II KOREŊTƏŊ 7 - JAA TƏMARWAŊ

¹ Aŋ gədaarən gə agŋ-agŋ, Pepeŋ a waataŋ sam kar teŋ warda keɗe a áŋ. Gud teŋa ta, baymele bə minti zode áŋ a kusuki də áŋa daana dər ɗiki də áŋaŋ, áŋ pəw la wəra ku tarmə áŋa keɗe, áŋ jəə la wəra dəra'i a Pepeŋ gud bə minti áŋ ji walka kəəsuŋ.

Waale kə Pol

² Aŋ aye ku tarməyaŋ la a are. Are jəŋ hulum anə məna baymele ba, are kuŋ hulum anə məna ba, are jəŋ dər hulum anə məna bə gəm.

³ Ten waataŋ kel teŋ haa paapa bə doŋ də kəəti ba. Gud maa mo ten a waatənaŋ də ne warda minti aŋ haa gədaarə are gə agŋ-agŋ gə minti áŋ ji yaŋ də kumsə áŋ a zugi də are hebkənaŋ, koo nuutu bə minti áŋ wəra gə mee-meŋ.

⁴ Ten gole haa cəərəŋa ablaw faɗi, ten bə ufi kuna dəərəŋ, dərən də teŋə-teŋe wəra hasi gəm. Ku gəəli naareŋa keɗeŋ, waaleŋ hare bə jubi wəra jubi ku tarməyana ɗaw.

⁵ Gud maa mo are tuukuŋ Masedəwan naŋ, are faakaŋ ba, are ŋaftaŋ də gidiirə gəəliŋ faɗi, gal taakawa haa anə gəbaŋ də kaŋ, gal akera haa ɗiki bə hoyə-hoyeŋ.

⁶ Səma Pep bə minti teŋe dər kaa gə minti tərməyi a wəra də camə-cemeŋ, haraŋ bə teŋe dər are də tuli kə Titiŋ.

⁷ Teŋeŋ dər are haa paapa tuli du təwa ba, haa kel gə minti aŋ tiŋnu duru da diiriŋ gəm. Wə topoŋ bəlam də kel a are minti aŋ wəra də caadə ŋefe dəərən kə ablaw kə ablaw, cəərə marva də kuŋa, cəərə bande nəəti bə guudənaŋ. Ten əskəŋ kel teŋ anəkay, waaleŋ zeŋ guudu sarəna hasi.

⁸ Ten wəra bə asə-ase minti kefter bə minti ten jeereneŋ dəŋ na ajew, wə aynaŋ laawe, səma wə ɗəkən ba. Wə a ɗəknən nuutu bə minti ten asnaŋ gə kolə-kole laawe dər ko toŋa sawəwa ta'aŋ.

⁹ Səma bə hebkənaŋ ten də waale. Ten waalaŋ haa paapa gud laawe nəətiŋa ba, ten waalaŋ haa gud bə minti laawe nəəti toŋ zeeneŋ guudəŋ bə kole kerkəŋa a baymeleŋ ɗaw. Wə jəŋ sarəŋa haa də giidə Pepeŋ. Bədoona ana ta, are jəŋ karman bə baymele sarəŋa anə məna ba.

¹⁰ Gud maa mo laawe bə minti de giidə Pepeŋ, ge hulum bə kole kirku a baymele nuutuŋ bə fele seereŋ. Ɗiki də laawe toŋ de hulum ba. Səma laawe bə minti bə kə kaa gə cəərə seŋkaŋ anaŋ, ɗe a mele kaŋ a meŋa.

¹¹ Haa kənaŋ kar gə minti laawe bə minti de giidə Pepeŋ jiiniy sarəŋaŋ: aŋ gə doo-de cəwaŋ! Aŋ bə bele ge dəra minti aŋ bele baymele pədaŋ! Aŋ gə kolə-kole waŋ cəərə jəəti bə baymeleŋaŋ! Aŋ jəŋ walka wəraŋ! Aŋ də caadə minti áŋ ŋafə laŋ! Aŋ bə bande wəra bandeŋ! Aŋ ke daŋgay a kaa kə ji baymeleŋ! Aŋ jəŋ wəra də gidiirə hel anə dəra'-dəra'i keɗe bə veɗe wəra minti aŋ paapa gə tapə-tepe də kel teŋ ba faɗi.

¹² Kefter naayaw tó bə minti ten a jeereneŋ dəŋ naŋ, ten jiirunu haa paapa gud kel kə hulum bə gerdeŋ tó bə minti jəŋ baymeleŋ ba, paapa gud naayaw tó bə minti wə juunu baymeleŋ bə gəm. Ten jiirunu na haa naŋ bə gaŋ dərəŋ wəra tiinə Pepeŋa cəərə bande nəəti bə gud areŋa.

¹³ Haa kəya karman bə minti are fəlaŋ teŋe bə dər guuduŋ. Are fəlaŋ paapa teŋe bə dər təwa ba, are jəŋ wəra də waale ablaw gəm gud waale kə Titiŋa bə minti aŋ haraŋ bə məlu ɗiki du daŋ.

¹⁴ Bə minti ten a gaanaŋ dəŋ naŋ, ten ufuŋ kun dəərəŋ tiinu. Bədoona ana, aŋ kolnon kese ba. Damdi are waatənaŋ saksaki haa gəəziŋ anaŋ, ku are bə minti are ufnu dəərəŋ tiinuŋ, kaŋ wəra gə asə-ase minti yə kel kə gəəzi faɗi.

¹⁵ Bə minti cuuru haraŋ ne bə ɗiki cəərə humi bə kosoŋ nəəti bə cuuruŋaŋ, cəərə walka də minti aŋ miiriŋ wəra miiri bə daw irku duŋ, bele bə ku tərmuyuŋ cəərəŋaŋ zeedeŋ guudu ablaw faɗi.

¹⁶ Ten jəŋ wəra də waale gud bə minti ten bə nakə-neke bə gole haa cəərəŋa gud kel məntəŋ məntəŋa mo keɗeŋ.