II KOREŊTƏŊ 13 - JAA TƏMARWAŊ

Kel gə adoroŋ

¹ Ten ɗe a helɗeŋ hebkəna na haa kampa bə soopeŋ. Giidə Kefter kə Pepeŋaŋ, kel ada gə jeerə-jeere minti: «Kel gə minti hulum gaŋ kumsuŋ ne diiriŋ, kəmnə də kəkəy gə waate minti yə yaŋ bədoonaŋ jəə la ɓasi mo, soope mo to'i.»

² Bə minti ten a ɗeŋ gerdeŋ na kəm kampa bə ɓasiŋ faɗiŋ, ten gaŋ kosnə kaa gə minti jəətəŋ baymeleŋ da. Bə minti ten wəra hebkəna sarəŋa tootoŋ, ten hare bə ge kosnə kaa té gə minti a jəətəŋ baymeleŋ də kaayaŋ gə minti bə juutu keɗe'iŋ gəm minti ten ɗeŋ ne akaceŋa naŋ, ten geɗe hulum bay gili ba.

³ Aŋ bə golde minti waate kel kuna haa Kristu moŋ, aŋ əsu yaŋ wəra ada faɗi. Kristu paapa də nalnal tiinəŋa ba, wə bə ji joŋre də səɓaki aduubə dəŋa faɗi ɗaw.

⁴ Bə minti yə ɓəlnu wəra a kəbaŋ kə largaŋaŋ, kusru jəŋ də nalnal gəəzi, səma bə hebkənaŋ, wə caw dədərgə haa gud səɓaki kə Pepeŋa. Are gə tapə-tepe duuru gəm ŋaanaanə moŋ, are dər nalnal nuutuŋa gəm, səma guudu ha'aŋ, aŋ ase yaŋ gud joŋre naareŋa aduubə dəŋa minti are zugi dədərgə haa gud səɓaki kə Pepeŋa gəm.

⁵ Aŋ yaŋ nuutu bə ɗe gud de nəəti bə gud Pepeŋa moŋ, aŋ latə ku kusrəŋ la bə gole koɗ kusrəŋ. Wəra də dərəŋ minti Kristu bə əsə-isi giidəŋa, jəəne minti gole bə koɗ kusrəŋ koloŋ karman bə gaŋ dərəŋ minti aŋ dər deŋaŋ.

⁶ A ɗiki dəna, aŋ wəra gə asə-ase minti are goloŋ koɗ kusrə are, are nəkaŋ bə gaŋ dərəŋ wəra faɗi minti are kaa kə vaa-veŋ gəəzi.

⁷ Are bə toose Pepeŋa minti aŋ a ji baymele kəman anə məna ba. Are jəŋ bədoonaŋ haa paapa minti kaŋ ɗəkə la minti joŋre naareŋ pisi bə ana ba ŋaanaanə moŋ ba, are bəlaŋ haa minti aŋ jəə la haa pisiŋ jəəne nuutu minti kaa kole bə ɗiki minti are dəyaŋ wəra ku joŋre naareŋa baŋ.

⁸ Gud maa mo are paapa gə nakə-neke bə ji karman bə minti tepe də gəəziŋ baŋ ba, are ji haa kel gə minti zew guudu ajewaŋ təwa.

⁹ Are də waale bə ji dər nalnala jəəne minti wə kolnoŋ də səɓaki a deŋa gəəzə-gəəziŋ. Gud teŋa ta, are bə toose Pepeŋa cəərəŋa minti wə kəyaŋ la bə ɗampe ɗe dəŋa wəra a kuɗuŋa pisi.

¹⁰ Ten jeereneŋ kefter toŋ kaynaŋ haa də bə minti ten kəm warna kanna tootoŋ minti ten bə tuluŋ ne gerdeŋ naŋ, kel kəman a ɗe a han guudən bə cəmaŋ təbay də abaya də minti Barkaŋ aynan dən ba. Wə aynan dən haa bə kəyaŋ, paapa bə ɓalkaŋ wəra ba.

¹¹ Kəsaananti, bə ge cəərə kel katən, ten waataŋ minti aŋ jəə la dər waaleŋa. Aŋ jəə joŋre la minti aŋ kolə la kaa kə doo-de kuy wəra a deŋa, aŋ teŋə dər kumsəŋ la, ɗiki dəŋ jəə la məna, aŋ jəə la kəkaɓi sar kumsəŋa, kəya Pep bar beleŋ bə minti aye kəkaɓiŋ ji yaŋ dəərəŋ.

¹² Aŋ mirkə kumsəŋ gə doo-de la wəra anə təfaɗ-təfaɗi aduubə də kumsəŋa. Kaa kə doo-deŋ keɗe bə mirkiŋ na.

¹³ Pisi kə Barkaŋ Yeesu Kristuŋ, bele kə Pepeŋ, daana tapi kə Tiiru Cetcetaŋ, jəə la dəərəŋ keɗe.