II KOREŊTƏŊ 3 - JAA TƏMARWAŊ

Jaa təmarwa də minti Pepeŋ doona də áŋ

¹ Aŋ bə ɗiki haa minti are hare bə hage sam are haa hage a kəkəy bə waataŋ kel teŋa mo? Kaa kəman yaŋ ha'aŋ, yə bi də kefter kəəsi ɗawba aŋ jiiriy kefter kəəsi bə vaɗte kusri wəra. Aŋ ɗiki haa minti are kir ji bədoona ana mo?

² Aŋ haa kefter naareŋ faɗi, kefter bə minti bə jeerə-jeere ku tarmə are bə minti kaŋ keɗe neke bə əsu, bə əŋku gəm.

³ Kel wəra bə ge dəra pəɗaki minti aŋ haa kefter bə minti Kristu jiirunuŋ, are jugnu warna gəm. Wə jeereŋ kefter toŋ paapa də karman bə jeere ba. Wə jiirunu haa də Tiirə Pep bə dədərgəŋ. Wə jiirunu paapa cəərə pərki pəmpərəŋi ba, wə jiirunu haa ku tarmə kaa kəsarkaŋa faɗi.

⁴ Are waate kel teŋ bədoona haa gud bə minti ɗiki də are wəra bə malə-mele cəərə Pepeŋa gud tapi naareŋa də Kristuŋ.

⁵ Haa paapa bə waate anə faɗi minti are gə nakə-neke bə de ku joŋre toŋ wəra də səɓaki də are ba. Səɓaki naare də daw ku wəraŋ bi sar Pepeŋ da.

⁶ Koloŋ are wəra gə nakə-neke bə ji joŋre tó bə waate sam *jaa təmarwaŋ haa tó. Jaa taŋ, guudə gaŋ paapa cəərə *ku gili kəmana bə jeerə-jeere wəra lam ba, guudə gaŋ haa cəərə Tiiru Cetcetaŋa. Ku gili bə jeerə-jeereŋ ɗe a mele hulum a meŋa; kə Tiiruŋ, taŋ ɗe a məlu haa a dədərgə də bay teweŋa gəm.

⁷ Ku giliŋ a jəŋ bə maltə-malte də jeereŋ cəərə anə pərki pəmpərəŋi. Də ko bə minti wə bə jeereŋ ha'aŋ, boblo kə Pepeŋ vəɗaŋ kusru wəra, gud maa mo dər *Moyisi anəkayya koloŋ bə welɗe, hãã bə minti kaanə Israyel a nəkaŋ bə gulu duru pədaŋ. Ana ha'aŋ, welɗe toŋ haa bə hiti maki bagŋ. Jəəne minti ku gili tó bə minti joŋre duŋ haa bə mele kaŋ a meŋaŋ vəɗaŋ gud boblo kə Pepeŋ wəra a kəkəy bə ceme duŋa,

⁸ máŋ bə joŋre kə Tiiru Cetcetaŋ mo? A veɗe gud boblo kə Pepeŋ wəra a kaŋ kampa ablaw dəŋaŋ nayto bə gud joŋre kə Moyisiŋ bə ɗaw mo?

⁹ Ku gili bə minti a gaŋ kəətiŋ bə humi kaŋaŋ vəɗaŋ boblo kə Pepeŋ wəra tə bə moŋ, jaa təmarwa də minti koloŋ áŋ bə gole ɗeker dər Pepeŋaŋ, vəɗu wəra dəŋaŋ ku giliŋ kampa aniinə mo?

¹⁰ Kəya karman bə minti a vəɗaŋ welɗe bə boblo kə Pepeŋ wəra a kaŋ dayday, wə ŋəraŋ ne də nayto bə minti kumsu bə ŋəru paapa, bə minti pəŋ duru wəra hebkənaŋ, wə paapa karman ba.

¹¹ Gud maa mo, jəəne minti karman bə minti a jəŋ haa bə hiti maki bagŋ vəɗaŋ boblo kə Pepeŋ wəraŋ, jaa təmarwa də minti taŋ bə ji yaŋ saksakiŋ vəɗu wəra dəŋaŋ toŋ kampa aniinə mo?

¹² Are məlaŋ ɗiki də are cəərə kar teŋa tə bə moŋ, are waate kel kə Pepeŋ wəra a kaŋ bay walka.

¹³ Moyisi əntəŋ dəməəmə wəra duru gud bə minti wə a paapa bə balə-bele minti kaanə Israyel asə la wəra minti welɗe bə duruŋ maŋ bə tewe wəra ba. Are paapa bə ji akas tó ana ba, are meteŋ karman wəra anə məna ba.

¹⁴ Səma kaanə Israyel nəŋəŋ wəra dər ɗiki di. Kel teŋ hãã kəm dayna siri bədoona. Yə ɗəlaŋ ne bə aŋke kefter bə jaa də ajewaŋ, yə usku guudu ba, yə haa damdi yə əntəŋ dəməəmə taŋ wəra diri ana pa. Gud maa mo, yə jəəne paapa gə tapə-tepe də Kristu baŋ, dəməəmə taŋ foke wəra diriya bə gəm.

¹⁵ Gəəzi, hãã dayna yə ɗəlaŋ ne bə aŋke kefter kə Moyisiŋaŋ, yə ji damdi dəməəmə taŋ wəra kəm dər ɗiki di ana.

¹⁶ A foke wəra haa də ko bə minti mindi mindi mo koloŋ ɗiki du ne gud Barkaŋaŋ təwa faɗi.

¹⁷ Barkaŋ haa kənaŋ Tiiru Cetcetaŋ. Tiirə Barkaŋ əsəŋ ne a ko kəmanaŋ, bidiŋ wəra haa a ko toŋa gəm.

¹⁸ Áŋ keɗe gə minti dəməəmə paapa də əntə-ənti dər áŋa pədaŋ, áŋ veɗe wəra haa welɗe bə boblo kə Barkaŋ. Bədoona ana, áŋ gə kolə-kole wəra gə haa-he Barkaŋ, welɗe bə boblo nuutuŋ bə ze guudu pisi ze sar áŋa. Haa kəya joŋre bə minti Barkaŋ, bə minti haa Tiiruŋ, bə jəwaŋ.