II PIYER 3 - JAA TƏMARWAŊ

Hare də Kristu daŋ

¹ Gədaarən gə agŋ-agŋ, toŋ kay kənaŋ haa kefter bə ɓasi bə minti ten jeereneŋ dəŋ. Giidə kefter toŋa ɓasi keɗe ha'aŋ, ten ɗəknəŋ cəərəŋ cəərə kar teŋ na haa minti aŋ gunə la wəra, ɗiki dəŋ jəə la wəra pisi a kuɗuŋa.

² Ku mini bə minti *kaa cetceti gə jogte ku mini kə Pepeŋ a jugnu dayday daana ku gili bə minti Barkaŋ, hulum bə seereŋ, a əynu a *kaa kə vaa-veŋ minti yə jogoŋ dəŋ laŋ, aŋ ɗəkə la cuuru.

³ Jəə la wəra də dərəŋ ajewa faɗi minti dər hi bə adoroŋa ha'aŋ, kaa kə dafɗete kaŋ tuli yaŋ sarəŋa, bele bə ji kar kə bayməlaŋ əsəŋ ciiri kumna haa tó.

⁴ Yə waataŋ yaŋ minti: «Wə a waataŋ minti tó hare da bə moŋ, wə anə caw tə mo? Kamnə áŋ meŋ wəra, səma kar keɗe raawaŋ bə ji haa damdi yə a jəŋ hãã a mele bə gud koŋ daŋ ana.»

⁵ Kaa teŋ yaakaŋ ciiri bə ge wəra də diri anə re'-re'i cəərə kel gə daydaya minti Pepeŋ a jəŋ ko bə apəya də ko bə adawraŋ haa də kel kə waate nuutuŋ. Wə ɓarsaŋ dər seŋka wəra də kan, wə pəŋ seŋka warda dər kan da, haa də kel nuutuŋ pa.

⁶ Wə ɓalkaŋ kar gə cəərə seŋka də dayday wəra haa də kan kəmtəŋ gə minti a haŋ koŋ.

⁷ Ko bə apəyaŋ də seŋkaŋ də hebkəna ha'aŋ, Pepeŋ bə guluy ciiri də kel nuutu teŋ pa minti tó bə ɗe a ɓəlkəy wəra də cəwaŋ. Wə guluy ciiri hãã də hi bə minti wə bə ɗe a jeme kəəti də kaa kə bay usku kuŋ bə bəsəy wəra.

⁸ Gədaarənti, karman yaŋ məna bə minti cəərəŋ a ge toŋ wəra baŋ: hi məna'iŋ gole dər Barkaŋa damdi laate guɓiŋ ana, laate guɓiŋ gole duru damdi hi məna'iŋ ana gəm.

⁹ Sərdə kaa kəman yaŋ bə waate minti Barkaŋ bə de cuuru də kel gə minti wə a wəətənəy səməy minti tó bə doy kuy yaŋ wəraŋ. Wə de cuuru paapa de ba. Wə bə mi haa guudəŋa gud maa mo wə paapa də tay də minti hulum basə la wəra anə məna ba, wə bele haa minti kaŋ keɗe kolə kirki la a baymele neeteŋ.

¹⁰ Hi bə minti Barkaŋ hare duru daŋ tuuki yaŋ anə gurusi damdi hulum bə dəgaaya ana. Dər hi toŋa ha'aŋ, ko bə apəyaŋ bə raawe yaŋ wəra bə sawye anə hə̃ə̃'a də səɓaki. Seskaŋ, kitir daana cəwa də apəyaŋ keɗe bə ki yaŋ wəra. Seŋkaŋ də kar kə cəərəŋ keɗe bə ji pəda.

¹¹ Kar keɗe tewe yaŋ wəra haa bədoona tə bə moŋ, aŋ laa ku kusrəŋ la minti aŋ jəə la haa bə kaa məntəŋ ana mo? Ɗe dəŋ jəə la wəra *cetceti, aŋ ayə kusrəŋ la wəra keɗe bə humi kosoŋa cəərə Pepeŋa.

¹² Bə minti aŋ bə mi hi bə hare kə Barkaŋ daŋ, aŋ ayə səɓaki la a kusrəŋ bə ji kar pəsaŋa minti wə bəəda cəlam. Hi toŋ ji haa də ko bə minti ko bə apəyaŋ bə kiŋ; seskaŋ, cəwaŋ daana kitir bə yoore wəra kas cəwa hərhəraŋ.

¹³ Səma áŋ teŋ ha'aŋ, áŋ bə mi tarmə ko bə apəya kimirwiŋ də seŋka təmarwa gə minti Pepeŋ a wəətənəy səməy wəraŋ. A ko toŋ na ha'aŋ, kaŋ keɗe ji kel ɗekeriŋ yaŋ.

¹⁴ Gədaarənti, bə minti aŋ bə mi hi toŋaŋ, aŋ ayə səɓaki la a kusrəŋ minti Pepeŋ bəə la a fəlaŋ wəra cetceti, bay sarte sarəŋa, daana də kəkaɓiŋ aduubə dəŋa duuru gəm.

¹⁵ Jəə la wəra də dərəŋ minti Barkaŋ náŋ məŋ ablaw, wə yaakənaŋ ko toŋ haa minti aŋ seerə la wəra. Seenə áŋ bə agŋ-agŋ Pol jeereneŋ kel teŋ bədoona gəm, wə jiiriniy haa də ase bə minti Pepeŋ əynu duŋ.

¹⁶ Haa karman bə minti wə jiirunu giidə kefter nuutuŋa keɗe bə minti wə waatətaŋ sam kel teŋ adaŋ. Sərdə kel kəman yaŋ ada ha'aŋ, yə iski gəəli. Kaa gə minti gud kel paapa də diri ba daana de neeteŋ paapa də səɓaki baŋ, yə kunti kel teŋ damdi yə kunti kel gaalaŋ gə giidə Kefter kə Pepeŋ wəraŋ ana. Yə ɗampe kel ciiri bə bəsəy wəraŋ haa té toki.

Tewe də kel

¹⁷ Gədaarənti, aŋ teŋ ha'aŋ, ten gaanaŋ kosnoŋ ne wəraŋ. Aŋ amə kusrəŋ la pisi, aŋ a yaake kusrəŋ bə lente wəra də kel kə laŋə-leŋe kə kaa gə minti paapa gə gilə-gili baŋ ba. Karman nəəti bə minti aŋ a məlaŋ ɗiki dəŋ cuuru kaŋkaŋiŋ, aŋ a yəəku bə ɓiti wəra kaasəŋa ba.

¹⁸ Aŋ suu la pisi suu dər pisiŋa daana dər aseŋ kə Barkaŋ náŋ Yeesu Kristuŋa, Hulum bə seereŋ. Tokɗeŋ jəə la máŋ nuutu hebkəna daana bə faɗnə-faɗna gəm! *Amen.