II KOREŊTƏŊ 6 - JAA TƏMARWAŊ

¹ Are a joŋreŋa də kumsə are də Pepeŋ tə bə moŋ, are jəŋ kamkam minti pisi bə minti wə jəənəŋ dəŋ sarəŋaŋ, aŋ a boome duuru ba anə ceki.

² Gud maa mo, Pepeŋ a waataŋ wəra minti: «Bə minti ko bə ji pisiŋ sar kaŋaŋ nəkaŋ, ten əskənəm kum; bə minti ko bə seere kaŋ nəkaŋ, ten jamnam tulul dəm.» Aŋ jeɓrə la pisi, ko bə minti Pepeŋ ji pisiŋ a kaŋ nəkaŋ ne hebkəna ɗaw, hi bə minti wə seere kaŋ duruŋ haa dayna faɗi.

³ Are paapa gə balə-bele ji karman anə weseka minti wə kolə la bə daste kampar huluma ba, kir minti hulum a neke bə waate sam joŋre naareŋ baymele ba.

⁴ Ana ɗaw ha'aŋ, də ko muntu muntu mo keɗe, are vəɗaŋ kusrə are wəra minti are kaa kə joŋre kə Pepeŋ. Gud teŋa ta are məŋ dər gəəliŋa, dər lasiŋa, dər kel kə kalə-kele cəərə areŋa gəm.

⁵ Yə lətaŋ are, faktaŋ are a daŋgaya, dabtaŋ kaŋ cəərə are. Are gaytaŋ wəra, faltaŋ dər are bə awe kin ba daana bə hame karman bə gəm.

⁶ Ɗe də are cetceti, ase bə kar sar are, are mi ku kela, are ji pisiŋ sar kaŋa, are də Tiiru Cetcetaŋ giidə are, are bele kaŋ tarmə are wəra soki məna.

⁷ Are də kel kə gəəzə-gəəziŋ ku are, də səɓaki kə Pepeŋ. Are bə ji karman ɗekeriŋa dər Pepeŋa bə he ku kaa gə duuri areŋ wəra.

⁸ Sərdə kaŋ waate sam are pisi, gaalaŋ waate sam are baymele. Sirdiŋ aŋke are, sirdiŋ sarte are. Are gole diri damdi kaa kə ŋete kel ana, anaaŋa, are waate haa gəəziŋ.

⁹ Yə ji are damdi are paapa də diri ba ana, anaaŋa are wəra də diri kaŋkaŋ. Are gole diri haa bə me wəra, anaaŋa are anə gəgəgi lam. Yə lese are səma yə awe are wəra ba.

¹⁰ Yə kolte are laawe, səma are saksaki də waale. Are nuutu də caaca, səma are kolte kaŋ də hurma ablaw ɗaw. Are gole damdi karman paapa kasi are ba ana, səma a gəəziŋa kar wəra keɗe naare ɗaw.

¹¹ Aŋ kaanə Koreŋtəŋ, are waatənaŋ kel wəra kəkər, ku tarmə are jəŋ wəra də ayə-aye a nəənəŋ keɗe.

¹² Are balnaŋ ablaw, aŋ bəlaŋ bele are ba haa aŋ ɗaw.

¹³ Ten bə waataŋ kela haa bə karməyan gə giidən ana. Ku tarməyaŋ jəə la wəra də ayə-aye keɗe a are damdi naareŋ wəra də ayə-aye a nəənəŋ ha'aŋ ana gəm.

Aŋ a tepe wəra məna də kaa gə bay deŋ ba

¹⁴ Aŋ a tepe wəra məna bə kole kaa kə kumsuŋ də kaa gə bay de gud Kristuŋ ba. Aŋ golə la kəm mo, kel ɗekeriŋ tepe də korɗoŋ-korɗoŋiŋ naanaanə mo? Pəɗakiŋ tepe də tilməŋ naanaanə mo?

¹⁵ Ku Kristu də Nərtitiŋ tepe haa naanaanə mo? Hulum bə doo-deŋ də hulum bə bay deŋ, kuy tepe haa naanaanə mo?

¹⁶ Kuli kə Pepeŋ də kar gə minti kaŋ guluy pepe neeteŋ, yə ji a ko bə məna naanaanə mo? Gud maa mo, áŋ də kusrə áŋ haa kuli kə Pep bə dədərgəŋ faɗi, damdi wə a waataŋ warda ana minti: «Ten isi yaŋ aduubə di, ten ɗe yaŋ aduubə di gəm. Ten bə ji yaŋ Pep neeteŋ, yə bə ji yaŋ kaa katən gəm.»

¹⁷ Barkaŋ Pepeŋ waataŋ pa minti: «Aŋ zee la wəra aduubə də kaa kə bay de teŋa, aŋ əsə la wəra bay cəərəŋ hal. Aŋ a ɗoote kel gə minti paapa *cetcetiŋ baŋ ba. Kəya ten doŋ yaŋ sarəna.

¹⁸ Ten bə ji yaŋ Bəraŋ, aŋ bə ji yaŋ karman keɗe, kaŋkar, kəram. Waataŋ kel teŋ haa Barkaŋ Bar Səɓakiŋ.»