I KOREŊTƏŊ 13 - JAA TƏMARWAŊ

Beleŋ

¹ Jəə la nuutu kəna minti ten waatə ku kaŋ la wəra keɗe ɗaw, koo nayto bə minti *kaa kə digi kə Pepeŋ wəətuŋ, jəəne minti beleŋ paapa giidəna baŋ, ten wəra haa damdi dəmal kəman mo, kooso kəman mo, bə le bə boobo bə naakte kosoŋ bə ana anəkay faɗi.

² Jəə la nuutu kəna minti aye bə joge ku Pepeŋ sarəna, ten bə asə-ase gud kel gə minti le kaŋ bay ase guudi wəra keɗe'i, ten bə nakə-neke cəərə ase bə kara keɗe, ten bə doo-de kir waate pərki minti wə zee la, wə ze wəraŋ ɗaw, jəəne minti beleŋ paapa giidəna baŋ, ten paapa kəm karman ba saksaki.

³ Jəə la nuutu kəna minti ten ɓarsə bege katən la warna keɗe a kaa kə caacaŋ, ten yaakə kusrən la bə ki wəra haa ki ɗaw, beleŋ jəəne paapa giidəna baŋ, kel teŋ kəyan a ko kəmana ba anə ceki.

⁴ Hulum bə minti bele kaŋ, wə mi ku kela, wə sããya, giidu hətu cəərə huluma ba, wə ufi ku ba, wə he cəərə kusru apəya bə gəm.

⁵ Wə ji kel kə doɓə-doɓe ba, wə gole duru cəərə kusru təwa ba, wə kole waŋ cəlam ba, wə ke agonogi də kel giidu bə gəm.

⁶ Wə ji waale gud kel kə gul-gulaŋa ba, wə ji waale nuutuŋ haa gud kel ɗekeriŋa.

⁷ Wə sete kel suru keɗe, dər kela keɗe wə raawe də deŋ saksaki, ɗiki du bə malə-mele saksaki, wə mi ku gəəli muntu muntu mo keɗe.

⁸ Beleŋ tewe hõy ba anə ceki. Joge bə ku Pepeŋ wəraŋ toŋ bə jəəti pəda. Waate bə ku karman bə minti kaŋ uskunu hõy baŋ bə tewe yaŋ wəra. Aste bə kar bə jəəti pəda gəm,

⁹ gud maa mo ase náŋ kəm paapa bə doo-de ku wəra ba. Joge bə ku Pep bə minti áŋ bə jugtuŋ, kəm paapa bə doo-de ku wəra bə gəm.

¹⁰ Səma Pepeŋ vəɗaŋ gud kel gə doo-de kuy ne wəra a áŋ, kaayaŋ gə kuy gə bay deŋ bə jəəti pəda.

¹¹ Bə minti ten a kəm konceŋ, ten a bə waate kela haa bə beebe konce ana, ɗiki dən daana iski katən bə gud kel a haa bə kə beebe konceŋ ana faɗi gəm. Bə minti ten koloŋ wəra bobloŋ, joŋre kə kəmar koncoŋ zeŋ wəra sarəna.

¹² Bə hebkənaŋ, áŋ gole kar haa damdi áŋ bə guluya giidə kotrom bubunbubuni ana. Də hi tó bə ateŋaŋ, áŋ əsəy yaŋ wəra də dər áŋ faɗi. Bə hebkənaŋ ase katən kəm haa bə bay de kuŋ. Də hi tó bə ateŋaŋ, ase bə kar katən de ku yaŋ wəra, damdi Pepeŋ bə asna wəra hebkəna keɗe ana gəm.

¹³ Hebkəna ha'aŋ, kar soope té kayiŋ ji yaŋ saksaki: deŋ, ɗiki bə malə-mele bə cəərə Pepeŋ daana beleŋ. Səma guudiya keɗe, dəŋnəy haa beleŋ.