I KOREŊTƏŊ 16 - JAA TƏMARWAŊ

Kaŋ taare soloy bə keye kaa kə Tapi gə Zeruzalem

¹ Hebkəna ten waataŋ haa cəərə taare bə soloy bə keye kaa kə Pep gə Zeruzalema. Aŋ kir ji haa damdi ten waataŋ kaa kə Tapi gə giidə seŋka də Galatiŋ ana gəm.

² Dər Dəmasiŋa saksaki, mindi mindi mo gaa soloy la bəy də aŋar də səɓaki də minti wə a fəlaŋ, kir minti dər bi dəna ateŋa aŋ a hare bə mele guudəŋa bə taare kəm taare pəda.

³ Bə minti ten tuluŋ ne gerdeŋ naŋ, ten ɗe a ve kaa gə minti aŋ a ŋəmnəy ne bə ɗe də soloy Zeruzalem. Yə ji yaŋ də kefter bə veɗe kusri wəra kəəsi.

⁴ Jəəne karman pisi minti ten ɗee la də kusrən gəm, are koore yaŋ də kumsə are keɗe.

Gəryi bə minti Pol də caadə jəw

⁵ Ten bele ɗe giidə seŋka də Masedəwan. Ten jəŋ də ne də ada jəŋ, ten raawe yaŋ gerdeŋ na.

⁶ Ten hiti yaŋ gerdeŋa maki, kumundu ba ten ji ko bə kosõõyeŋ wəra dəərəŋ ɗaw. Bədoona ana aŋ kəyan yaŋ cəərə gəryi bə ko muntu muntu mo bə minti ten bə ɗe yaŋ adaŋ.

⁷ Gud maa mo ten paapa bə balə-bele minti ten bəə la a ŋefe dəərəŋ sə kampa anəkay a kəkəy bə raawe ba. Ten bə ɗəkə-ɗiki minti, Barkaŋ doŋ haa neŋ, áŋ isi yaŋ kəm də kumsə áŋ.

⁸ Bə hebkənaŋ, ten kəm kəna Efesi hãã warna dər kəɗwəy gə Pantəkotiŋ na.

⁹ Gud maa mo, kəkəy boblo bəŋəŋ wəra tiinəna kəna bə ji joŋre kə Pepeŋ, koo kaa kə acukur nin jəəne nuutu kəna ablaw ɗaw.

¹⁰ Jəəne minti Timote bə bəŋ neŋ, aŋ jəə la kir minti wə jəə la fənay aduubə dəŋa gud maa mo wə ji joŋreŋ haa a Barkaŋ damdi ten bə jəwa ha'aŋ ana gəm.

¹¹ Bədoona ana hulum a gulu baahãy ba. Aŋ kəyu la ku gəryi nuutuŋa kir minti wə jəw la kəkaɓi ɗaw hãã bə minti wə bəə la a tulun wəra kənaŋ, gud bə minti ten bə məwa daana kəsaanə áŋ gə doo-deŋ.

¹² Kə seenə áŋ Apoloŋ, ten gəyaŋ wəra geye bə jəw kamkama minti wə tapə la gud kəsaanə áŋ gə doo-deŋa bə ɗe gerdeŋ. Səma wə paapa də ɗiki bə ɗe toŋ hebkəna na ba anə ceki. Wə ɗe yaŋ na hõy máŋ haa də ko bə minti duru fəlaŋ neŋ.

Kel kə Pol gə adoroŋ

¹³ Aŋ jəə la wəra gə gunə-guni, aŋ jəə la gə əsə-isi ŋəŋ a deŋa, aŋ əntə giidiŋ la, aŋ jəə la də səɓaki a kəkəy kə Pepeŋa.

¹⁴ Aŋ jəə karman muntu muntu la mo haa də beleŋ ada.

¹⁵ Kəsaananti, aŋ gə asə-ase anə Estefanasi də gə girduŋ, yə haa kaa gə minti gaŋ ku de bə gud Kristuŋ giidə seŋka də Akayaŋ. Yə wəra gə ayə-aye kusri ablaw bə ji joŋreŋa a kaa kə Pepeŋ gəm. Bədoona ana ten bə jəŋ kamkama minti

¹⁶ aŋ humə kosoŋ la cəərə gom də kaa teŋa daana cəərə kaa gə minti bə ji joŋreŋa də səɓaki diiriŋ gəm.

¹⁷ Estefanasi, Fortonatusi daana Akayusi Koreŋtə da, yə tuluŋ sarəna wəra kəna, ten jəŋ də waale. Yə koloŋ sarəna haa bə kesel aŋ faɗi.

¹⁸ Gud maa mo yə malnan ɗiki dən ne damdi yə a maltənaŋ ɗiki dəŋ ana gəm. Aŋ kir ase disi də gom də kaa teŋ kəya.

Mirkiŋ

¹⁹ Kaa kə Tapiŋ dəra'-dəra'i keɗe giidə seŋka də Aziŋaŋ bə mirkiŋ na. Akilasi, Pirsila, də kaa kə Tapi gə minti bə tapte giidə kuli neeteŋa bə mirkiŋ na pis-pisi də sam Barkaŋ bə minti təpaŋ áŋ keɗeŋ.

²⁰ Kəsaanə áŋ gə doo-de gə minti kənaŋ keɗe bə mirkiŋ na. Aŋ mirkə kumsəŋ gə doo-deŋ la wəra anə təfaɗ-təfaɗi aduubə də kumsəŋa.

²¹ Mirki katən kay kənaŋ ten jiirunu na haa ten də kaasən faɗi.

²² Hulum bə minti paapa bə bele Barkaŋa baŋ, Pepeŋ gaw guɗbusi la wəra! Maranata! Haa minti Barkaŋ naareŋ, bəəda!

²³ Pisi kə Barkaŋ Yeesu jəə la dəərəŋ.

²⁴ Ten bəlaŋ keɗe gud tepe náŋa də Yeesu Kristu.