I KOREŊTƏŊ 10 - JAA TƏMARWAŊ

Pol ŋere kel də kaanə Israyel giidə fulaŋ

¹ Kəsaananti, ten bele minti cəərəŋ harə la bə ɗiki cəərə kel gə minti jəŋ kəmoomo də áŋ a kəkəy bə minti Moyisi bə ɗe diiriŋ. Aŋolooroŋ gulnuy ciiri, yə cakɗaŋ kan kəmtəŋ gə minti yə məntəy kan kəələŋ haa té keɗe gəm.

² Bədoona ana bə minti yə gud aŋolooroŋa daana yə cakɗaŋ kan kəmtəŋ wardaŋ, yə koloŋ máŋ wəra keɗe gə jəə-ji batem gud tepe neeteŋa də *Moyisi.

³ Yə hamaŋ hame bə minti bəŋ kasi Pepeŋ daŋ

⁴ daana yə saŋ kan gə minti Pepeŋ əynəy diŋ té keɗe gəm. Kan teŋ ãyaŋ warda sar pərki kəman bə minti Pepeŋ a əynəy diŋ, bə minti bə zeede guudi gəm. Pərki toŋ a haa Kristu də kusru faɗi.

⁵ Də teŋ keɗe, ablaw diŋ jəŋ haa kel gə minti doŋ dər Pepeŋ baŋ. Gud teŋa ta, titi di yaakaŋ warda lam a ful daŋ tá keɗe.

⁶ Kel teŋ jəŋ gila keɗe haa minti áŋ asə la ada daana bə ge kosnə áŋ minti giidə áŋ a hate áŋ cəərə ji bə baymele sar neete bə minti giidiy hətnəy cuuruŋ ba.

⁷ Aŋ a ke awalna a kar gə minti kaŋ guluy pepe neete damdi sərdə kaa guudi a kəənəy diŋ ana ba. Gud maa mo kel wəra gə jeerə-jeere giidə Kefter kə Pepeŋa minti: «Kaŋ əsəŋ, yə hamaŋ, yə saŋ, adoro yə pətəŋ, yə boomoŋ boome bə baymel-baymele.»

⁸ Áŋ a yaake kusrə áŋ a ji bə booboŋ damdi sirdi yaakaŋ kusri a nuunuŋ ana ba. Kaa gə minti jəŋ bədoonaŋ, dər je məna meŋ guudi guɓ-guɓi hor-hor ɓasi cuuru soope.

⁹ Áŋ a gole koɗ Barkaŋ damdi sirdiŋ gulnu kuɗu ana ba. Yə jəŋ bədoona tə pə moŋ, hənjiŋ hitniy, yə meŋ anə kap-kapi.

¹⁰ Aŋ a ŋorme kuŋ cəərə Pepeŋa damdi sirdiŋ ŋormoŋ kuy cuuru ana ba. Kəya *hulum bə digi kə Pep bə minti wə gəənu bə awte kaŋ, əwnəy wəra keɗe.

¹¹ Kel teŋ jəŋ siri gila keɗe haa bə ge kosnə kaŋ minti yə a ji bədoona ba. Yə gə jeerə-jeere giidə Kefter kə Pepeŋa gəm haa minti áŋ hatə la ada. Gud maa mo áŋ hebkəna dər ko bə minti wəra máŋ a tawte duŋa.

¹² Gud teŋa ta, hulum bə doo-de mundu mundu mo ɗəkəŋ ne minti tó yaŋ bə əsə-isi ŋəŋ a deŋaŋ, wə amə kusru la pisi ta kir minti wə a awe ba.

¹³ Ke ku bə minti tuluŋ cəərəŋaŋ, wə saksaki haa bə muntu muntu mo bə minti tulti cəərə kaŋa keɗeŋ ana. Pepeŋ wə ɓeti, wə yaake ke ku bə kəlaŋ səɓaki dəŋ bə tuli cəərəŋa ba. Bə minti ke ku tuluŋ ne cəərəŋaŋ, Pepeŋ ayaŋ səɓaki də garge tiinu daana hel də minti aŋ cakɗe wəra dəərəŋ.

Aŋ a tepe də kəwal ba

¹⁴ Gud teŋa ta, aŋ kəsaanan gə minti giidən bəlaŋ, aŋ daŋə la wəra də tara sar ke bə awalnaŋa a kar gə minti kaŋ guluy pepe neeteŋ.

¹⁵ Ten waataŋ bədoona gud bə minti aŋ haa kaa kə ɗikiŋ. Kel gə minti ten waatənaŋ dəŋ, aŋ guluy diri la máŋ aŋ də kusrəŋ.

¹⁶ Aŋ ɗəkə la cəərə kooso bə se bə minti aŋ ji joŋreŋ duuru a hame kə Barkaŋa bə minti aŋ ji suuse a Pepeŋ cuuruŋ. Bə minti áŋ bə se adaŋ, wə kole áŋ gə nakə-neke bə tepe də kumsə áŋ keɗe bə tepe áŋ də Kristu gud kor du. Mappa də minti áŋ ɗoklə dərə bə hameŋ, a kole áŋ gə nakə-neke bə tepe də kumsə áŋ bə tepe áŋ də kusrə Kristu gəm.

¹⁷ Áŋ gə minti hamaŋ, áŋ ablaw, səma a məna. Kel teŋ ge dər áŋ minti áŋ wəra gə tapə-tepe də kumsə áŋ keɗe bə kole kusrə hulum məna faɗi.

¹⁸ Aŋ golə la cəərə kaanə *Israyela. *Kaa kə keere gə minti hame kusuki bə minti yə keereŋ Pepeŋ duuruŋ, wəra gə tapə-tepe duuru gud bə minti, *ko bə jəəti keereŋ nuutu.

¹⁹ Ten waate haa minti harmə mo? Kusuki bə minti yə keere kar gə minti kaŋ guluy pepe neeteŋ duuruŋ dəŋaŋ kumsuŋ mo? Kumundu ba kar teŋ, yaŋ ada na karman kəman mo?

²⁰ Paapa anə ceki! Ten waate haa minti, kaa gə minti Pepeŋ paapa də diri baŋ, ji keereŋ haa a kəwal, paapa a Pepeŋ ba. Ten paapa bə balə-bele minti aŋ jəə la gə tapə-tepe də kəwal ba.

²¹ Aŋ se a kooso bə se bə minti Barkaŋ əyuŋ, kəya aŋ hare a se a nayto kə kəwala paŋ, kəkəy paapa cəərəŋa ba. Aŋ hame hame kə Barkaŋ, aŋ hare a hame kə kəwal paŋ, kəkəy paapa cəərəŋa bə gəm.

²² Aŋ bele ɗoote tarmə Barkaŋ haa nuutu anə ɗoota mo? Aŋ ɗiki haa minti áŋ dəŋu də səɓaki mo?

Aŋ jəə la keɗe haa karman bə minti Pepeŋ falə aŋke la guuduŋ

²³ Sərdəŋ waate minti «Kəkəy wəra cəərə áŋa bə ji kar keɗe.» Gəəzi, səma yə keɗe paapa pəsaŋ gə jiŋ ba. «Kəkəy wəra cəərə áŋa bə ji kar keɗe», səma yə keɗe keye áŋ bə si a deŋa bə gəm.

²⁴ Mindi mindi mo guudəŋa jəə la haa karman bə minti keye kumsu kaayaŋ yaŋ; wə a gole duru cəərə kusru təwa ba.

²⁵ Kusuki bə minti aŋ fəlu ku alumaŋa keɗeŋ, aŋ həmu la bay ɗiki bə hoyoŋa minti aŋ məntu guudu la me'i ba.

²⁶ Gud maa mo kel wəra gə jeerə-jeere giidə Kefter kə Pepeŋa minti: «Seŋkaŋ də kar gə giidəŋ keɗe, yə kə Barkaŋ.»

²⁷ Jəəne minti hulum bə bay de kəman mantənaŋ ne girdu na bə ɗe a hameŋ, kel teŋ doonoŋ dərəŋ neŋ, kar gə minti yə ɗe a ayaŋ dəŋ gə hameŋ keɗeŋ, aŋ a ji də ɗiki bə hoyoŋa minti aŋ məntəy guudi la me'i ba, aŋ hamə la faɗi.

²⁸ Səma, hulum waatənaŋ ne minti: «Kusuki toŋ kəya, yə a keereŋ duuruŋ», aŋ a həmu pəda gud hulum bə minti gaanaŋ kosnoŋ bədoona, daana gud ɗiki bə hoyoŋa.

²⁹ Ten waataŋ minti «ɗiki bə hoyeŋ» haa paapa nəətiŋ ba, haa kə hulum bə minti gaanaŋ kosnoŋ. Səma hulum ɗele waate minti kəkəy cəərə tó bə ji kar keɗe, tó bə yəəku gud ɗiki bə hoye kə hulum kəmana haa səm mo?

³⁰ Jəəne minti karman bə minti tó həmu tó wəra bə jəə-ji suuse a Pepeŋ cuuruŋ, hulum bə waate ku baymele cəərə tó gud karman bə minti tó həmnu bə jəə-ji suuseŋ a Pepeŋ, haa səm pə mo?

³¹ Bədoona ana, aŋ hamaŋ ne haa hame, aŋ saŋ ne haa se, karman muntu muntu mo bə minti aŋ jəw keɗe, aŋ jəw la haa minti Pepeŋ falə tokɗeŋ la guudu.

³² Ɗe dəŋ jəə la kir minti wə a ge hulum bə awe dər baymeleŋ ba; koo hulum bə Ziwifi, paapa bə Ziwifi ba, kumundu ba kaa gə minti a Tapi kə Pepeŋaŋ.

³³ Aŋ jəə la bə ten ana: kar gə minti ten jəy keɗeŋ, ten bə ji wəra anə keɗe-keɗe minti yə doo giidə mindi mindi la mo keɗe. Ten golde paapa karman bə cəərə kusrən təwa ba, ten golde haa karman bə minti ji yaŋ ɗəwa a kaa kə ablaw kir minti yə falə seereŋ la.