I KOREŊTƏŊ 12 - JAA TƏMARWAŊ

Aye kə Tiiru Cetcetaŋ

¹ Hebkəna kəsaananti, ten bele waataŋ cəərə aye kə Tiiru Cetcetaŋa kir minti aŋ a ji gə lentə-lente cəərə kel duŋa ba.

² Aŋ wəra gə asə-ase minti, bə minti aŋ a jəŋ kəm kaa gə minti Pepeŋ paapa də diri baŋ, aŋ kaŋ awalna a kar gə minti kaŋ guluy pepe neeteŋ, gə minti paapa gə nakə-neke bə waate kel baŋ. Kar teŋ taɗnaŋ guudi haa də gidiirə kəkəy anə dəra'-dəra'i.

³ Haa gud teŋa ta minti ten waataŋ haa kənaŋ: Hulum bə minti waate kel də səɓaki kə Tiirə Pepeŋ neke bə waate minti «Pepeŋ gaa guɗbusi la a Yeesu!», ba. Wə jəəne paapa də Tiiru Cetcetaŋ baŋ, wə neke bə waate minti «Yeesu haa Barkaŋ» bə gəm.

⁴ Gidiirə aye bə minti a tiiruŋaŋ yaŋ gil, səma əyu keɗe haa Tiiru Cetcetaŋ tá də mənaŋ.

⁵ Gidiirə joŋre bə ji a Barkaŋ yaŋ gil, səma áŋ jəw keɗe haa a Barkaŋ bə mənaŋ.

⁶ Gidiirə hel də ji joŋreŋ yaŋ gil, səma haa Pep bə mənaŋ minti kole mindi mindi mo wəra bə nakə-neke bə ji tó bə minti wə a əynu duŋ keɗe.

⁷ Tiiru Cetcetaŋ ge dər minti tá giidəŋa də aye bə minti a əynu a mindi mindi mo bə ji joŋre duuru bə keye kumsəŋ aduubə də kumsəŋa.

⁸ Tiiru Cetcetaŋ aye a hulum haa waate bə kel kə asə-aseŋ, a aye a hulum kel gə minti gud kar kə Pepeŋ gə asə-ase wəra ada ablaw.

⁹ Tiiru Cetcetaŋ tá də mənaŋ aye a hulum baalaŋ haa de bə səɓak-səɓakiŋ, a baalaŋ haa seerte bə kaa kə ɗemeŋ wəraŋ.

¹⁰ A aye a hulum haa jəəti bə miɗiŋ, a baalaŋ haa joge bə ku Pepeŋ wəra, a baalaŋ pa haa ɓarse bə dər tiiru wəra minti kəya kə Pepeŋ, kəya kə Nərtitiŋ. A aye a baalaŋ haa waate bə ku karman bə minti kaŋ uskunu hõy baŋ, a baalaŋ haa joge bə ku karman toŋ wəraŋ.

¹¹ Tiiru də mənaŋ aye aye toŋ gila keɗe haa tá. A əyu a mindi mindi mo hal-hal damdi giidə a bəlaŋ ana faɗi.

Kusrə hulum məna, kar du ablaw

¹² Aŋ asaŋ ne, kusrə hulum məna, kar du ablaw. Kar du jəəne nuutu ablaw, yə ɗe a tepe tapi haa kusrə hulum məna. Kə Kristuŋ haa bədoona ana gəm.

¹³ Gud maa mo áŋ keɗe, kaanə Ziwifi, paapa gə Ziwifi ba, kafkam, paapa kafkam ba, yə jəŋ batem a áŋ haa də Tiiru Cetcetaŋ tá də mənaŋ bə kole áŋ wəra kusrə hulum bə məna gəm. Pepeŋ ayaŋ Tiiru tá də məna ku tarmə áŋa keɗe.

¹⁴ Kusrə hulum paapa bə jəə-ji də karman du məna faɗi ba, səma də kar du gə ablaw keɗe.

¹⁵ Aŋ goloŋ ne bə ha'aŋ ana minti kampar hulum waate minti té paapa kasi baŋa, té paapa kusru pədaŋ, yə bə ji paapa kusru ba cəərə teŋa mo?

¹⁶ Kosnə hulum waataŋ ne minti tó paapa dər baŋa, tó paapa kusru pədaŋ, wə bə ji paapa kusru ba cəərə teŋa mo?

¹⁷ Kusrə hulum keɗe a jəə la bə jəə-ji haa dər, wə sə a jeɓre də maa mo? Wə a jəə la keɗe haa kosoŋ, wə sə a ase siisi də kar də maa mo?

¹⁸ Səma Pepeŋ maltaŋ kar də hulum ada ta'-ta'i hal-hal haa damdi giidu bəlaŋ ana.

¹⁹ Kusrə hulum a jəə la kəna karman məna gud kar du gə suruŋaŋ, yə məntu yaŋ kusrə hulum pə mo?

²⁰ A gəəziŋa, kar də hulum ablaw, səma yə ɗe a tepe haa bə jəw kusru məna.

²¹ Haa gud teŋa ta minti dər neke bə waate kasiŋ minti tá paapa də caadi ba ŋaanaanə moŋ ba. Cəŋ neke bə waate kampaŋ minti tá paapa də caadi ba ŋaanaanə moŋ bə gəm.

²² Kel bese paapa cəərə teŋa təwa bə pə ɗaw. Gud maa mo, kar gə sar kusrə áŋ gə minti áŋ bə ɗiki diiri minti yə paapa gə nakə-neke karman baŋ, kuɗiŋ ada anə kaŋkaŋ faɗi.

²³ Kar gə kusrə áŋ gə minti áŋ hage diiri baahãy, áŋ jəy guudi haa dəŋaŋ kumsi wəra keɗe ɗaw. Kaayaŋ gə minti áŋ ji kese bə wəətəy səməy, áŋ humi kosoŋ daŋgeŋ haa cəərə teŋa gəm.

²⁴ Kaayaŋ gə bay ji keseŋ paapa də caadə humi bə kosoŋ toŋ ba. Pepeŋ maltaŋ kar də kusrə áŋ haa də kəkəy di kir minti kaayaŋ gə minti humi bə kosoŋ sə a ji ciiri baŋ, fəlu la dəŋaŋ kaayaŋ ɗaw.

²⁵ Wə jəŋ bədoona haa minti kar du a ceme dər kumsi wəra ba daana minti karman du muntu muntu mo jəə la bə ɗiki cəərə kumsuŋa.

²⁶ Karman də hulum jəəne məna bə leseŋ, kar du kaayaŋ keɗe haa dər leseŋa duuru faɗi gəm. Jəəne minti karman du məna fəlaŋ aŋkeŋ, kar du kaayaŋ keɗe dər waaleŋa guudu gəm.

²⁷ Aŋ haa kusrə Kristu. Mindi mindi mo guudəŋa haa damdi kar du ana faɗi.

²⁸ Bədoona ana, Pepeŋ əsəŋ kaŋ giidə Tapiŋa haa bə kəyaŋ ana: kaa gə minti ku ajewaŋ, haa *kaa kə vaa-veŋ. Ciiri kəya kaa gə minti jugu ku wəraŋ, gə soopeŋ kəyaŋ kaa kə hate kel nuutuŋ a kaŋ. Wə əstəŋ kaa gaalaŋ ada pa: haa kaayaŋ gə minti jəəti miɗiŋ, gə minti seerte kaa kə ɗemeŋ wəraŋ, gə minti kayte kaŋ, gə minti ɗe də joŋreŋ də kaa kə Tapiŋ, daana gə minti waate ku karman bə minti kaŋ uskunu hõy baŋ gəm.

²⁹ Yə keɗe kaa kə vaa-ve mo, kaa kə joge ku Pepeŋ wəra mo, kaa kə hate kel nuutuŋ a kaŋ mo, kaa kə nakə-neke bə jəəti miɗiŋ mo,

³⁰ kaa kə seerte kaa kə ɗeme wəra mo, kaa kə waate ku karman bə minti kaŋ uskunu hõy ba mo, kumundu ba kaa kə joge ku karman toŋ wəraŋ mo? Paapa anə ceki faɗi!

³¹ Aŋ goldə la daŋgeŋ minti Pepeŋ ayaŋ la haa aye bə daŋə-deŋe kumsuŋ faɗi. Səma ten gaŋ dərəŋ yaŋ hebkəna cəərə kəkəy bə minti tó dəŋaŋ kumsu wəra keɗe'iŋ.