II KOREŊTƏŊ 8 - JAA TƏMARWAŊ

Soloy bə minti yə əyu a kaa kə doo-de gə Zeruzalem

¹ Kəsaananti, are də caadə gaŋ dərəŋ cəərə pisi bə minti Pepeŋ gəənu cəərə kaa kə Tapi gə Masedəwanaŋ.

² Gidiirə gəəli ablaw a tupnuy nuutu faɗi, səma waale neeteŋ zeedeŋ guudu haa zeede ɗaw. Də caaca neeteŋ anə keɗeŋ, yə ayaŋ ablaw də tərməyi pəsaŋ.

³ Ten ji bərdə kəkəy wəra minti, yə ayaŋ kar gə minti yə gə nakə-neke bə əyəy keɗeŋ, yə rəəwunu cuuru raawe pə ɗaw. Yə aytaŋ kar teŋ haa də ɗiki di.

⁴ Yə mantaŋ kasi are ablaw faɗi minti kəkəy bə pisi toŋ jəə la cəərə té bə tepe a joŋre bə aye kara a kaa kə Pep gə giidə vil də Zeruzalem gəm.

⁵ Karman bə minti yə juunuŋ dəŋaŋ bə minti are a ɗəkəŋ bədoonaŋ. Yə ayaŋ kusri kəm haa té anə faɗi a Barkaŋ, adoro a are gəm damdi giidə Pepeŋ a bəlaŋ ana.

⁶ Titi a məlaŋ gud taare bə soloy gerdeŋa haa tó tə bə moŋ, are haraŋ bə zew guudu minti wə harə la gerdeŋ na a de ku joŋre pisi toŋ wəraŋ.

⁷ Aŋ də hurma a kara keɗe, a de bə gud Kristuŋaŋ, a hel də waate bə kel kə Pepeŋa wəraŋ, a ase nəəti bə karaŋ, a gidiirə bande nəətiŋa keɗeŋ, a bele bə minti aŋ fəlnu kasi areŋ. Gud teŋa ta, are bele haa minti kaasaŋ jəə la bə aye ablaw cəərə joŋre tó pisiŋa gəm.

⁸ Ten haŋ guudəŋ də kel teŋ paapa he ba, ten waataŋ sam bande bə aye kə kaayaŋ haa minti aŋ nakə la bə ji bədoona gəm bə ge dər minti aŋ bele kaa kaayaŋ gəəziŋ.

⁹ Gud maa mo pisi bə minti Barkaŋ náŋ Yeesu Kristuŋ juunu sar kaŋaŋ, wə də dərəŋ. Wə a haa hulum bə hurmaŋ ɗaw, wə koloŋ kusru wəra də caaca guudəŋa minti aŋ kolə la də hurma gud caaca kə toŋa.

¹⁰ Aŋ məlaŋ guudəŋ bə aye kəɗəgŋ ajew haa aŋ. Kaa gə ajew gə minti ayaŋ ɗiki di bə aye aye toŋa haa aŋ gəm. Hebkəna ha'aŋ, ten gaŋ gud ɗiki katən warna: aŋ kir aye səɓaki a kusrəŋ ada

¹¹ bə de ku joŋre bə minti aŋ a məlnu guuduŋ wəra minti aŋ ayə la də aŋar də səɓaki dəŋ. Aŋ bandə la bande bə daw ku wəra damdi aŋ a bandaŋ bə ɗəmpuŋ ana gəm.

¹² Gud maa mo bə minti aŋ ayaŋ ne də ku tarməyaŋ pəsaŋ, Pepeŋ de haa yaŋ də aye toŋ. Wə de haa duuru haa də aŋar də nəəti bə kaasaŋ. Jəəne paapa kaasəŋa baŋ, wə məntu bə gəm.

¹³ Ten waataŋ paapa minti aŋ vaa la wəra də kuŋ bə tewe gəəli bə cəərə kaayaŋ wəra təwaŋ ba, səma haa minti aŋ əsə la gəga'-gəga'i.

¹⁴ Bə hebkənaŋ, aŋ də kar kaasəŋa dəŋaŋ gə minti aŋ a kir fələy, kəya aŋ neke bə keye kaayaŋ gə minti dər caacaŋaŋ. Bə jəəne hõy minti aŋ koloŋ ne dər caaca gəm, kaa kaayaŋ koloŋ ne də kar kəəsi dəŋaŋ gə minti yə a kir fələy, yə neke yaŋ bə kəyaŋ gəm. Aŋ ji yaŋ gəga'-gəga'i haa də hel taŋ.

¹⁵ Kel teŋ haa damdi wəra gə jeerə-jeere giidə Kefter kə Pepeŋaŋ ana minti: «Hulum bə minti a humuŋ kar kə hameŋ ablaw bə jəŋ diiri gə raawə-raawe kəəsu ba, hulum bə minti a humuŋ anə məkaŋ, yə kirpunu bə gəm.»

Yə ve anə Titi giidə vil də Koreŋtəŋ

¹⁶ Are tokɗe Pepeŋ gud bə minti wə koloŋ Titi hulum bə bandə-bande bə bəlaŋ damdi are ana gəm.

¹⁷ Wə doŋ kel gə minti are ziinu guudu diiri minti wə ɗee la gerdeŋ. Wə a wəra hãã ajewa bə bandə-bande cuuru ɗaw.

¹⁸ Are gaanaŋ seenə are guudu na gəm, tó bə minti kaŋ həgu səmu wəra hasi aduubə də kaa kə Tapiŋa keɗe gud bə minti wə waate *Kel pəsaŋ kəmarwaŋ wəra a kuɗiŋaŋ.

¹⁹ Ada pa ha'aŋ, kaa kə Tapiŋ a ŋəmnu minti wə ɗee la də are gud joŋre tó pisi bə taareŋaŋ haa té. Are haŋ joŋre toŋ haa bə veɗe boblo kə Barkaŋ wəra daana bə ge dər kaŋ cəərə ɗiki naareŋa minti are gə balə-bele keye kaŋ.

²⁰ Cəərə joŋre bə kasi are bə cəərə soloy tó bobloŋaŋ, are bə ji wəra anə keɗe-keɗe minti hulum a neke bə waate kel kə bayməlaŋ cuuru ba.

²¹ Gud maa mo are bele ji pisiŋ haa paapa tiinə Barkaŋa təwa ba, are bele jəw tiinə kaa kəsarkaŋa gəm.

²² Are gaanaŋ seenə are baalaŋ guudi na ada na pa. Wə haa hulum bə minti are guldunu kuɗu a kela ablaw, wə jəŋ saksaki hulum bə minti bande də joŋre. Hebkəna ha'aŋ, wə ziinu guudu máŋ pisi ze gud bə minti wə gole haa cəərəŋa ablaw.

²³ Titi haa hulum bə minti are ji joŋreŋ də kumsə areŋ, are bə jəwa a nəənəŋ hebkəna haa duuru. Kə kəsaanə áŋ gə guuduŋ, vəənəy na haa kaa kə Tapiŋ, yə haa kaa gə minti bə veɗe boblo kə Kristuŋa wəra də joŋre neeteŋ gəm.

²⁴ Aŋ gay diri la wəra cəərə bele nəəti bə siriŋa kir minti kaa kə Tapiŋ asə la minti wə gəəzi daana minti ku are bə minti are ufnu dəərəŋ tiiniŋ, wə gəəzi gəm.