II TIMOTE 2 - JAA TƏMARWAŊ

Sooto bə gəəzə-gəəzi kə Yeesu Kristuŋ

¹ Bədoona ta kormonti, nəmti ha'aŋ, tam toŋ teŋə dərəm la də səɓaki gud pisi bə minti áŋ fəlu a tepe náŋa də Kristu Yeesu.

² Kel gə minti tam iskiniy kuna tiinə kaa kə ablawaŋ, juguy la a kaa ɓeti gə minti gə nakə-neke kirka a hətəy a kaa gaalaŋ gəm.

³ Jəəne minti lasiŋ falnam ne gud Kristu Yeesu, saarə la damdi sooto bə gəəzə-gəəzi bə minti bə duuri guuduŋ ana'i.

⁴ Sooto bə minti bə əsə-isi ku joŋre nuutuŋaŋ, wə waataŋ ne minti tó jəə la dihi ku kumna kə toŋaŋ, wə tapte kusru a joŋre kə kaa gə minti teŋ paapa sooto baŋ ba.

⁵ Bədoona gəm, hulum bə minti waataŋ ne minti sam tó hagə la bulum bə kuuriŋ, wə kuurə la haa də gədəəgi duŋ.

⁶ Bədoona pa, hulum bə kéɗé bə minti geye ablaw də joŋre bə akaŋ ha'aŋ, wə kir hame kaasaw kəm ajew haa tó.

⁷ Ɗəkə la pisi cəərə kel gə minti ten bə waatam dəmaŋ, gud maa mo, Barkaŋ də kusru, wə kolom yaŋ wəra bə əski gud kel teŋa gila keɗe.

⁸ Cəərəm jəə la cəərə Kristu Yeesu ɗəki, bə minti a jəŋ a kaasaw də *Davidi daana bə minti haraŋ wəra dədərgə adordə meŋa, damdi *Kel pəsaŋ kəmarwaŋ gə minti ten bə siwliyaŋ waataŋ wəraŋ ana.

⁹ Gud Kel pəsaŋ kəmarwaŋ teŋa ta, ten bə lese dayna daana yə gaanan agəyam damdi ten hulum bə jəəti kel kə bayməlaŋ ana. Səma, kel kə Pepeŋ teŋ paapa gə gaa-ge agəyam ba!

¹⁰ Gud teŋa ta, ten de haa də lasiŋ keɗe ha'aŋ, gud kaa gə minti Pepeŋ vərnəy wəraŋ, kir minti té də kusri nakə la bə ape seere bə minti kasi Kristu Yeesuŋ, daana yə vaa la dər məyan nuutu də bay teweŋa.

¹¹ Kel gə minti day ta'i kənaŋ, yə kel kə gəəzə-gəəzi, minti: «Jəəne minti áŋ meŋ ne wəra də kumsə áŋ duuru, áŋ hare yaŋ wəra dədərgə də kumsə áŋ duuru gəm.

¹² Jəəne minti áŋ əsəŋ ne ŋəŋ guuduŋ, áŋ isi yaŋ a kumnaŋa duuru gəm. Jəəne minti áŋ maltaŋ ku áŋ ne cuuru minti wə paapa də dər áŋ ba, wə malte ku yaŋ cəərə áŋa gəm.

¹³ Jəəne minti áŋ paapa ɓeti baŋ, tó ha'aŋ, wə nuutu saksaki ɓeti gud bə minti wə paapa bə harte ku adoro ba.»

Hulum bə minti joŋre nuutuŋ de dər Pepeŋ

¹⁴ Ɗəkə cəərə kaŋ la keɗe cəərə kel teŋa, daana wəətəy la wəra kaŋkaŋ tiinə Pepeŋa minti yə a ce awəy cəərə kel kə waateŋa boo ba. Awəy taŋ kəya a keye hulum ba, səma kaa gə minti bə jeɓraŋ ha'aŋ, a ɓəlkəy tərməyi wəra ɓalke ɗaw.

¹⁵ Nəmtiŋ ha'aŋ, jəə kusrum la wəra kir minti tam doo dər Pepeŋ la pisi. Jəə la damdi hulum bə joŋre bə minti kese daw gud joŋre bə minti wə bə jəwaŋ baŋ ana, waatə kel kə gəəziŋ la wəra a kuɗiŋa kaŋkaŋ.

¹⁶ Kel kə awəy də boobo də bay bəlam dəŋ ha'aŋ, a kalte kum ada ba. Kaa gə minti ji kumsə awəy taŋ kəyaŋ, yə he giidi wəra sar Pepeŋa haa he ɗaw.

¹⁷ Hate kə kaa teŋ kəya damdi toso maavorgo də minti koloŋ meerew ana, a hudri kusuki də kaa. Anə Himene daana Fileti haa sərdə kaa teŋ.

¹⁸ Yə yaakaŋ kəkəy bə gəəziŋ wəra, yə waate haa minti kaa kə Kristuŋ wəra gə harə-hare dədərgə adordə meŋa, hare bə dədərgə baalaŋ paapa ajew na pəda. Gud hate neete toŋa kəyaŋ, sərdə kaa yaakaŋ de neete bə gud Pepeŋ wəra.

¹⁹ Səma kel gə gəəzi kə Pepeŋ teŋ kole ba. Yə damdi gud kuli bə minti Pepeŋ gəənu tó də kusru ana, wə daɓye ba. Gud kuli toŋ wəra bə jeerə-jeere cuuru minti: «Barkaŋ ha'aŋ kaa nuutuŋ də duru», daana pa minti: «Hulum bə minti waataŋ ne wəra də ku minti tó kəna kə Barkaŋ, wə yaakə ji bə baymeleŋ la».

²⁰ Gosə gole la kəm, aləwa giidə kuli pisi bobloŋa ha'aŋ, kar gə minti yə ke soŋ giidi ada gidiiri ablaw. Sirdiŋ haa anə taasa kəman yə jəŋ toŋ də kooso bə welɗe pis-pisi daana soloy bə yoorə-yoore, sirdiŋ kaɓkaw, sirdiŋ kəəyəw bagŋ. Yə ji joŋreŋ diiri dəra'-dəra'i keɗe. Kar kaayaŋ pəsaŋ ha'aŋ, yə ji joŋreŋ diiri haa dər hi bə anə kəɗwəya. Kaayaŋ teŋ kəyaŋ, yə ji joŋre diiri dər hi bə ablawa keɗe faɗi.

²¹ Hulum bə minti bədəŋ kusru ne wəra ku baymele bə minti ten wəətu səmu haa kənaŋ, wə damdi taasa pisi bə minti wəra bə malə-mele dəra'i a Pepeŋ ana. Wə wəra anə səpa keɗe kə burduŋ, wə wəra bə ɗampə-ɗampe bə ji joŋre pisiŋ.

²² Bədoona ana ta, haa giidim la wəra sar ɗiki bə baymele bə anula. Goldə nəmtiŋ laŋa kel ɗekeriŋ, de bə gud Kristu Yeesuŋ, beleŋ, daana kəkaɓiŋ də kaa gə minti ku tərməyi wəra bay ɗiki bə baymele ada daana gə minti bə toose Pepeŋaŋ.

²³ Səma, a kalte kum a awəy də boobo də bay bəlam dəŋa ba. Tam wəra bə asə-ase minti kumsə awəy taŋ kəya a ke gəbaŋ adəwaldə kaa.

²⁴ Kə hulum kə Barkaŋ ha'aŋ, wə paapa kir ji gəbaŋ də kumsu ba. Wə jəə la hulum bə bele kaŋ keɗe, bə nakə-neke bə hate kaa pisi daana bə hale gəəliŋ gəm.

²⁵ Bə minti kaŋ jəŋ bə daw ku baŋ, wə hətəy la də talma sããyaŋ. Kumundu ba Pepeŋ əyəy hel yaŋ minti yə kolə kirki la a baymele neeteŋ daana yə ase gəəziŋ yaŋ də hel taŋ ɗawmay mo.

²⁶ Kumundu ba yə hare yaŋ bə fele ɗiki pisi daana yə bidi yaŋ wəra ku vew də minti Nərtitiŋ a tupnuy ada minti yə jəə joŋre kə tá laŋ.