II KOREŊTƏŊ 12 - JAA TƏMARWAŊ

Pol waate kel gə minti wə əsnəy

¹ Ten kir raawe də hage bə sam kusrən tə bə moŋ, də teŋ keɗe wəra haa kel kə boobo. Hebkəna ha'aŋ, ten waate sam kar gə minti Barkaŋ gaanan dərən ciiri a sooneŋa daana vaɗnan dən.

² Hulum yaŋ də dərən bə minti bə tapə-tepe də Kristu. Laate hebkəna hor cuuru waaɗe, Pepeŋ həənu warna a ko bə daŋə-deŋe kumsuŋ na apəy na girdu na. Wə həənu haa də kusuki du keɗe mo, ɗalba tiiru təwa mo, teŋ paapa də dərən ba, ase teŋ haa Pepeŋ təwa.

^3-4 Wəra də dərən minti Pepe haŋ hulum toŋ warna a *Paradisiŋ na. (Wə həənu haa də kusuki du keɗe mo, tiiru təwa mo, teŋ də dər Pepeŋ təwa.) A ko toŋ na ta, wə əskəŋ kel pəsaŋ gə minti neke bə waate wəra ku huluma baŋ, gə minti kəkəy paapa cəərə huluma bə juguy warna a kaŋ bə gəm.

⁵ Ten wəra bə ɗampə-ɗampe bə ufi kun haa də kumsə hulum toŋ kəya. Cəərə kel də kusrəna ha'aŋ, ten ufu haa minti ten də nalnal təwa faɗi.

⁶ Də teŋ keɗe, ten a bəlaŋ ne kəna minti ten ufi kun, ten sə a ji paapa də mələr a kəkəy bə ufuŋa ba gud maa mo ten bə waate wəra haa gəəziŋ faɗiŋ. Səma ten bele ba kir minti ten a gole dər kaŋa hulum boblo gud teŋa ba. Yə golə la haa joŋre katən daana kel gə minti ten bə wəətiyaŋ bə fəlan ko katən.

⁷ Kar gə minti Pepeŋ a vaɗnan dən wəraŋ, yə paapa gə tapə-tepe də kumsiŋ ba. Səma bə minti ten a kole bə he cəərə kusrən apəya diiri baŋ Pepeŋ aynan lasi də gəəli-gəəli dər kusuki dəna, a damdi hulum bə digi kə *Sataŋ bə minti bə gaa-ge bə lətana ana.

⁸ Kəya ten toostoŋ Barkaŋ kampa soope minti wə bədən la wəra ku.

⁹ Səma wə waatənan minti: «Pisi katən bə minti ten jəənəm dəm sarəmaŋ naknam ne. Gud maa mo, səɓaki katən neke bə ge gud kusrə wəra keɗe haa dər nalnal də sar huluma.» Bədoona ta, ten ufi kun haa minti ten də nalnal kir minti səɓaki kə Kristuŋ əsə la giidəna.

¹⁰ Gud teŋa ta, ten waale gud nalnal katəna, gud sarteŋa, gud gəəliŋa, gud lasiŋa, daana gud kel gə kaltan cəərəna gud kel də Kristuŋ. Gud maa mo bə minti ten də nalnal, haa də ko toŋ ta minti ten kole bə fele səɓaki də gəəzə-gəəziŋ.

Walka də minti ji Pol gud kaanə Koreŋtəŋaŋ

¹¹ Ten waate kel damdi hulum bə mələr ana a kəkəy bə ufi kuna, səma haanan guudən bə ji bədoona haa aŋ. Aŋ sə a waate wəra cəərəna haa aŋ ɗaw. Gud maa mo ten jəəne nuutu paapa karman baŋ, ‹*kaa kə vaa-ve gə samsam› nəəti teŋ, yə paapa karman bə dəŋana anə weseki bə ɗaw.

¹² Bə minti ten a jəŋ gerdeŋ daŋ, Pepeŋ jəŋ kar gə ge dər wəra dəərən minti ten hulum bə gaa-ge kə Kristu wəra aduubə dəŋa: mi bə ku gidiirə kel keɗeŋ, kel kə məɗ-miɗiŋ, də kar kə ŋili kaŋ, də kel gə veɗe səɓakiŋ wəraŋ.

¹³ Karman bə minti ten juunu sar kaa kə Tapi kaayaŋa bə minti ten juunu sarəŋa baŋ, haa maa mo? Kel yaŋ məna, ten yaakaŋ kusrən bə eele huluma guudəŋa ba. Ten jəŋ baymeleŋ haa a ko toŋa ɗawmay, aŋ vəəgə giidiŋ la wəra cəərəna!

¹⁴ Ten wəra bə ɗampə-ɗampe bə hare gerdeŋ na kampa bə soopeŋ, ten bə ɗe a yaake kusrən bə eele huluma guudəŋa bə pa. Ten də caadəŋ aŋ də kusrəŋ, ten paapa də caadə soloy nəətiŋ ba. Gud maa mo, paapa joŋre kə kəmar koncoŋ minti yə kotə cəərə soloy la a kəmniŋ ba, səma kote cəərə soloy a kəmar koncoŋ haa kəmniŋ ɗaw.

¹⁵ Katən ha'aŋ, ten ɓalkaŋ kar gə kaasən ne wəra guudəŋaŋ, koo ten gəyaŋ kusrən ne wəra keɗe guudəŋaŋ, ten ji yaŋ də waale faɗi. Ten bə bəlaŋa ablaw bədoona anaŋ, aŋ hare ku bele nəəti bə sarən wəra adoro ɗaw tə mo?

¹⁶ Bədoona ana, aŋ gə doo-de haa minti ten a jəŋ gerdeŋ daŋ, ten eeleŋ hulum ba. Səma sərdəŋ yaŋ bə ɗiki minti ten hulum bə tiwki səm moŋ, ten jəənəŋ tiniini dəŋ də hel daalaŋ.

¹⁷ Gud kaa gə minti ten faknaŋ dəŋ naŋ, mindi jəənəŋ tiniini dəŋ bə humtun kar nəətiŋ wardaŋ mo?

¹⁸ Ten haŋ gud Titi haa heŋ faɗi minti wə ɗee na gerdeŋ naŋ, ten gaanaŋ seenə áŋ bə minti ten a wəətunu səmu kandaŋ guudu na gəm. Titi humtunuŋ kar nəətiŋ mo? Are ɗeŋ haa paapa gud ɗiki bə məna daana də kəkəy bə məna bə mo?

¹⁹ Ɗalba aŋ bə ɗiki haa minti, are anə hãã bə waate da cəərə ɗeker də kusrə are tiiniŋa ɗawmay mo? Paapa bədoona ba. Are waate haa tiinə Pepeŋa, gud tapi naareŋa də Kristu. Gədaarə are gə agŋ-agŋ, are waate kel gila keɗe haa bə zeŋ gud de nəətiŋ ajewa.

²⁰ Gud maa mo walkaŋ bə jəna hebkəna haa minti ten tuluŋ ne gerdeŋ naŋ, ten ɗe a fəlaŋ ɗe dəŋ hal də nayto bə minti ten də caaduŋ, daana aŋ bə ɗe a ji də waale də joŋre nin baŋ gəm. Walkaŋ bə jəna haa minti aŋ bə ji də gəbaŋ də kumsəŋ, giidiŋ bə ji bə hatəŋa cəərə kumsəŋa, aŋ də waŋ sar kumsəŋa, mindi mindi mo golde haa a kusru, aŋ bə ceme gud kumsəŋa, aŋ bə ceere sam kumsəŋa, aŋ bə teke cəərə kusrəŋa apəya daana aŋ bə ɓalkete kela.

²¹ Gəəzi walka bə jəna minti ten bə ɗeŋ ne gerdeŋ naŋ, Pep katən ɗe a məlan cəərə kel kə kolon kese tiiniŋa ɗawmay, ten ɗe a kole bə laawe gud sərdə kaa ablaw gə minti raawaŋ də ji bə baymeleŋ, yə paapa bə kole kirki a kel neete gə zeɓə-zeɓeŋ, a anə beye bə *ku giliŋ warna keɗeŋ, a anə kel kə kes-keseŋ bə gəm.