I KOREŊTƏŊ 11 - JAA TƏMARWAŊ

¹ Aŋ haa la haa ɗe nin, damdi ten bə haa-he kə Kristuŋ ana gəm.

Hulum koŋkor də həlgəŋ giidə kuli bə Tapiŋa

² Ten bə tokɗoŋa gud bə minti aŋ saksaki bə ɗəkti cəərə kel nina keɗe, daana minti aŋ bə ɗe gud hateŋa damdi ten a jognoŋ dəŋ wəraŋ ana.

³ Ten bele minti aŋ asə kel teŋ la ha'aŋ: cəərə hulum mundu mundu mo haa Kristu, cəərə həlgəŋa haa gedraŋ, cəərə Kristu haa Pepeŋ gəm.

⁴ Hulum mundu mundu mo bə minti toose kumundu ba joge ku Pepeŋ wəra də karman bə baarə-baare cuuruŋ, ge dər minti wə paapa bə humi kosoŋa cəərə hulum bə minti cuuruŋ ba.

⁵ Kə həlgə də minti toose kumundu ba joge ku Pepeŋ wəra bay karman bə baarə-baare cəərəŋ, ge dər haa minti a paapa bə humi kosoŋa cəərə hulum bə minti cəərəŋ ba. Gud maa mo a haa anə derra damdi həlgə də cəərə də caa-ce tukluka də minti gole kaŋ keseŋ ana.

⁶ Jəəne minti həlgəŋ bele baare karman cəərə baŋ, a cawə cəərə la wəra gəm ta. Həlgə də minti cəərə wəra də cawə-cewe kumundu ba də caa-ceŋ gole kese faɗi. Jəəne bədoonaŋ, a baarə karman la cəərə.

⁷ Hulum koŋkor toŋ paapa kir baare karman cuuru ba, gud bə minti Pepeŋ juunu haa minti wə jəə la bə tó ana daana wə haa mele kə toŋ. Kə həlgəŋ ha'aŋ, a haa mele kə hulum koŋkor gəm.

⁸ Gud maa mo, Pepeŋ jəŋ hulum koŋkor paapa də karman bə minti wə puunu sar həlgəŋ da ba; wə jəŋ həlgəŋ haa də karman bə minti wə puunu sar hulum koŋkor da ɗaw.

⁹ Wə jəŋ hulum koŋkor paapa gud həlgəŋa ba; wə jəŋ həlgəŋ gud hulum koŋkora ɗaw.

¹⁰ Haa gud teŋa ta minti həlgəŋ kir ji də karman cəərə bə baarə-baare bə ge dər cəərə abay naataŋa gud humi bə kosoŋ bə cəərə gedraŋa. A ji bədoona haa kas *kaa kə digi kə Pepeŋ.

¹¹ Də teŋ keɗe, áŋ gə minti gə tapə-tepe də Barkaŋ, wəra də dər áŋ minti həlgəŋ ji bay hulum koŋkor ba, hulum ji bay həlgəŋ bə gəm.

¹² Gud maa mo, gəəzi Pepeŋ jəŋ həlgəŋ haa də karman bə minti wə puunu sar hulum koŋkora, səma bə hebkənaŋ, wə we warda haa giidə həlgəŋ da gəm. Kel ɗeŋ a hare harə, jiiniy ɓasi keɗe haa Pepeŋ.

¹³ Golə dər kel teŋ la kəya haa aŋ: həlgə də minti toose Pepeŋ bay karman cəərə bə baarə-baareŋ, haa pisi mo?

¹⁴ Də kəkəy bə minti Pepeŋ jəŋ kar, aŋ wəra gə asə-ase minti hulum koŋkor bə minti yaakaŋ kaaɗe gə cuuru ne bə si səgəmgəm, wə gole kese.

¹⁵ Səma həlgə də minti yaakaŋ kaaɗe gə cəərə ne bə si səgəmgəm, haa mele gud bə minti Pepeŋ ayna kaaɗe gə siŋ haa damdi kar kə baarte gə cəŋ ana.

¹⁶ Hulum kəman gargaŋ ne də awəy cəərə kel teŋa kəyaŋ, wə asə la faɗi minti to'osi naareŋ haa taŋ faɗi, kaa kə Tapi kə Pep kaayaŋ bə ji haa bədoona gəm.

Hame kə Barkaŋ

¹⁷ Cəərə kel gə minti ten hataŋ dəŋ hebkənaŋ, ten paapa kir tokɗoŋ guudiya ba, gud bə minti tapte nəətiŋ paapa bə kəyaŋa bə si a deŋa ba, wə bə jəŋa baymele haa ji ɗaw.

¹⁸ Ajew anə faɗiŋ, ten bə əskiti minti, aŋ kaa kə Tapiŋ təpaŋ cəərəŋ neŋ, ɓarse bə dər kalte aduubə dəŋa. Ten bə doo-de haa minti gəəziŋ yaŋ nuutu ada.

¹⁹ Ɓarse bə dər bese bay kalte aduubə dəŋa ba, kir minti aŋ asə kaayaŋ gə aduubə dəŋ gə minti əsəŋ ŋəŋ ku kel té gə guluy kuɗiŋa la.

²⁰ Səma a tapte bə cə nəətiŋaŋ, aŋ jəəne nuutu bə ɗiki minti aŋ hame haa hame kə Barkaŋ, aŋ ji haa paapa tó ba faɗi.

²¹ Gud maa mo, bə minti aŋ ɗəlaŋ hame neŋ, mindi mindi mo bandə-bande bə hame hame nuutuŋa. Kəya sərdəŋ ada də tay, kaayaŋ warna gə markə-marke ɗaw.

²² Jəəne minti aŋ bi haa cəərə kar kə hameŋa daana gə seŋa təwaŋ, aŋ sə a ji kel teŋ gerdeŋ da faɗi bə mo? Kumundu ba aŋ bele hage də Tapi kə Pepeŋ baahãy mo, daana aŋ bele kole kese a kaa gə minti karman paapa kəəsi baŋ haa kole mo? A ko toŋa ta'aŋ, ten waataŋ la haa minti harmə mo? Ten tokɗoŋ la mo? Cəərə kel teŋa kəya, ten tokɗoŋ ba anə ceki faɗi!

²³ Gud maa mo hate bə minti ten fəlnu kasi Barkaŋa daana ten jognoŋ dəŋ, haa kənaŋ: də duugŋ də minti yə bə ji akolokiŋ yaŋ cuuruŋ, Barkaŋ Yeesu haŋ mappaŋ kəəsu,

²⁴ wə jəŋ suuse a Pepeŋ cəərə jəə kəya, wə ɗoklona dərə bə waate minti: «Kəya haa kusrən bə minti ten əyu guudəŋaŋ. Aŋ jəətə kel teŋ la kəya bə ɗəkti cəərəŋ cəərəna.»

²⁵ Adordə hameŋa wə haŋ kopi bə seŋ, wə jəŋ duuru bədoona gəm bə waate minti: «Karman bə giidə kopi toŋ kəya ge dər haa cəərə *jaa təmarwa də minti Pepeŋ bə doora yaŋ dəərəŋ də kor dən. Saksaki bə minti aŋ bə sete karman bə giidu yaŋ, aŋ jəətə kel teŋ la kəya bə ɗəkti cəərəŋ cəərəna.»

²⁶ Gud maa mo, saksaki bə minti aŋ bə hame mappaŋ daana bə se karman bə giidə kopi toŋ yaŋ, aŋ bə waate kaŋa wəra cəərə me də Barkaŋa. Aŋ jəətə la bədoona hãã bə minti wə hare daŋ.

²⁷ Gud teŋa ta, hulum bə minti hame mappaŋ daana se karman bə giidə kopiŋ paapa də kəkəy bə humi bə kosoŋ cəərə Barkaŋa baŋ, kəətiŋ bə doo-de duuru gud bə minti wə hagaŋ də kusrə Barkaŋ daana kor du baahãy.

²⁸ Bədoona ana, mindi mindi mo golə kusru la wəra kəm pisi. Kel jəəne paapaŋ, wə hamə mappa daana wə saa karman bə giidə kopiŋ la nuutu ta.

²⁹ Gud maa mo, hulum bə minti hamaŋ ne daana saŋ ne bay ɗiki ada minti kar teŋ ge dər cəərə kusrə Barkaŋa gadi faɗiŋ, doŋ kusru də kəətiŋ haa tó də kusru a kəkəy bə hameŋa daana bə seŋa.

³⁰ Haa gud teŋa minti kaa kə ɗemeŋ daana kaa kə dagə-degeŋ yaŋ aduubə dəŋa gil faɗiŋ, sərdə kaa meeteŋ wəra gəm.

³¹ Jəəne minti áŋ goloŋ kusrə áŋ ne wəra áŋ də kusrə áŋ, kəəti kə Pepeŋ sə a ji cəərə áŋa ba.

³² Səma Barkaŋ jəŋ daŋgay də áŋ neŋ, haa bə hare ku áŋ a kəkəya kir minti kəəti nuutuŋ a ɗe a humi áŋ keɗe də kaa gə cəərə seŋkaŋ ba.

³³ Bədoona ana ta kəsaananti, bə minti aŋ təpaŋ ne bə hame hame kə Barkaŋaŋ, aŋ məə kumsəŋ la bə həmuŋ.

³⁴ Hulum jəəne guudəŋa minti tay a bə ɗəmu paapa ba ga'i baŋ, wə sə a hame da girdu da kəm kir minti tapi nəətiŋ a kole karman bə minti ge kəəti kə Pepeŋ bə doŋa ba. Cəərə kel kaayaŋaŋ, ten ɗe a təwtəy yaŋ warna bə minti ten tuluŋ ne gerdeŋ naŋ.