II PIYER 2 - JAA TƏMARWAŊ

Təbay də minti yə cəma gud kaa kə jogte hate bə baymeleŋaŋ

¹ Aduubə də kaanə *Israyelaŋ, *kaa kə jogte ku mini bə laŋte kaŋ a jəŋ ada. Gom də kaa kə jogte hate bə baymeleŋ bə ji yaŋ aduubə dəŋa bədoona gəm. Yə kalte hate bə bay bəlam duŋ bə ɓalke kaŋ yaŋ aduubə dəŋa dəgaaya-dəgaaya. Yə bə malte kuy yaŋ wəra cəərə Bərdə kaŋ bə minti a miɗniy ciiriŋ. Gəəli bə bese kaŋ bi yaŋ anə cəlam ciiri da haa gud kel té gə minti yə bə jiyaŋ toki.

² Kaa ablaw tepe yaŋ guudi bə jəəti booboŋa. Gud kel neete teŋa ta, kaŋ sarte sam kəkəy bə gəəziŋ yaŋ máŋ wəra.

³ Yə də həryəm də kar, gud teŋa ta yə bə hamaŋ yaŋ də kel neete gə tiwkiŋ. Warda anə hãã faɗi, Pepeŋ wəra maŋ bə doy də kəəti, yə bə ji bay bese wəra ba.

⁴ Golə la, *kaa kə digi kə Pepeŋ gə minti a jəŋ baymeleŋ, Pepeŋ yəəkənəy bay ji daŋgay di ba. Wə vəənəy gə əntə-ənti a tələŋkə kələmləm də bay nobeŋa dər tilməŋa bə mi hi bə jeme kəətiŋa.

⁵ Kaa kə dayday, Pepeŋ yəəkənəy bay ji daŋgay di bə gəm. Wə yaakaŋ kan kəmtəŋ bə he seŋkaŋa də kaa gə giidə gə bay usku kuŋ. Səma wə seereŋ Nowe bə minti a waataŋ kaŋ minti yə jəə kel ɗekeri laŋ, də kaa gaalaŋ ada seeɗa gəm.

⁶ Pepeŋ jəŋ daŋgay də vil də Sodom daana də Gomor gəm. Wə kuŋ vil taŋ wəra, wə kolna wəra koroy. Wə jəŋ teŋ haa bə ge dər kaa gə minti paapa bə de haa də ku Pepeŋ baŋ minti kel teŋ tuuki yaŋ ciiri gəm.

⁷ Səma Loti, hulum ɗekeri bə minti a gəyaŋ wəra kas dəglə kə kaa gə minti a jəŋ duru da gə bay giliŋ, Pepeŋ duunu warda aduubə də kaa teŋ da.

⁸ Hulum ɗekeri toŋ, də ko bə minti wə kəm aduubə diŋ, ɗiki bə ku tərmuyuŋ lenteŋ wəra hasi faɗi gud kel neete gə bayməlaŋ gə minti wə iskitini daana wə əstənəy minti yə bə jiitiya a hiŋa saksakiŋ.

⁹ Aŋ asaŋ ne, kaa gə minti bə ɗe haa də ku Barkaŋ jəəne bə se lasiŋaŋ, wə bə nakə-neke bə humuy warda dərə da daana bə ve kaa gə gul-gulaŋ laki bə ɗe a jəy daŋgay di dər hi bə kəətiŋa.

¹⁰ Kaa gə minti yaakaŋ kusri bə ɗe máŋ gud ɗiki bə zeɓə-zeɓeŋa bə gud kusri bə hatə-hate də baymeleŋaŋ, daana gə minti bəyaŋ abay kə Pepeŋ wəra, wə ji daŋgay daŋgeŋ haa a kaa teŋ. Kaa té gə jogte hateŋ baymeleŋ, yə kaa kə tet-tete gə hage sam kusri. Walka də minti jəy bə sarte kaa gə hame məyan apəy naŋ, paapa siri ba.

¹¹ Anaaŋa koo nuutu kaa kə digi kə Pepeŋ gə minti də səɓaki anə gəg-gəgi gə dəŋəy, yə maltaŋ kel kə sarte sar kaa gə hame məyana sar Pepeŋa tiinuŋ ba.

¹² Kaa kə hate té gə bayməlaŋ, yə ji kel neeteŋ gə bay guudiŋ damdi bege bə waraŋ ana bə minti we wəra caw haa bə ɗe a awe wəra aweŋ. Kar gə minti paapa də diri baŋ, yə sərtəy nuutu anə hay. Yə bə əwəy yaŋ wəra damdi begeŋ ana gəm.

¹³ Haa kəya werke bə minti yə fəlu gud kel kə gul-gula gə minti yə a jiitiniŋ. Karman bə minti doy diri pisiŋ, haa bə minti yə jəəti boobo neeteŋ wəra tiinə kaŋa daaway. Də bə minti yə tepe dəərəŋ bə hame a ko bə kəɗwəya də kel neete gə jəəti tiniini də kaŋ, yə kolte kaŋ kese də kel gə zodə-zodeŋ.

¹⁴ Yə golde saksaki haa jəəti bə piwpiw, yə paapa bə seepe kas jəəti bə baymeleŋ ba. Kaa gə minti de neeteŋ paapa də səɓaki baŋ, yə təɗtəy wəra guudi. Yə hataŋ kusri wəra də kurfuki. Kəəti kə Pepeŋ bə doo-de diiri.

¹⁵ Yə yaakaŋ kəkəy ɗekeri wəra kəyaŋ, yə lenteŋ wəra a kəkəy bə minti yə haŋ kəkəy bə minti Baalam, hulum bə jogte ku mini, kormə Bosor, a həənuŋ . Wə jəŋ də kurfuki də soloy tə bə moŋ, wə goldoŋ ji bə baymeleŋ minti tó falə werke la.

¹⁶ Səma wə fəlaŋ ceme bə təbay kas bay iski bə kosoŋ nuutuŋ. Kəya agerhẽ bə minti paapa bə waate kela ba, wəətunu kel damdi hulum kisirkiŋ ana bə haw ku wəra cəərə joŋre bə bay bəlam du bə minti wə bə jəwaŋ.

¹⁷ Kaa teŋ damdi karta kə hẽẽ-hẽẽ ana, damdi kamra gə minti kaŋkaw həənəy warna boobo, yə hage baŋ ana. Pepeŋ ɗəmpənəy ko neete bə isiŋ dər ko bə tilmə nilik-likiŋa.

¹⁸ Yə waate haa kel kə hage sam kusriŋ saksaki, anaaŋa guudi paapa ta'a ba. Yə ji joŋreŋ də kusri bə hatə-hate də baymeleŋ bə tope kaa gə minti a ɓətəŋ warda kəmarwaŋ ku kaa kə laŋtə-laŋte da də vew neeteŋ.

¹⁹ Yə wəətətəy sam bidiŋ, anaaŋa té də kusri, yə kafkam kə kar gə minti yə hataŋ bə jiya bə ɓalke kusri wəra, gud maa mo, mindi mindi mo haa kafkam kə karman bə əsə-isi kumna cuuru.

²⁰ Kaa gə minti a ɓətəŋ kusri warda ku kar gə bayməlaŋ gə laŋte kaa gə cəərə seŋkaŋ daŋ kas minti Barkaŋ náŋ Yeesu Kristu, Hulum bə seereŋ də diriŋ, yə bə yaakaŋ kusri ne bə humi daana bə kole kafkam kə kar té paŋ, kel gə siriŋ bə ji máŋ wəra bayməlaŋ hasi dəŋaŋ gə ajew.

²¹ Kaa teŋ asaŋ kəkəy ɗekeriŋ ne wəra, yə bə haraŋ bə yaake ku gili kə Pep bə minti yə a əynəy diŋ wəra. Yə a ase kəkəy ɗekeri la baŋ a haa marya ɗaw.

²² Kel gə minti ku kumtiŋ a wəətənəy jəŋ siri wəra anə derra faɗi minti: «Kooyaŋ haraŋ bə ɗe a hame harse nuutuŋ .» Daana pa, «Gaduuruŋ baadaŋ wəra, wə haraŋ bə ɗe a lukti də godor.»