I KOREŊTƏŊ 2 - JAA TƏMARWAŊ

Hel də minti Pol waate kel dəərə a kaanə Koreŋtəŋ

¹ Kəsaananti, bə minti ten ɗeŋ gerdeŋ na a waate kel wəra cəərə hel də metə-mete kə Pep də minti wə vaɗnə wəraŋ, ten waataŋ kel cəərə paapa də hel də waate bə kel gə minti de dər kaŋ ablaw ba, paapa də ase kə kaa kəsarkaŋ bə gəm.

² Gud maa mo, karman bə minti ten haŋ ɗikiŋ cuuru bə ɗe a wəətu wəra a nəənəŋ, haa Yeesu Kristu təwa, daŋgeŋ haa cəərə me du a kəbaŋ gə largaŋaŋ faɗi.

³ Gud teŋa ta, bə minti ten a jəŋ adəwaldəŋaŋ, ten jəŋ sarəŋa cawa damdi hulum bə bay səɓaki ana, ten nuutu ba ana caw də walka bə miiri.

⁴ Bə minti ten hatnaŋ daana ten waatənaŋ kel wəraŋ, ten jiiniy paapa də hel də minti de dər kaa kəsarkaŋ bə koloŋ ɗiki dəŋ ba. Doŋ gud kel wəra haa səɓaki kə Tiirə Pepeŋ.

⁵ Bədoona ana, de nəətiŋ paapa bə əsə-isi cəərə ase kə kaa kəsarkaŋa ba, wə bə əsə-isi haa cəərə səɓaki kə Pepeŋa faɗi.

Ase bə minti toŋ kə Pepeŋ

⁶ Ana ɗaw paŋ, are yaŋ bə hate aseŋa a kaa kə doo-de gə minti gə jeŋə-jeŋe a tiiruŋaŋ. Ase toŋ haa paapa ase kə kaa gə cəərə seŋkaŋ ba. Wə paapa ase kə kar gə səɓaki gə minti kəkamna cəərə seŋkaŋa gə minti tewe wəraŋ, bə gəm.

⁷ Ase bə minti are bə wəətu səmu ha'aŋ, haa ase kə Pepeŋ. A dayday, kaŋ a əsnu ba gud bə minti Pepeŋ a kəm bay gaw guudu wəra. Wə a ɗəmpunu warda hãã ajew də mele bə gud koŋ da minti are falə tokɗeŋ la duuru gud ase toŋa.

⁸ Kar gə səɓaki gə minti kəkamna cəərə seŋkaŋaŋ uskunu guudu ba. Yə a usku guudu laŋ, yə sə a ɓele Barkaŋ bobloŋ wəra a kəbaŋ gə largaŋa ba.

⁹ Kel gə minti gə jeerə-jeere giidə Kefter kə Pepeŋa waate haa cuuru faɗi minti: «Karman bə minti hulum əsnu də duru hõy baŋ, karman bə minti kosnə hulum uskunu hõy baŋ, karman bə minti hulum a əsəŋ hõy bə ɗiki cuuru baŋ, Pepeŋ ɗampaŋ wəra bə aye a kaa gə minti bəluŋ, haa karman toŋ faɗi.»

¹⁰ Pepeŋ vəɗnu wəra a áŋ haa də Tiiruŋ. Gud maa mo, Tiiruŋ də nakə-neke bə gole dər kar wəra keɗe, koo nuutu ɗiki bə ku tarmə Pepeŋ.

¹¹ Agal kə hulum kisirkiŋa, hulum neke bə ase giidə kumsu ba, say haa tó də kusru. Kə Pepeŋ haa bədoona gəm, hulum neke bə əsu giidu ba, say haa Tiiruŋ.

¹² Áŋ teŋ, áŋ fəlaŋ paapa ɗiki kə kaa gə cəərə seŋkaŋ ba, áŋ fəlaŋ náŋ haa Tiiru kə Pepeŋ. Bədoona ta, áŋ gə nakə-neke bə əski gud kar gə minti Pepeŋ əynəy a áŋ gud pisi bə minti wə juunu sar kaŋa.

¹³ Are waate sam kar teŋ wəra ha'aŋ, paapa də kel gə minti kaa kəsarkaŋ hətəy də ase neeteŋ ba. Are wəətəy səməy haa də kel gə minti Tiirə Pepeŋ hətəy a areŋ. Bədoona ana ta, are tope bəlam də kar gə minti a tiiruŋaŋ haa də kel gə minti bəŋ ku Tiiruŋ daŋ gəm.

¹⁴ Hulum əsəŋ ne cəərə ase nuutuŋa təwaŋ, wə neke bə de haa də karman bə minti bəŋ sar Tiirə Pepeŋ daŋ ba. Karman toŋ gole wəra duru haa karman bə tiniini faɗi. Jəəne minti Tiirə Pepeŋ paapa duuru baŋ, wə neke bə usku guudu ba, wə neke bə ase disi duŋ bə gəm.

¹⁵ Hulum bə minti Tiirə Pepeŋ duuruŋ neke bə gole dər kar keɗe bə əsəy disi diŋ, səma kaa kaayaŋ paapa gə nakə-neke bə jəmu kəəti du ba.

¹⁶ Gud maa mo wəra bə jeerə-jeere giidə Kefter kə Pepeŋa minti: «Mindi asaŋ ɗiki kə Barkaŋ mo? Mindi bə nakə-neke bə kəyu də kel kə waateŋ mo?» Səma áŋ kaayaŋ, ɗiki náŋ haa ɗiki kə Kristuŋ faɗi.