I KOREŊTƏŊ 15 - JAA TƏMARWAŊ

Hare də Kristu wəra dədərgə adordə meŋa

¹ Bə hebkənaŋ kəsaananti, ten bele ɗəkəŋ cəərəŋ cəərə *Kel pəsaŋ kəmarwaŋ gə minti ten a waatənaŋ di wəraŋ, aŋ duuniy daana aŋ hebkəna gə əsə-isi diri ŋəŋ.

² Seereŋ wəra haa té, jəəne minti aŋ gə doo-de diiri a kəəsi gə minti ten a waatənaŋ dəŋ wəra ana'iŋ. Aŋ jəŋ bə ji bədoona baŋ, de nəətiŋ kole wəra karman bə boobo.

³ Hate pis-pisi bə daŋə-deŋe kumsu bə minti ten a fəlnu kəm ten də kusrən, ten jognoŋ dəŋ wəra. Kel teŋ haa minti: Kristu meŋ wəra gud baymele náŋa damdi wəra bə jeerə-jeere giidə Kefter kə Pepeŋaŋ ana.

⁴ Yə gəənu a tələŋkə, dər hi bə soopeŋa wə haraŋ wəra dədərgə adordə meŋa damdi wəra bə jeerə-jeere giidə Kefter kə Pepeŋaŋ ana.

⁵ Wə vəɗaŋ kusru wəra a Piyer, adoro wə vəɗnu wəra a kaayaŋ gə gud *kaa kə vaa-ve hor ciiri ɓasiŋ.

⁶ Adoro pa, wə vəɗnu wəra a kəsaanə áŋ gə doo-de dəŋaŋ kəs-kəsi wiiɗiw, yə əsnu keɗe haa də ko bə məna. Sirdi máŋ wəra gə mee-me, daŋge diŋ kəm dayna lam.

⁷ Adoro paŋ, wə vəɗaŋ kusru wəra a Zaki, a kaa kə vaa-veŋ neŋneŋ keɗe gəm.

⁸ Adordə kaayaŋa keɗeŋ, wə vəɗaŋ kusru wəra a nəənən gəm, ten bə minti bə beebe bə waa-we haɓakiŋ anaŋ.

⁹ Hulum bə gaa-ge bə kerpə-kerpe bə gud kaa kə vaa-veŋ, haa ten faɗi. A gəəziŋaŋ, ten paapa bə nakə-neke minti yə mantan la hulum bə gaa-ge ba, gud bə minti ten lastaŋ kaa kə Tapi kə Pepeŋ.

¹⁰ Səma Pepeŋ jəŋ pisi nuutuŋ sarəna, ten koloŋ hulum bə minti aŋ bə əsu hebkəna haa sə teŋ. Pisi bə minti wə juunu sarənaŋ ɓalkaŋ wəra boobo ba, ten jəŋ joŋre duuru ablaw dəŋaŋ kaa kə vaa-ve kaayaŋ ɗaw. Səma jəŋ joŋre toŋ haa paapa ten ba; pisi bə minti Pepeŋ juunu sarəna bə ɗe dəərən bə jəwa haa tó.

¹¹ Bədoona ana, jəəne nuutu kəna ten kumundu ba kaayaŋ gə vaa-veŋ, are waate haa Kel pəsaŋ kəmarwaŋ gə mənaŋ, kel té gə minti aŋ doŋ guudiŋ gəm.

Kaa kə mee-meŋ hare wəra dədərgə

¹² Áŋ bə waate wəra minti Kristu haraŋ wəra dədərgə adordə meŋa. Bə jəŋ naanaanə minti sərdəŋ aduubə dəŋa bə waate minti hare bə dədərgə wəra adordə meŋa paapaŋ mo?

¹³ A jəə la bədoona gəəziŋ, Kristu haraŋ wəra dədərgə adordə meŋa bə gəm.

¹⁴ Ana pa, Kristu a harə la wəra dədərgə adordə meŋa baŋ, kel gə minti are bə wəətiya wəraŋ, a haa kel kə bay guudi, aŋ doŋ guudi haa boobo faɗi gəm.

¹⁵ Kel gaalaŋ yaŋ pa minti: jəəne minti kaŋ hare wəra dədərgə adordə meŋa baŋ, are koloŋ kəmnə də kəkəy gə ŋetə-ŋete kel, gud bə minti are ŋeŋ kel sar Pepeŋa a kəkəy bə minti are waataŋ wəra minti wə haraŋ Kristu wəra dədərgə adordə meŋa, anaaŋa wə hərnu wəra baŋ.

¹⁶ Jəəne minti kaa kə mee-meŋ hare wəra dədərgə baŋ, Kristu haraŋ wəra dədərgə bə gəm.

¹⁷ Jəəne minti Kristu haraŋ wəra dədərgə adordə meŋa baŋ, de nəətiŋ haa damdi soone ana, kəya aŋ kəm haa a kaasəŋa dər baymele nəətiŋa.

¹⁸ Kel teŋ ge dər pa minti, kaa kə mee-me gə doo-de gə tapə-tepe də Kristuŋ warna gə basə-bese bə faɗnə-faɗna gəm.

¹⁹ Jəəne minti ɗiki bə minti áŋ məlnu cəərə Kristuŋ keye áŋ haa cəərə ji də áŋa hebkəna lam kəna təwaŋ, áŋ haa bə kaa gə minti kaŋ kir laawe guudi dəŋaŋ kumsiŋ neŋneŋ keɗe ana ɗaw.

²⁰ Səma paapa bədoona ana ba, Kristu haraŋ wəra dədərgə adordə meŋa gəəzə-gəəzi. Gaŋ ku hare bə dədərgəŋ haa tó, bə ge dər wəra minti kaa kə mee-meŋ hare yaŋ wəra dədərgə adordə meŋa gəm.

²¹ Gud maa mo meŋ tuluŋ cəərə seŋkaŋa haa gud huluma məna tə kəm, hare bə dədərgə wəra adordə meŋa bəŋ haa gud huluma məna gəm.

²² Kaŋ keɗe me haa gud tepe neeteŋa də Adam. Bədoona ana gəm, kaŋ keɗe hare wəra dədərgə adordə meŋa haa gud tepe neeteŋa də Kristu.

²³ Səma hare bə dədərgə toŋ ji haa də kel du gə minti a wəra gə kaa-ke bəy-bəy. Ajew anə faɗi haa hulum bə minti gəənu kuŋ, Kristu. Adoro kəya, də hi bə hare nuutu daŋ, hare wəra haa kaa nuutuŋ.

²⁴ Adordə teŋa kəya haa tewe bə koŋ faɗi. Kristu ɓalkete anə kəkamnaŋ, kar kə səɓak-səɓakiŋ, daana kar kə abay-abay wəra keɗe. Kəya wə hare kumnaŋ kasi Pep Abaŋa faɗi.

²⁵ Kəkəy ji yaŋ kəm cuuru minti kumnaŋ jəə la kəm kəəsu hãã bə minti Pepeŋ kolə kaa kə acukur kə tó Kristu la wəra keɗe kəm kar gə minti wə təytəy wəra kuuri.

²⁶ Meŋ, haa hulum bə acukur bə adoro bə minti Pepeŋ təwu wəraŋ.

²⁷ Gud maa mo wəra bə jeerə-jeere giidə Kefter kə Pepeŋa minti: «Pepeŋ koloŋ kar wəra keɗe kar gə minti wə təytəy wəra kuuri.» Səma bə minti jeereŋ waate minti «keɗeŋ», aŋ asə la wəra kəkər faɗi minti Pepeŋ paapa ada ba gud bə minti koloŋ kar wəra keɗe bə humi kosoŋa cuuru haa tó.

²⁸ Bə minti Pepeŋ kulnu kar ne wəra keɗe kar gə minti wə təytəy wəra kuuriŋ, tó Kristu kurmuyuŋ, hare cuuru yaŋ adoro tiinə tó Pep bə minti a kulnu kar wəra keɗe bə humi kosoŋa cuuruŋ. Kəya Pepeŋ ji yaŋ máŋ kumnaŋ cəərə kara neŋneŋ keɗe faɗi.

²⁹ Aŋ ɗəkə la kəm cəərə kel kə kaa gə minti yə jiitiy batem a koɗ kaa kə meetə-meeteŋaŋ. Kaa teŋ golde haa maa duuru mo? Jəəne minti kaŋ hare wəra dədərgə adordə meŋa baŋ, yə bə jəəti batem a kuɗi minti a niini haa səm mo?

³⁰ Are gəm, hare bə dədərgə jəəne paapaŋ, are yaakte kusrə are saksaki bə ŋafte də kel gə minti kaŋ fele meŋ adaŋ haa səm mo?

³¹ Kəsaananti, a hiŋa keɗe meŋ bəy kampərana kənaŋ tó faɗi. Kel gə minti ten bə waataŋ diŋ yə gəəzi damdi cəərən də haa-he apəya guudəŋa gud tepe náŋa də Yeesu Kristu gəəzi ana gəm.

³² Kel gə minti kaŋ jəənən diiri giidə seŋka də Efesiŋaŋ haa damdi kuuri bə minti kaŋ kuuri kar kə waraŋ duuruŋ ana. Jəəne minti ten hale kel haa gud ɗiki bə kusukiŋa təwa faɗiŋ, ten fele maa ada mo? Jəəne minti kaŋ hare wəra dədərgə adordə meŋa baŋ, áŋ jəə la damdi kaŋ bə waate wəraŋ ana: «Áŋ hamə la, áŋ saa la nuutu ta, gud maa mo dibiini yaakaŋ cəərə áŋa haa meŋ!»

³³ Aŋ a ji tiniini də kusrəŋ ba. Aŋ asə la minti, dayga də ɓalke kumuy məna.

³⁴ Aŋ harə la a ɗiki pisiŋa, aŋ a ji baymeleŋ pəda! Gud maa mo sərdəŋ guudəŋa saksaki kəm paapa bə tepe də Pepeŋ ba. Kese sə a doŋ gud kel té gə minti ten a waatənaŋ dəŋ.

Kusrə kaa gə minti yə hare wəra dədərgə duuru adordə meŋaŋ

³⁵ Ɗalba hulum də le ku minti: kaŋ hare wəra dədərgə adordə meŋa naanaanə hare mo? Yə haraŋ ne wəraŋ, kusri naanaanə mo?

³⁶ Ɗiki dəm paapa! Gosə gole la kəm mo, dər karman bə minti tam tupuŋ mumri wəra kəm ajew də minti wə deye wardaŋ.

³⁷ Bə minti tam jo'eŋ, tam ge a tələŋkəŋa haa dər kaasaw mo, dər karman baalaŋ mo, bay ciiri təwa faɗi. Tam ge ada paapa bəəbu diŋ ba.

³⁸ Adoro kəyaŋ, dər karman bə tupə-tupi toŋ deye kewkew duŋ warda damdi giidə Pepeŋ a bəlnuŋ ana. Bədoona ana ta, kewkew də karman muntu muntu mo tepe haa də duru də tupə-tupiŋ.

³⁹ Kusuki də kar hal-hal keɗe. Kə kaa kəsarkaŋ, kə bege bə kəmpuru waaɗe-waaɗe'iŋ, kə kaskoŋ, kə askaŋ wəra hal-hal keɗe.

⁴⁰ Kar yaŋ apəya, kar yaŋ cəərə seŋkaŋa gəm, səma mele bə siriŋ hal-hal keɗe.

⁴¹ Welɗe bə cəwaŋ, bə kitir daana bə seskaŋ wəra hal-hal keɗe gəm. Aŋ goloŋ neŋ, welɗe də seskaŋ aduubə də kumsə ji hal-hal ɗaw.

⁴² Cəərə hare bə dədərgəŋa wəra adordə meŋaŋ haa bədoona gəm. Bə minti aŋ ge titi də hulum a tələŋkə damdi aŋ tupi dər kar anaŋ, wə bə cimi wəra. Wə haraŋ ne wəra dədərgə adordə meŋaŋ, wə neke bə me pəda hasi.

⁴³ Bə minti aŋ gaw a tələŋkəŋ, mele paapa suru pəda, səɓaki paapa anə ɓe'i pəda gəm. Bə minti wə haraŋ ne wəra dədərgəŋ, wə də mele daana də səɓaki ablaw hasi.

⁴⁴ Titi də hulum bə minti aŋ gaara a tələŋkəŋ, haa karman bə kar kə cəərə seŋka ana faɗi. Bə minti wə haraŋ ne wəra dədərgəŋ, wə kole máŋ haa karman bə minti Tiiru Cetcetaŋ əynu dədərgəŋ giidu.

⁴⁵ Gud maa mo wəra bə jeerə-jeere giidə Kefter kə Pepeŋa minti: Pepeŋ jəŋ hulum bə ajew, Adam, karman bə minti caw dədərgə. Kə Adam bə adoroŋ, Kristu, wə haa karman bə minti a tiiruŋa bə aye dədərgəŋ a kaŋ.

⁴⁶ Kusrə áŋ bə minti Tiiruŋ əyuŋ, haa paapa kusrə áŋ bə minti a sar áŋa bə ajew ba. Sar áŋa faɗi kəm haa kusrə áŋ bə minti cəərə seŋkaŋa kənaŋ. Nayto bə minti a tiiruŋaŋ bi kəm a kulu adoro haa kole.

⁴⁷ Hulum bə ajew, toŋ kə seŋkaŋ gud bə minti Pepeŋ juunu haa də seŋkaŋ. Hulum bə adoroŋ, toŋ bəŋ apəy da.

⁴⁸ Kaa gə cəərə seŋkaŋ haŋ haa hulum bə minti Pepeŋ a juunu də seŋkaŋ. Kaayaŋ gə minti teŋ kə ko bə apəyaŋ, bə he hulum bə minti bəŋ apəy daŋ yaŋ gəm.

⁴⁹ Damdi áŋ gə haa-he hulum bə minti Pepeŋ juunu də seŋkaŋ anaŋ, áŋ bə he hulum bə minti bəŋ apəy daŋ yaŋ gəm.

⁵⁰ Bədoona ana kəsaananti, karman bə minti ten waataŋ diŋ haa minti: kusrə áŋ bə minti kəm də kusukiŋ daana də kor suru bədoona anəkay, neke bə mele kəmpuru a *Kumna kə Pepeŋ na ba. Karman bə minti me wəra daana bə minti me wəra baŋ, neke bə tepe a ko bə məna bə gəm.

⁵¹ Ten waataŋ haa kənaŋ kel gə minti a gə metə-meteŋ: áŋ me wəra keɗe ba, səma áŋ ɗe a ji yaŋ wəra gə kolə-kole hal keɗe

⁵² hebkən-hebkəna anəkay, də dər də le ŋefaŋ təwa, də bə minti atoltom kə Pep də adoroŋ ufuŋ neŋ. Gud maa mo, atoltom taŋ ufuŋ neŋ, kaa gə minti wəra gə mee-meŋ hare wəra dədərgə də kusri bə minti me hõy pədaŋ faɗi. Áŋ kaayaŋ kəyaŋ, áŋ kole yaŋ wəra hal damdi té ana faɗi gəm.

⁵³ Gud maa mo kusrə hulum tó bə minti me daana cimi wəraŋ kir kole wəra kusru bə minti me daana cimi wəra pədaŋ anə ceki faɗi.

⁵⁴ Bə minti kusrə áŋ toŋ koloŋ ne wəra bədoona taŋ, jeere bə minti giidə Kefter kə Pepeŋa doŋ ku wəra haa de faɗi minti: «Meŋ pa pəda, bulum wəra bə pəə-pi cuuru!

⁵⁵ Meŋ, bulum nəmti ane gəm tə mo? Meŋ, səɓaki nəmti də awe kaŋ ane pə mo?»

⁵⁶ Meŋ fele səɓaki nuutu də awe kaŋ haa gud ji bə baymeleŋa. Baymeleŋ fele səɓaki nuutuŋ haa gud *ku gili kə Pepeŋa gəm.

⁵⁷ Áŋ tokɗə Pep bə minti koloŋ áŋ bulum la gud kar gə minti Barkaŋ náŋ Yeesu Kristu jiiniy gud áŋaŋ!

⁵⁸ Gud teŋa ta, aŋ kəsaanan gə minti giidən bəlaŋ, aŋ əsə la ŋəŋ, aŋ a yaake kusrəŋ bə daɓye ba. Aŋ jəə joŋre kə Barkaŋ la pisi jəə saksaki gud bə minti aŋ wəra gə asə-ase minti, joŋre bə minti aŋ jəw gud tepe nəətiŋa də Barkaŋ bese wəra boobo ba.