II PIYER 1 - JAA TƏMARWAŊ

Mirkiŋ

¹ Jeere kefter toŋ haa ten Simoŋ Piyer, hulum bə joŋre daana bə *gaa-ge kə Yeesu Kristuŋ. Ten jeereneŋ kefter toŋ a nəənəŋ, aŋ kaa gə minti fəlaŋ deŋ gud ɗeker kə Pep náŋ Yeesu Kristuŋa daana hulum bə seere áŋ. De toŋ haa bə naareŋ ana dege'-dege'i faɗi gəm.

² Pisiŋ də kəkaɓiŋ kə Pepeŋ jəə la cəərəŋa pisi jəə a kəkəy bə minti áŋ bə ze gud əsuŋa, gud ase bə Yeesu Barkaŋ náŋaŋ gəm.

Joŋre kə kaa gə minti Pepeŋ məntənəy

³ Gud səɓaki kə Pepeŋa, Yeesu ayaŋ kar gə minti keye áŋ a ɗe də áŋa guuduŋ, bə kole áŋ bə aye kusrə áŋa wəra keɗe a Pepeŋ. Wə jəŋ kel teŋ haa də bə minti wə gaŋ dər áŋ wəra cəərə Pepeŋaŋ, Pep tó bə minti a mantaŋ áŋ minti áŋ tapə la bə hame boblo kə toŋa daana a joŋre pisi kə toŋaŋ.

⁴ Haa də hel taŋ minti wə ayaŋ kar kəmtəŋ də kar pəsaŋ-pəsaŋ gə minti wə a wəətənəy səməy wəra a áŋ. Də kar té gə minti wə aynaŋ dəŋ, aŋ neke bə fətti wəra ku ɗiki bə kar gə bayməlaŋ gə minti bese kaa gə cəərə seŋkaŋ wəraŋ, kir minti aŋ zeedə la bə kole máŋ damdi Pepeŋ ana.

⁵ Gud teŋa ta, aŋ ayə kusrəŋ la wəra anə keɗe-keɗe bə ge ji bə kel pəsaŋ gə de dər Pepeŋ ku deŋa. Də ji bə kel pəsaŋ, aŋ gaa ase bə Pepeŋ la ku.

⁶ Də ase bə Pepeŋ, aŋ gaa ame bə kusrəŋ la ku. Də ame bə kusrəŋ, aŋ gaa mi bə ku gəəliŋ la ku. Də miŋ, aŋ gaa aye bə kusrəŋ wəra keɗe a Pepeŋ la ku.

⁷ Də aye bə kusrəŋ, aŋ gaa tope bə jaa də kaŋ damdi kəsaanaŋ ana la ku. Də tope bə jaŋ, aŋ gaa bele bə kumsəŋ la ku ada gəm.

⁸ Kumsə kel teŋ kəya jəəne sarəŋaŋ pisi jəə, yə gunuŋ yaŋ wəra a joŋreŋa, aŋ si yaŋ bə ase Barkaŋ náŋ Yeesu Kristu wəra pisi asi.

⁹ Gəəzi, hulum bə minti kumsə kel teŋ paapa suru baŋ, duru ase haa anə fənna-fənna bagŋ, wə haa damdi wə bə bəwə-bəwi ana. Cuuru wəra də gaa-ge minti, baymele nuutu bə daydayaŋ, yə pooroŋ wəra cuuru haa pooreŋ.

¹⁰ Gud teŋa ta kəsaananti, aŋ ayə səɓaki la a kusrəŋ ada pisi aye kir minti də joŋre nəətiŋ, aŋ əsə la ŋəŋ cəərə mante bə minti Pepeŋ mantənaŋ duuru daana minti wə varnaŋ warda minti aŋ jəə la kə toŋ. Aŋ jəəne bə jəəti bədoonaŋ, aŋ neke bə awte bə yaake de nəətiŋ wəra pəda.

¹¹ Bədoona ta, Pepeŋ bə ayaŋ kəkəy anə fənay-fənay bə ve a ko bə minti Yeesu Kristu, Barkaŋ daana Hulum bə seere áŋ, bə əsə-isi ada bə hame *Kumnaŋa bə faɗnə-faɗnaŋ.

Kəmtəŋ də kel náŋ gə hateŋ

¹² Gud teŋa ta, jəəne nuutu minti kar teŋ wəra də dərəŋ, daana aŋ gə əsə-isi ŋəŋ də kel gə gəəzə-gəəzi gə minti aŋ a duuniy, ten ɗəktəŋ cəərəŋ yaŋ saksaki ciiri.

¹³ Də bə minti ten kəm caw dədərgəŋ, dərəna akəsa minti ten zeedeŋ guudəŋ la ada diiri minti aŋ jəə la gə gunə-guni.

¹⁴ Gud maa mo wəra də dərən minti ten wəra maŋ bə me, damdi Barkaŋ náŋ Yeesu Kristu a gaanan dərən wəra cuuruŋ ana.

¹⁵ Ten ji wəra anə keɗe-keɗe kir minti ten bə jəəne dəma paapaŋ, cəərəŋ nakə la bə ɗəkti cəərə kel teŋa saksaki.

¹⁶ Bədoona, are gaanaŋ dərəŋ minti Barkaŋ náŋ Yeesu Kristu bə tuli də səɓakiŋ haa naanaanə tuli mo, paapa də ajujun də minti hulum ɗampəna wəra pas-pasa ɗampe ba, are asaŋ boblo nuutuŋ wəra də dər are.

^17-18 Are a jəŋ cəərə pərki kə Pepeŋa duuru, də ko bə minti Pep Abaŋ həgnu səmu daana əynu bobloŋ. Də ko toŋ ha'aŋ, wə əskəŋ dordə Pepeŋ, Bərdə Abay, bə waate minti: «Haa kormon, giidən bəlu ablaw, ten də waale ablaw guudu gəm.» Are də kusrə are, are əskəŋ kel bə waate də apəy da bədoona gəm.

¹⁹ Kel gə minti *kaa kə jogte ku mini kə Pepeŋ a wəətənəy, áŋ məlaŋ ɗiki də áŋ máŋ ciiri pisi malə, aŋ kir doy kaasəŋa pəsaŋ. Kel teŋ haa damdi lampa də minti yə malna dər ko bə tilməŋa minti a walə koŋ la wəra hãã dər hi bə minti pəɗaki kə Kristuŋ wəlaŋ ku tarməyaŋ la wəra damdi Seska mooto də wele ko də bəbəgiŋ ana.

²⁰ Kel kəmtəŋ haa minti aŋ əskə gud kar teŋ la wəra pəsaŋ minti hulum paapa anə məna bə nakə-neke də ase nuutuŋ təwa bə ke gud kel gə jeerə-jeere gə joge ku mini kə Pepeŋ wəraŋ ba.

²¹ Gud maa mo, kaa kə jogte ku mini kə Pepeŋ jogoŋ haa paapa kel gə minti té də kusri yə a ɗəkəŋ bə juguy ba. Tiiru Cetcetaŋ kulnuy kel kuya minti yə jogtə ku mini kə Pepeŋ la haa tá.