II TIMOTE 3 - JAA TƏMARWAŊ

Ko bə gəəli bə hiti bə adoroŋ.

¹ Bədoona ana, asə la wəra pisi minti, dər hiti bə ko bə adoroŋa ha'aŋ, koŋ kole yaŋ wəra gəəli.

² Dər ko toŋa ha'aŋ, kaŋ bə kole yaŋ wəra də gõõya, də lemlem də soloy, yə aŋke kusri, teke cəərə kusri apəya, yə sarte sam Pepeŋ, daana yə bə tope ku kəmni ba. Yə ji suuse a hulum cəərə karmana bə gəm, yə humi kosoŋ cəərə kar kə Pepeŋa bə gəm.

³ Kaŋ bə bele kumsi ba, yə ase caadə kaa bə gəm, yə juti kel, yə kaa kə waŋ-waŋ, yə kaa kə sərkə, yə bele kel pəsaŋ ba.

⁴ Yə bə jəəti akoloki cəərə kumsi, yə kole wəra kaa kə ji hãy-hãy, ku tərməyi wəra də ɗostə-ɗoste də aŋke bə kusriŋ. Yə bele kar gə minti giidi bələy dəŋaŋ Pepeŋ.

⁵ Yə gole dər kaŋa minti yə kaa kə ɗe gud Pepeŋa, anaaŋa yə bele səɓaki də kel nuutu gə minti sə a kuluy wəra dəra'i ba. Haa giidim la wəra siri!

⁶ Bə hebkənaŋ, sərdə kaa teŋ feke aləwa ger kaa kəmana, yə laŋte kəram gə minti dər kel neete paapaŋ wəra guudi. Kəram teŋ kəya baymele bə minti yə a juutunu ablaw nuutu bə iiliya tə bə moŋ, yə neete bə ɗe gud kel gə minti giidiy bələy saksaki.

⁷ Yə saksaki də tolke də hateŋ, də teŋ keɗe yə paapa gə nakə-neke bə ase gəəziŋ ba.

⁸ Bədoona ana, yə damdi anə Janesi daana Jamresi, kaa ɓasi gə minti a bəyaŋ ku *Moyisi wəra dayday ana. Yə bə bele gəəziŋ bə gəm, ɗiki di wəra bə ɓalkə-ɓalke, daana de neete bə gud Pepeŋ wəra ko bə boobo.

⁹ Səma kel neeteŋ bə si ajewa ba, gud bə minti gud mələr neeteŋ bə veɗe yaŋ wəra dər kaŋa keɗe damdi kə anə Janesiŋ daana Jamresiŋ a káŋ guudu wəra dayday ana gəm.

Əsə la ŋəŋ cəərə kel gə minti tam a hətnəy

¹⁰ Səma nəmti ha'aŋ, tam toŋ asaŋ hate bə minti ten a bə hətuŋ, ɗe nin, daana karman bə minti ten ji joŋreŋ guuduŋ. Tam asaŋ de nin bə gud Pepeŋ, minti ten mi ku kela, minti ten bele kaŋ daana minti ten bə hale gəəliŋa naanaanə moŋ.

¹¹ Tam asaŋ lasi də minti yə lasnan dəərəŋ daana gəəli bə minti ten səənu giidə seŋka də Antiyosiŋa, Ikoniyomaŋ, daana Listərəŋ keɗeŋ. Yə lasnan ablaw gəəzi! Səma də teŋ gila keɗeŋ, Barkaŋ doonon wəra ku gəəli toŋa.

¹² Bədoona ana gəm, kaa gə minti waataŋ ne minti té ɗe də ɗe bə minti Pepeŋ bəluŋ gud tepe neeteŋa də Yeesu Kristuŋ, yə ləsəy yaŋ wəra pərak-pəraki gəm.

¹³ Səma kə kaa kə sərkəŋ də kaa kə ji tiniini də kaŋ ha'aŋ, yə ze guudi dər baymeleŋa haa ze ɗaw. Yə ji tiniini də kaa kaayaŋ, daana yə ji tiniini də kusri té toki gəm.

¹⁴ Səma nəmtiŋ ha'aŋ, tam toŋ əsə la ŋəŋ cəərə karman bə minti tam a hətnu wəraŋ, daana bə minti tam duunu wəra ku tarməyama gəəziŋ. Kaa gə minti hatnam kel teŋ kəya, yə də dərəm.

¹⁵ Bədoona ana, a konce dəm də hãã faɗiŋ, kefter kə Pepeŋ də dərəm. Wə bə nakə-neke kirka ayam hel də minti ɗe a məlam a fele seereŋ gud de nəmti bə gud Yeesu Kristuŋa.

¹⁶ Kel gə minti gə jeerə-jeere giidə kefter kə Pepeŋa keɗe ha'aŋ, yə bəŋ ku Pepeŋ da. Yə pəsaŋ kirka hate gəəziŋ a kaŋ, bə ke gud baymeleŋ wəra, bə ɗampe kel kə bayməlaŋ, daana bə hate kaŋ cəərə ɗe ɗekeriŋa,

¹⁷ kir minti hulum kə Pepeŋ jəə la wəra bə ɗampə-ɗampe kaŋkaŋ, daana bə ganə-gene bə ji joŋre pisiŋ keɗe gəm.