II KOREŊTƏŊ 5 - JAA TƏMARWAŊ

¹ Kusrə are haa damdi muryukiŋ ana. Wəra də dər are minti muryuki tá də adawraŋ ɓalkaŋ ne wəraŋ, Pepeŋ ɗe a aye kuli baalaŋ a are apəy na, haa kusrə are kimirwiŋ. Jəŋ kuli toŋ paapa kaa kəsarkaŋ ba, wə haa kuli bə bay tewe bə minti Pepeŋ juunuŋ.

² Hebkəna ha'aŋ, are bə nuumi kas gəəliŋ gud maa mo caadə dere kuli naare tó bə apəyaŋ cəərə nayto bə adawraŋa damdi yə dere dəməəmə anaŋ, wəra sar are hasi.

³ Bə minti are darna ne cəərə areŋ, are ji paapa wəra ŋəray laki ba, tiirə are bə ji yaŋ saksaki də kusrə cəərə.

⁴ Gud maa mo bə minti are zugi də kusrə are bə adawraŋ, are bə nuumi kas eele bə gəəliŋ. Are paapa də caadə minti are yaakə kusrə are bə adawraŋ la wəra ba. Səma are bele haa minti Pepeŋ ayə kusrə are bə apəyaŋ la a are cəərə nayto bə adawraŋa kir minti kusrə are tó bə meŋ, kolə la wəra kusrə are bə minti me hõy baŋ.

⁵ Pepeŋ ɗampaŋ are wəra cəərə teŋa haa tó də kusru. Wə ayaŋ Tiiru Cetcetaŋ a are, wə deŋeŋ kar gə minti wə bə ɗe yaŋ a əyəy a areŋ haa dəərə.

⁶ Bədoona ana ta, are paapa bə dere hora ba anə ceki, koo nuutu wəra də dər are minti are jəəne kəm zugi də kusrə are bə adawraŋ, are kəm wəra tooto sar ko bə minti Barkaŋ adaŋ.

⁷ Haa bə waate minti are bə ɗe paapa gud karman bə minti are bə əsuŋ ba, are bə ɗe haa gud de naareŋa.

⁸ Gəəzi are paapa gə darə-dere hor anə weseka ba. Are bə golde haa ɗaw minti are yaakə kusrə are bə adawraŋ la wəra, bə ɗe a isi sar Barkaŋ na.

⁹ Jəəne nuutu minti are kəm zugi də kusrə are bə adawraŋ, ɗawba are yəəkunu ne wəraŋ, are golde ajew anə faɗi haa minti are doo dər Barkaŋ la.

¹⁰ Gud maa mo áŋ keɗe kir ɗe tiinə Kristu bə ɗe a waate sam kusrə áŋ wəra. A ko toŋa ta, mindi mindi mo fele werke nuutuŋ haa də aŋar də kel pəsaŋ ɗawba gə bayməlaŋ gə minti wə a jiiniy kanna adawra naŋ.

Kristu tepe kaŋ də Pepeŋ

¹¹ Bədoona ana, are gə asə-ase humi bə kosoŋ bə cəərə Barkaŋ ŋaanaanə moŋ, are bə golde haa minti ɗiki də kaŋ kolə la bə mele haa cuuru. Pepeŋ bə asə-ase də are wəra anə kaŋkaŋ, ten bə ɗiki haa ana gəm minti aŋ yaŋ nuutu gə asə-ase wəra dəərən də ɗiki dəŋ anə kaŋkaŋ.

¹² Are bele hare bə veɗe kusrə are a nəənəŋ veɗe ba. Səma are jəŋ haa minti aŋ falə kəkəy la bə ufi kuŋ də are. Bədoona ana ta aŋ neke yaŋ bə harte kel a kaa gə minti ufi kuy də kel gə minti siri kəna kerkə ko anəkay təwa faɗi, səma gal aker na haa kel kə booboŋ.

¹³ Aŋ haa minti are də mələr mo? Jəəne minti are də mələr, teŋ haa kel naare də Pepeŋ. Jəəne minti are paapa də mələr baŋ, kel teŋ keye haa aŋ.

¹⁴ Gud maa mo, bə zogte gud are ada haa bele kə Kristuŋ, gud bə minti are gə asə-ase cəərə are wəra kaŋkaŋ minti hulum məna meŋ wəra gud kaŋa keɗe. Bədoona kəya, kaŋ wəra keɗe gə mee-me haa duuru.

¹⁵ Wə meŋ wəra gud kaŋa keɗe haa minti kaa gə minti zugiŋ, a ji kir kasi kusri pəda, yə jəə la máŋ kir kasi hulum bə minti a meŋ wəra daana haraŋ wəra dədərgə guudiŋ.

¹⁶ Hebkəna ha'aŋ, are paapa bə gole huluma damdi kaa kəsarkaŋ ɗiki duuru bədoona anaŋ ba. A jəŋ ha'aŋ, are a bə gole Kristu haa də ɗiki neete toŋ faɗi, səma bə hebkənaŋ, are paapa bə gulu bədoona pəda.

¹⁷ Bədoona ta, hulum bə minti wəra bə tapə-tepe də Kristuŋ, wə máŋ hulum kimirwi. Kəya kar gə dayday gə minti wə a bə ɗe guudiŋ pa pəda, wə bə ɗe máŋ haa gud kaayaŋ kəmarwaŋa.

¹⁸ Ji kel teŋ keɗe haa Pepeŋ. Wə haraŋ bə tepe aduubə də áŋa duuru haa də Kristu. Ayaŋ joŋre bə məntu kaŋ da bə bi a tepe aduubə di duuru a areŋ haa tó gəm.

¹⁹ Gud maa mo Pepeŋ haraŋ bə tepe aduubə di də kaa kəsarkaŋ haa də Kristu, wə əŋkənəy baymele neeteŋ ciiri ba. Wə ayaŋ joŋre toŋ a are bə wəətəy cəərə tepe bə aduubə diŋa duuruŋ.

²⁰ Are haa kaa gə minti Kristu vaŋ are warda bə bi a əsti a kuɗuŋ. Kel teŋ haa minti Pepeŋ mantaŋ də kel gə ku areŋ haa tó. Gud sam Kristu, are jəŋ kamkam, aŋ ayə kusrəŋ la a Pepeŋ bə tepe aduubə dəŋ duuru.

²¹ Kristu jəŋ baymele hõy ba anə ceki, səma Pepeŋ məlaŋ baymele náŋ wəra cuuru kir minti áŋ kolə la wəra dər tó ɗeker gud tepe náŋa də Kristu.