II KOREŊTƏŊ 4 - JAA TƏMARWAŊ

Are haa bə gədaayaw gedel ana, səma kar pəsaŋ giidə are

¹ Pepeŋ gud ji bə giidu pəsaŋa ayaŋ digi taŋ a are. Gud teŋa ta tarmə are paapa də darə-dere hor ba.

² Are de haa də kel gə minti kaŋ jiitiy dəgaaya-dəgaaya daana gə kes-keseŋ keɗeŋ ba. Are ji kel naareŋ paapa də kel kə tiwki ada ba, are paapa bə tapte dər kel kə Pepeŋa də kel kə ŋetə-ŋete bə gəm. Ana ɗaw ha'aŋ, are ke wəra haa gud gəəziŋ a kaŋ saksaki, kəya yə neke bə ase faɗi minti kel naareŋ wəra ɗeker tiinə Pepeŋa.

³ Sərdə kaa yaŋ, yə iski *Kel pəsaŋ kəmarwaŋ gə minti are bə wəətiyaŋ ba. Kaa teŋ haa kaa gə minti bə ɗe a beseŋ.

⁴ Yə iski ba gud bə minti Nərtitiŋ, kumna bə cəərə seŋkaŋ, biwini ɗiki di wəra. A hay kuy wəra minti yə a ase pəɗaki də Kel pəsaŋ kəmarwaŋ gə minti waate sam boblo kə Kristuŋ wəraŋ ba. Tó Kristu bə haa-he haa Pepeŋ derra faɗi.

⁵ Gud maa mo, are waate haa paapa sam kusrə are ba, are waate haa sam Yeesu Kristu Barkaŋ faɗi. Jəəne cəərə are kənaŋ, are waataŋ wəra anə faɗi haa minti are kaa kə joŋre nəəti gud Yeesu.

⁶ Pepeŋ a waataŋ warda minti: «Pəɗakiŋ walə ko bə tilməŋ la wəra.» Wəlaŋ koŋ wəra ku tarmə áŋa haa tó də kusru bə ge áŋ bə ase boblo nuutu bə minti bə welɗe wəra dər Kristu anəkayyaŋ.

⁷ Are haa bə gədaayaw gedel ana, səma hurma tá pas-pasaŋ giidə are. Pepeŋ jəŋ bədoona bə ge dər minti səɓaki də deŋe kumsə tá də sar areŋ, a paapa dər naare ba, a haa kə tó.

⁸ Gidiirə gəəliŋ peeteŋ are wəra peete, səma are caŋ wəra kəəsu ba. Ko bə minti are sə a cəkɗu wəra baŋ, are cəkɗunu wəra.

⁹ Kaŋ ləsaŋ are, səma are paapa gə bayə-beye wəra ba. Yə salɓaŋ are warna, səma are bəsaŋ adawra gə mee-me ba.

¹⁰ Meŋ bə golde are saksaki damdi wə goldoŋ Yeesu ana, kir minti kaŋ asə dədərgə kə Yeesu la sar are gəm.

¹¹ Gud maa mo are gə minti zugiŋ, are wəra saksaki gə warə-were a meŋ gud Yeesu kir minti dədərgə du vaɗə la wəra sar kusuki də are bə minti bə ji saksaki baŋ gəm.

¹² Bədoona ana, meŋ bə ji joŋre sar are kir minti aŋ falə dədərgəŋ la.

¹³ Hulum jeereŋ giidə Kefter kə Pepeŋa minti: «Ten doŋ gud Pepeŋa, gud teŋa ta ten waataŋ kel wəra.» Are gəm, are doŋ guudu haa bə hulum toŋ ana gəm. Gud teŋa ta, are waate kel kə Pepeŋ wəra.

¹⁴ Wəra də dər are minti Pep bə minti haraŋ Barkaŋ náŋ Yeesu wəra dədərgə adordə meŋaŋ, wə bə hare are yaŋ wəra dədərgə gud tapi naareŋa də Yeesu. Are dəərəŋ, wə ɗe a isi áŋ yaŋ suru na.

¹⁵ Gud maa mo kar gə minti are jəy keɗeŋ, are jəy haa guudəŋa kir minti kaa gə minti Pepeŋ jəŋ pisiŋ siriŋ, zulə la pisi zuli. Bədoona ana ta, kaŋ ji yaŋ ablaw pisi jəə bə ji suuseŋa a Pepeŋ bə əyu tokɗeŋ.

Ɗiki də are bə malə-mele cəərə kar gə ajew na

¹⁶ Gud teŋa ta, tarmə are paapa də darə-dere hor ba. Kusrə are jəəne nuutu bə ze guudu geyeŋ pisi ze ɗaw, gal giidə are ha'aŋ, Pepeŋ bə aye səɓaki ada a hiŋa saksaki.

¹⁷ Lasi də minti are bə saara hebkənaŋ, a ŋəraŋ ne də boblo bə minti are fəlu yaŋ apəy na gud bə minti are saanaŋ, a gole dər are haa anə weseka daana bə isi anə sawəwa bagŋ. Bə ɗampe boblo tó bə bay teweŋa, haa tá faɗi.

¹⁸ Are məlaŋ dər are haa paapa cəərə karman bə minti wəra kəkər caw ba, are malna haa cəərə karman bə minti tam əsu də dərəm baŋ. Gud maa mo karman bə minti áŋ əsu də dər áŋ, toŋ haa bə kaadəəməy, səma karman bə minti áŋ ase toŋ də dər áŋ baŋ, toŋ haa bə bay teweŋ.