II KOREŊTƏŊ 1 - JAA TƏMARWAŊ

Mirkiŋ

¹ Jeereŋ kefter toŋ kəya haa ten Pol, *hulum bə gaa-ge kə Kristu Yeesuŋ, gud giidu gə bele kə Pepeŋa. Are jiirunu haa də seenə áŋ Timoteŋ, a aŋ kaa kə Tapi gə Koreŋtəŋ daana a kaa kə Pep gə giidə seŋka də Akay keɗe gəm.

² Pisiŋ daana kəkaɓi kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa.

Pol ji suuse a Pepeŋ

³ Tokɗeŋ jəə la kə Pep Bar Barkaŋ náŋ Yeesu Kristuŋ, Bar áŋ bə minti ji giidu pəsaŋ sar kaŋaŋ, Pep bə teŋe dər kaŋ ku kela keɗeŋ.

⁴ Wə teŋe dər are ku kel gə aye laaweŋa a areŋ keɗe, kir minti are nakə la bə teŋe dər kaa gə minti dər kel gə aye laaweŋa də kel gə minti wə a teŋeŋ dər are diiriŋ.

⁵ Gud maa mo, damdi are bə se gidiirə lasiŋa, lasi tá də he kə Kristuŋ, are bə falte teŋe bə dəra ablaw haa guudu gəm.

⁶ Are jəəne bə se gəəliŋaŋ, are saw haa minti dərəŋ teŋə la daana aŋ falə seereŋ la. Dər are jəəne də teŋə-teŋeŋ haa bə gaŋ bə fele teŋe bə dəra, bə koloŋ bə mi ku gidiirə gəəli bə minti haŋ naare bə minti are bə səwaŋ gəm.

⁷ Ɗiki də are wəra bə malə-mele cəərəŋa anə kaŋkaŋ faɗi. Wəra də dər are minti, aŋ gə tapə-tepe bə se gəəliŋa də are tə bə moŋ, aŋ fele teŋe bə dər bə minti are bə fəluŋ gəm.

⁸ Kəsaanə areŋ, are bele minti kel gə aye laawe gə minti tuluŋ cəərə are giidə seŋka də Azi daŋ, aŋ əsəy la gəm. Yə a eeleŋ daana kəlaŋ cəərə səɓaki də are wəra hasi hãã bə minti are a ɗəkəŋ wəra minti are ji zugi pəda.

⁹ Are a haa minti hi naare bə meŋ tuluŋ haa tuli ɗaw. Kel teŋ jəŋ sar are haa kir minti are a mele ɗiki də are cəərə kusrə are ba, are məlu la cəərə Pep bə minti hare kaŋ wəra dədərgə adordə meŋaŋ.

¹⁰ Wə ɓətəŋ are wəra ku me bə gəəli-gəəli toŋa haa tó, wə bə ɓiti are yaŋ wəra bədoona pa. Gəəzi, ɗiki də are wəra bə malə-mele cuuru minti wə bə ɓiti are yaŋ wəra pa.

¹¹ Aŋ də kusrəŋ, aŋ bə keye are də toose nəəti bə cəərə areŋ. Bədoona ana ta, Pepeŋ ji pisi yaŋ sar are gud toose kə kaa kə ablaw bə cəərə areŋa. Kel teŋ kole yaŋ karman bə minti kaŋ ablaw bə jəw suuse gud kel də are gəm.

Pol kole ɗiki du cəərə gəryi bə minti wə a ɗəlaŋ jəw

¹² Haa kəna karman bə minti are gə nakə-neke bə ufi ku are guuduŋ: ɗiki də are bə waate are wəra anə kaŋkaŋ minti ɗe də are aduubə də kaa gə cəərə seŋkaŋaŋ, daŋgeŋ aduubə dəŋa faɗi, jəŋ ha'aŋ bay kel kə ŋoyə-ŋoye ada daana wəra *cetceti gəm. Ayaŋ səɓakiŋ a are cuuru haa Pepeŋ. Ɗe toŋ jəŋ bə gaa-ge guudu cəərə ase kə kaa kəsarkaŋa ba, səma haa cəərə pisi bə minti Pepeŋ juunu sar areŋ.

¹³ Giidə kefter bə minti are jeerteŋ dəŋ naŋ, are paapa bə mete kela ada na ba. Are jeerteŋ ada na haa kel gə minti aŋ əŋkətəy daana iskitiy guudiŋ təwa faɗi. Kel gə minti ten bele minti aŋ iskiy guudi la wəra kaŋkaŋ,

¹⁴ sirdi leeneŋ bay əski guudi hãã hebkəna. Kel teŋ haa minti, dər hi bə minti Barkaŋ náŋ hare da duuruŋ, aŋ neke yaŋ bə ufi kuŋ də are, damdi are neke yaŋ bə ufi ku are dəərəŋ anaŋ gəm.

¹⁵ Ten a asaŋ wəra cəərəna kaŋkaŋ minti áŋ bə ufi ku áŋ yaŋ də kumsə áŋ tə bə moŋ, ten a bəlaŋ haa minti ten kalə la gerdeŋa taw bə ɗe Masedəwan, kir minti aŋ falə pisi bə helɗe katən la kampa ɓasi.

¹⁶ Gud maa mo ten a bəlaŋ haa minti ten kele gerdeŋa taw bə raawe adaŋ, ten jəŋ da ne də ada jəŋ, ten hare cəərəŋ da taw pa kir minti aŋ kəyan la cəərə raawe bə gəryi katən bə ɗe Zudeŋ.

¹⁷ Ten a ɗəkəŋ minti ten sə a ji bədoona. Bə minti ten ɗampaŋ gəryi toŋ ha'aŋ, ten ɗəmpunu bay ɗiki mo? Bə minti ten ge gədəəgi də kel gə jiŋ, ten gaw haa damdi kaa kəsarkaŋ gə cəərə seŋkaŋ ana mo? Yə ji damdi giidi beleŋ a kəkəy bə waateŋa minti «ãã» gəm, «paapa» gəm, ada na ɓasi keɗeŋ.

¹⁸ Damdi Pepeŋ wəra ɓeti a kel nuutuŋaŋ ana, are ŋeteŋ kel a nəənəŋ bə gəm, kel gə ku are paapa ɓas-ɓasi bə gəm.

¹⁹ Gud maa mo Yeesu Kristu, Kormə Pep bə minti ten, Silasi daana Timote wəətunu səmu wəra gerdəŋaŋ, wə bəŋ paapa də kel ku ɓas-ɓasi minti «ãã» daana «paapa» ŋaanaanə moŋ ba. Səma kel nuutuŋ haa «ãã» faɗi gud bə minti yə gəəziŋ.

²⁰ Gud maa mo kar gə minti Pepeŋ a wəətənəy səməy wəra keɗeŋ, yə doŋ kuy wəra haa də Yeesu. Áŋ de haa minti «*Amen» haa də sam Yeesu gəm, kir minti cəərə Pepeŋ jəə la bə haa-he apəya.

²¹ Bə aye səɓakiŋ a are daana a nəənəŋ minti áŋ əsə la ŋəŋ a tepe náŋa də Yeesu Kristuŋ haa Pepeŋ də kusru faɗi. Wə vaŋ áŋ wəra hal a kusru bə jəw joŋreŋ haa tó pa.

²² Wə ayaŋ Tiiru Cetcetaŋ ku tarmə áŋa bə ge dər minti áŋ kə tó. Tiiru Cetcetaŋ taŋ haa karman bə minti wə deŋeŋ kar gə minti wə bə ɗe yaŋ a əyəy a áŋ dəərəŋ.

²³ Pepeŋ jən daŋgay dən la jəəne minti ten waate haa paapa gəəzi baŋ! Ten koloŋ ɗiki dən minti ten hare kəm Koreŋtə na pədaŋ haa bə fətəŋ wəra ku kel katən gə ɗəmaŋa ɗaw.

²⁴ Are golde haa paapa minti are haŋ guuduŋ cəərə deŋa ba. Gud maa mo are wəra gə asə-ase minti aŋ gə doo-de də səɓaki ɗaw. Are ji joŋreŋ dəərəŋ haa bə zeŋ gud waale nəətiŋ ajewa.