II KOREŊTƏŊ 9 - JAA TƏMARWAŊ

Keye bə minti yə əyu a kəsəəniŋ

¹ Ten jeereŋ kel ne cəərə keye bə kaa kə Pep gə Zeruzalemaŋ paŋ, máŋ haa boobo.

² Gud maa mo ten wəra bə asə-ase ɗiki nəəti pisiŋ. Ten ufuŋ kun dəərəŋ tiinə kaanə Masedəwana minti: «Kəsaanə áŋ gə Akay wəra gə ɗampə-ɗampe bə aye keye neeteŋ hãã kəɗəgŋ.» Bande nəətiŋ zeŋ gud ablaw də Tapiŋ bə aye faɗi.

³ Ten vaŋ kəsaanə áŋ səraŋ na haa minti ku are bə minti are ufnu dəərəŋ gud keye toŋaŋ a ji kel kə boobo ba. Ten bele haa minti aŋ jəə la wəra gə ɗampə-ɗampe pisi damdi ten a waataŋ wəraŋ ana.

⁴ Jəəne paapaŋ, kaanə Masedəwan ɗeŋ ne kanna guudən naŋ, aŋ bə jəəne kəm bay ɗampeŋ, kese ɗe a kole bə de are gud bə minti are goloŋ haa cəərəŋa. Nəətiŋ ɗe a doŋ naanaanə me'i moŋ, ten waataŋ sam toŋ kəm bə ɗaw.

⁵ Gud teŋa ta, doonon dərən bə vaŋ kəsaanə áŋ gerdeŋ na faɗ-faɗi bə ɗe a ɗampe kar nəəti gə minti aŋ a wəətənəy səməy wəra bə aye də ɗiki pisiŋ. Bədoona ana a tuli katən naŋ, ten fele aye nəətiŋ yaŋ wəra laki, wə ge dər yaŋ wəra minti aŋ ayaŋ haa də ɗiki pisiŋ, bay he bə guudu.

⁶ Jəə la wəra də dərəŋ minti: «Hulum jo'oŋ ne wesekaŋ, wə ɗe a ceme haa weseka gəm. Wə jo'oŋ ne hayaŋ, wə ɗe a ceme haa hayaŋ gəm.»

⁷ Bədoona ana ta, mindi mindi mo ayə la də ku tərmuyu, bay laawe, bay he bə guudu. Gud maa mo Pepeŋ bele hulum bə minti aye də waaleŋ.

⁸ Pepeŋ bə nakə-neke bə ayaŋ gidiirə kar pəsaŋ məntəŋ məntəŋ mo keɗe kir minti, karman bə minti aŋ kir fəluŋ a kerpe kaasəŋa ba, yə raawə la wəra kaasəŋa pisi raawa ɗaw kir minti aŋ kayə la diiri ku joŋre pisiŋaŋ.

⁹ Damdi wəra gə jeerə-jeere giidə Kefter kə Pepeŋaŋ ana minti: «Kəəsu ayaŋ bay gədəəgi a kaa kə caacaŋ, pisi bə minti wə bə jəwaŋ ji yaŋ na anə hoŋ saksaki.»

¹⁰ Pep bə minti aye adara də jo'eŋ a kaŋ daana əyəy so bə hameŋ, ayaŋ kar yaŋ gəm. Wə zuluy yaŋ pisi zuli kir minti pisi bə minti aŋ bə jəwaŋ zee guudu la ablaw sar kaŋa.

¹¹ Wə ayaŋ gidiirə kar yaŋ ablaw kir minti dər ko muntu muntu mo, kaasaŋ jəə la bə aye saksaki a kumsəŋ kaayaŋ gəm. Bədoona ana ta, kaa ablaw kole yaŋ bə ji suuse a Pepeŋ gud kar gə minti aŋ əynəy di kasi are daŋ.

¹² Soloy tó bə minti aŋ bə təəruŋ, aŋ a ɗiki minti wə haa bə keye kaa kə Pepeŋ təwa ba, wə ze gud kaa bə ji suuse ablaw a Pepeŋ ada gəm.

¹³ Joŋre bə minti aŋ bə jəwaŋ bə gay diri yaŋ wəra cəərə ku tarməyaŋ pəsaŋa. Gud teŋa ta yə tokɗe Pepeŋ yaŋ gud humi bə kosoŋ nəəti bə cəərə kela minti aŋ ɓeti gud *Kel pəsaŋ kəmarwaŋ kə Kristuŋa, daana yə tukɗu yaŋ gud aye nəəti bə ɗiki pisiŋa a niini daana a kaa kaayaŋ keɗe gəm.

¹⁴ Yə ge gud bele neete bə səraŋ yaŋ wəra də toose neete bə cəərəŋ gud pisi bə deŋe kumsu bə minti Pepeŋ a juunu sarəŋaŋ.

¹⁵ Aŋ tokɗə Pepeŋ la gud aye nuutu bə minti ŋere də kumsu baŋ!