Kristu daana Kristu kə Pepeŋ.