II KOREŊTƏŊ 2 - JAA TƏMARWAŊ

¹ Bədoona ana ta, ten koloŋ ɗiki dən minti ten hare kəm gerdeŋ na baŋ, haa minti ten a ɗe a hare bə vaŋa dər laawe ba.

² Gud maa mo, ten kolnoŋ ne wəra laaweŋ, neke bə ayan waaleŋ haa mindi pə mo? Hulum bə minti ten kulnu laaweŋ, wə neke yaŋ nuutu bə ayan waale mo?

³ Ten a paapa bə balə-bele minti ten tuluŋ ne gerdeŋ naŋ, ten kolə laawe la gud kaa gə minti sə a ayan waaleŋ ɗaw ŋaanaanə moŋ ba. Ten wəra bə doo-de haa guudəŋa minti ten jəəne də waaleŋ, aŋ də waale keɗe gəm. Haa karman bə minti ten a jeereneŋ kefter guudu naŋ faɗi.

⁴ Gəəzi, a kəkəy bə jeereŋ kefter toŋ daŋ, ɗikiŋ daana laaweŋ doonon anəkay. Ten jiirunu haa bə hage də kan kə dərən. Ten jiirunu paapa bə ayaŋ laawe ba, səma bə gaŋ dərəŋ minti ten bəlaŋ wəra hasi ɗaw.

Pol waate sam vəəgi bə giiduŋ cəərə hulum bə laŋə-leŋeŋaa

⁵ Hulum yaŋ adəwaldəŋa bə minti a jəŋ kel kə aye laawe a kaŋ, yə ayaŋ laaweŋ daŋge paapa a nəənən ba, yə əynu daŋge haa a aŋ keɗe, paapa-paapaŋ, a sərdəŋ adəwaldəŋa. Bə rəəwəy takəra baŋ, ten zene kəm anə ga'i.

⁶ Təbay də minti kaa kə ablaw jamna a hulum toŋ nakə la bədoona anə ga'i.

⁷ Gud teŋa ta, aŋ hebkəna kir əyu vəəgi bə giidu daana teŋe bə dər ɗaw kir minti wə a awe dər laawe bə gaw bə lintu wəra ba.

⁸ Bədoona ana ta, ten jəənəŋ kamkam minti aŋ gaa gud bele nəətiŋ la wəra suru.

⁹ Gud maa mo karman bə minti ten a jeereneŋ kefter guuduŋ haa bə goloŋ koɗoŋ minti aŋ yaŋ nuutu bə humi kosoŋa ɓet-ɓeti cəərəna a kara keɗe mo?

¹⁰ Aŋ vəəgəŋ giidiŋ ne wəra cəərə baymele kə hulumaŋ, ten vəəgi giidən wəra cuuru gəm. Bə minti ten vəəgi giidən, (karman a yaŋ ne kir minti ten vəəgi giidən wəraŋ), ten jəw haa guudəŋa tiinə Kristu.

¹¹ A kəkəy bə jəəti bədoonaŋ, Sataŋ fele ko bə ji tiniini də náŋ ba. Gud maa mo tiwki naataŋ wəra də dər áŋ kaŋkaŋ.

Ɗiki də Pol hoye

¹² Bə minti ten tuluŋ Torwasi bə ɗe a waate *Kel pəsaŋ kəmarwaŋ gə cəərə Kristuŋ adaŋ, ten fəlaŋ ha'aŋ, Barkaŋ a bəŋnən kəkəy ne wəra tiinina bə wəətiya.

¹³ Də teŋ keɗe, ɗiki dən a kəm bə hoyona gud bə minti ten fəlaŋ Titi seenə áŋ ada baŋ. Gud teŋa kəya, ten mirkiŋ kaanə Torwasiŋ mirka, ten raawaŋ Masedəwan ha'aŋ faɗi.

Bulum də minti are pəərə gud Yeesuŋ

¹⁴ Are tokɗe Pepeŋ, gud maa mo wə keye are bə pi buluma cəərə gəəliŋa gud bə minti are gə tapə-tepe də Kristu, wə bə ɗe tiinə are gəm. Wə jəŋ kir minti kaŋ asə Kristu la wəra a koŋa keɗe damdi siisi də urde bə minti duusi warna a koŋ na keɗeŋ ana gəm, haa də are.

¹⁵ Gud maa mo are haa damdi urde bə siisi pisi bə de dər Pepeŋ bə minti Kristu əyu duŋ ana. Siisi də urde toŋ duusi warna cəərə kaa gə minti haŋ kəkəy bə ɗe a seereŋ də kaayaŋ gə minti haŋ nayto bə ɗe a beseŋ gəm.

¹⁶ Kə sərdə kaa ha'aŋ, siisi duŋ wəra baymele hasi daana yə fele meŋ guudu tiinə Pepeŋa. Kə kaayaŋ, haa siisi pisi hasi daana yə fele dədərgəŋ guudu. Mindi bə nakə-neke bə ji digi taŋ kəya mo?

¹⁷ Kaa yaŋ ablaw faɗi ji celeere də kel kə Pepeŋ bə golde fele, səma are teŋ paapa bə té ana ba. Pepeŋ vaŋ are haa tó. Kəya gud tapi naareŋa də Kristuŋ, are waate kel nuutuŋ wəra a kuɗiŋa anə ɓet-ɓeti tiinu.