I KOREŊTƏŊ 1 - JAA TƏMARWAŊ

Mirkiŋ

¹ Jeere kefter toŋ haa ten Pol, ten bə minti Pepeŋ mantənan gud bele bə giiduŋa minti ten kolə la *hulum bə gaa-ge kə Kristu Yeesuŋ. Are təpaŋ bə jiiru də seenə áŋ Sosten.

² Ten gəənu na haa a aŋ kaa kə Tapi gə giidə vil də Koreŋtəŋ, gə minti koloŋ kaa nuutu gud tapi nəətiŋa də Kristu Yeesuŋ. Wə mantənaŋ minti ɗe dəŋ jəə la wəra *cetceti. Kaa kaayaŋ keɗe'i gə ko muntu muntu mo gə minti mante sam Barkaŋ náŋ Yeesu Kristuŋ, wə məntənəy haa bədoona ana gəm. Wə haa Barkaŋ neeteŋ damdi wə Barkaŋ náŋ ana gəm.

³ Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa!

Pol ji suuse a Pepeŋ gud kel də kaanə Koreŋtəŋa

⁴ Ten saksaki bə ji suuse a Pepeŋ gud kel dəŋa cəərə pisi bə minti wə juunu sarəŋa gud tapi nəətiŋa də Kristu Yeesuŋ.

⁵ Gud maa mo, gud tapi nəətiŋa də Yeesu Kristuŋ, Pepeŋ aynaŋ gidiirə ayeŋ wəra keɗe; daŋgeŋ cəərə waate bə kela daana cəərə ase bə kara.

⁶ Yə bədoona ana gud bə minti, kel gə minti are wəətənəy wəra cəərə Kristuŋ, aŋ gə doo-de diiri wəra anə kaŋkaŋ.

⁷ Gud teŋa ta, aŋ gə falə-fele gidiirə aye bə minti a tiiruŋa wəra keɗe, a kəkəy bə minti aŋ bə mi hi bə minti Barkaŋ náŋ Yeesu Kristu bə pi duru yaŋ duruŋ.

⁸ Tó də kusru bə əsəŋ yaŋ ŋəŋ hãã a hi bə adoroŋaŋ kir minti dər hi kə Barkaŋ náŋ Yeesu Kristuŋaŋ, aŋ jəə la kaa kə bay kel gə maltə-malte sarəŋaŋ.

⁹ Pep bə minti mantənaŋ minti aŋ jəə la gə tapə-tepe də Kurmuyu Barkaŋ náŋ Yeesu Kristuŋ, wə ɓeti.

Kaa kə Tapi gə Koreŋtəŋ ceme diri wəra

¹⁰ Kəsaananti, ten bə jəŋ kamkama də sam Barkaŋ náŋ Yeesu Kristu minti ceme bə dər a ji aduubə dəŋa ba, kuŋ jəə la məna. Aŋ jəə la wəra gə tapə-tepe pis-pisi bə golde haa karman bə məna daana bə ɗiki haa ɗiki bə mənaŋ gəm.

¹¹ Kəsaananti, ten waataŋ bədoona haa gud bə minti kaa gə ger Kolowe waatənan minti aŋ də awəy aduubə dəŋaŋ.

¹² Ten topoŋ gud kel teŋ: mindi mindi mo guudəŋa bə waate minti: «Ten toŋ gud Pola», naytoŋ minti: «Ten toŋ gud Apolo», kumundu pa minti: «Ten toŋ gud Piyera», baalaŋ pa minti: «Ten toŋ gud Kristu».

¹³ A ɗiki dəŋa, Kristu kir ɓarse duru mo? Yə ɓəlaŋ wəra a kəbaŋ gə largaŋa guudəŋa haa ten Pol mo? Yə jəənəŋ batem haa də sam ten Pol mo?

¹⁴ Ten ji suuse a Pepeŋ minti ten jəŋ batem a hulum guudəŋ baŋ, jəəne paapa anə Kərispusia daana Gayusi baŋ.

¹⁵ Bədoona ana, kəkəy paapa cəərə huluma bə waate minti yə jəənəŋ batem də səman ba.

¹⁶ O! Cəərən gaŋ! Ten jəŋ batem a gə ger Estefanasiŋ gəm. Cəərəna minti hulum baalaŋ paapa də dərən kəm pəda bə minti ten juunu batem.

¹⁷ Kristu gaanan paapa bə jəəti batem ba, wə gaanan haa bə waate *Kel pəsaŋ kəmarwaŋa wəra. Ten wəətəy wəra haa paapa də hel də waate kel də minti de dər kaa kəsarkaŋ ba, kir minti me də Kristu a kəbaŋ gə largaŋa a kole wəra karman bə boobo ba.

Yeesu Kristu haa səɓakiŋ daana ase kə Pepeŋ

¹⁸ Gəəzi, kaa gə minti haŋ kəkəy bə ɗe a bese wəraŋ, kel gə minti waate cəərə me də Kristu a kəbaŋ gə largaŋaŋ gole diri karman bə tiniini. Səma, kə áŋ kaayaŋ gə minti wəra gə seerə-seereŋ, yə haa səɓaki kə Pepeŋ gadi faɗi.

¹⁹ Gud maa mo, wəra bə jeerə-jeere giidə kefter kə Pepeŋa minti: «Ten ji yaŋ kir minti ase kə kaa kə asə-aseŋ kolə la wəra siri boobo, daana minti ase kə kaa gə minti də ciiriŋ, basə la wəra siri boobo gəm.»

²⁰ Hulum bə asə-aseŋ ane mo? *Hulum bə hate ku gili kə Pepeŋ ane mo? Hulum bə minti bese bay ji də kel ku cəərə karmana dər ko bə hebkənaŋaŋ baŋ, ane mo? Pepeŋ vəɗaŋ gud ase kə kaa kəsarkaŋ wəra minti wə karman bə tiniini ɗaw!

²¹ Pepeŋ gaŋ gud ase nuutuŋ wəra, səma kaŋ də ase neete bobloŋ anə keɗe nəkaŋ bə əsu minti kəna tó ba. Gud teŋa ta, goloŋ duru pisi minti, kel kə waate gə minti kaŋ bə guluya minti yə karman bə tiniiniŋ, tó seere kaa gə minti doŋ gud toŋ haa diiri faɗi.

²² Kaanə Ziwifiŋ golde neeteŋ haa miɗiŋ, kaayaŋ gə minti paapa gə Ziwifiŋ baŋ golde haa aseŋ.

²³ Səma áŋ teŋ, áŋ waate wəra haa sam Kristu, *Hulum bə minti Pepeŋ ŋəmnuŋ, bə minti yə ɓəlnu wəra a kəbaŋ gə largaŋaŋ. Haa kel kə supi tarmə kaanə Ziwifiŋ, kel kə tiniini dər kaayaŋ gə minti paapa gə Ziwifi baŋ gəm.

²⁴ Kə kaa gə minti Pepeŋ məntənəy minti yə jəə la kə toŋ, yə jəəne gə Ziwifi, paapa gə Ziwifi ba, teŋ asaŋ wəra minti Kristu haa səɓakiŋ daana ase kə Pepeŋ.

²⁵ Gud maa mo, karman bə minti kaŋ bə gulu agal kə Pepeŋa minti wə karman bə tiniiniŋ, wə bə daŋə-deŋe ase neeteŋ. Karman bə minti yə bə gulu agal kə Pepeŋa minti wə karman bə deweŋ, wə bə daŋə-deŋe səɓaki neeteŋ gəm.

²⁶ Kəsaananti, aŋ gə minti Pepeŋ mantənaŋ wəra a kusruŋ, aŋ gosə gole la kəm mo, aŋ haa anə mindi gəm mo? Gud maa mo, a ɗiki bə cəərə seŋkaŋaŋ, kaa kə asə-aseŋ, kaa gə minti ku səɓakiŋ daana gidiirə kaa kə abay-abay paapa aduubə dəŋa ablaw ba.

²⁷ Ana ɗaw ha'aŋ, Pepeŋ ŋəmaŋ kaa gə minti kaŋ bə guluya minti yə kaa kə tiniiniŋ bə kole kese a kaa kə asə-aseŋ. Wə ŋəmaŋ kaa gə minti kaŋ bə guluya minti yə kaa kə deweŋ bə kole kese a kaa kə səɓakiŋ.

²⁸ Wə ŋəmaŋ kaa gə minti sam abay paapa siri baŋ, gə minti kaŋ məlnəy diri wəra daana yə gole diri paapa karman baŋ, bə hare kaayaŋ gə minti kaŋ bə guluya minti yə karman, paapa karman ba anə ceki faɗi.

²⁹ Bədoona ana, hulum anə məna paapa bə nakə-neke bə he cəərə kusru apəya tiinə Pepeŋa ba.

³⁰ Pepeŋ ayaŋ aseŋ a áŋ haa gud Yeesu Kristu faɗi. Gud maa mo, gud tepe náŋa də Kristu, áŋ koloŋ bə gole duru ɗeker, kaa gə minti wəra dəra'i a nuunu daana gə bədə-bidi wəra ku baymeleŋa.

³¹ Bədoona ana, damdi wəra bə jeerə-jeere giidə Kefter kə Pepeŋa ana: «Hulum bə minti bəlaŋ he cəərə kusru ne apəyaŋ, wə haa cəərə kusru la haa gud kel gə minti Barkaŋ jiiniy.»