II TIMOTE 4 - JAA TƏMARWAŊ

Waatə kel kə Pepeŋ la

¹ Ten bə waatama wəra kaŋkaŋ tiinə Pepeŋa, daana tiinə Kristu Yeesu bə minti bə jeme kəəti də kaa gə minti zugi dədərgə daana də kaa kə mee-meŋ. Ten wəra bə asə-ase minti Kristu hare yaŋ da daana wə bi yaŋ a hame *kumna nuutuŋ. Gud teŋa ta, ten bə waatama minti:

² waatə kel kə Pepeŋ la wəra a kaŋ, dugtuy di la jəəne nuutu minti koŋ pisi, wə paapa pisi baŋ. Kay gud baymele neeteŋ la wəra, jəy gəbaŋ la cuuru, tiŋiy diri la, hətəy la də talma sããyaŋ saksaki.

³ Gud maa mo, ko kəman bə tuuki yaŋ, kaŋ bə əski ku kaa gə minti bə hate kel kə gəəziŋ pəda. Kaa teŋ bə he neeteŋ máŋ haa bəlam də karman bə minti giidi bəluŋ. Yə humi kaa kə hateŋ ciiri ablaw, kaa teŋ bə hətəy haa karman bə minti yə də caadə uskuŋ.

⁴ Yə po'te kusni wəra, yə bele iski kel kə gəəziŋ ba, yə mele ɗiki di wəra bə jeɓre haa ajujun də booboŋ.

⁵ Səma nəmtiŋ, tam toŋ əsə la ŋəŋ cəərə kusruma saksaki, halə gəəli la nəmti, waatə *Kel pəsaŋ kəmarwaŋ kə Pepeŋ la wəra a kaŋ. Doo ku joŋre nəmti bə ger Pepeŋ la wəra a kuɗuŋa.

⁶ Nin ha'aŋ, koŋ nəkaŋ wəra minti yə bə awan wəra damdi karman bə keere ana. Hi nin nəkaŋ wəra.

⁷ Ten duuruŋ duuri pisiŋ ne wəra. Ten fəŋ taraŋ a koɗoŋa anə ɓeti, ten tawnə wəra. Ten taakaŋ de nin bə gud Pepeŋ wəra ba.

⁸ Bə hebkənaŋ ha'aŋ, werke bə bulum bə kel ɗekeriŋ bə mən na apəy na. Werke toŋ, Barkaŋ hulum bə jeme kəəti ɗekeriŋ bə ayan dən yaŋ dər hi bə jeme kəətiŋa. Wə bə əyu paapa a nəənən təwa ba, səma a kaa gə minti bə mi hi bə hare nuutuŋa də beleŋ ku tərməyiŋ.

Kel kə Pol gə adoroŋ.

⁹ Haa kusrum da kir minti tam bəəda cəlam sarən da.

¹⁰ Gud maa mo Demasi ŋoryonon wəra gud bə minti wə bele kar gə cəərə seŋka gə hebkənaŋ ablaw, wə kooroŋ giidə seŋka də Tesalonikiŋ. Keresaŋ toŋ kooroŋ Galati, Titi gəm, toŋ warna Dalmasi na.

¹¹ Taakaŋ sarəna kəna haa Liki bay cuuru məna faɗi. Tam ɗəlaŋ də ne bə bi daŋ, tapə Markə da guudum da gud bə minti wə bi yaŋ a kəyan a joŋre nina ablaw.

¹² Ten gaŋ Tisiki warna giidə seŋka də Efesi na.

¹³ Bə minti tam ɗəlaŋ koore da neŋ, kalə da ger Karpusi da giidə seŋka də Torwasiŋ da. Ten yaakaŋ dəməəmə nin də kosõõye girdu, humun dən da kaasam da. Humun kefter də kaasam də gəm, daŋgeŋ haa kefter naayaw tó bə jəə-ji də golgo bə koyə-koyeŋ.

¹⁴ Aleksandərə, hulum bə ce duktiŋ, jəənən baymele ablaw. Barkaŋ wirku yaŋ damdi joŋre nuutu bə minti wə juunuŋ ana gəm.

¹⁵ Tam də kusrum gəm, amə kusrum la pisi suru gud minti wə hẽŋeŋ wəra də awəy cəərə kel gə minti are wəətənəy keɗe.

¹⁶ Bə minti ten ɗeŋ ajew a waate sam kusrən wəra tiinə kaa kə jeme kəətiŋaŋ, hulum ɗeŋ guudəna anə məna bə ɗe a keye cəərəna ba, kaŋ keɗe ŋoryonon wəra. Doŋ kir minti Pepeŋ a de təbay siri cə teŋa ba.

¹⁷ Səma Barkaŋ də kusru, wə yaakənan wəra ba. Wə jəŋ dəərən daana wə aynan səɓaki bə waate kel nuutu wəra kaŋkaŋ, kəya kaa gə minti teŋ paapa kaanə Ziwifi baŋ keɗe iskiniy. Barkaŋ də kusru, wə seerenen wəra ku googoŋa.

¹⁸ Bədoona gəəzi, Barkaŋ bə don yaŋ wəra ku gəəliŋa keɗe, wə ɗe yaŋ dəərən bay kel sarəna warna apəy na a ko bə minti wə ɗe a hame *kumna nuutuŋ ada naŋ. Tokɗeŋ jəə la nuutu bə faɗnə-faɗna! *Amen.

Mirkiŋ

¹⁹ Mirkin anə Pirsila la də Akilasi mirka daana Onesifor də gə girduŋ keɗe.

²⁰ Erasti toŋ yaakaŋ warda giidə seŋka də Koreŋtəŋ da. Kə Torofim ha'aŋ, ten yəəkunu warda giidə seŋka də Mileti da gud minti wə kasi kusru.

²¹ Haa kusrum da kir minti tam bəəda a fəlan wəra ajew də minti kosõõyeŋ kəm bay mele guuduŋ. Anə Ebulisi, Puden, Linusi, Kolodiya, də kəsaanə áŋ gə minti kanna sarənaŋ keɗe bə mirkim na.

²² Barkaŋ jəə la dəərəm. Pisi kə Pepeŋ jəə la dəərəŋ keɗe'i.