HEBEREŊ 9 - JAA TƏMARWAŊ

Kəkəy bə minti yə a bə ke awalnaŋa a Pepeŋ dayday duuruŋ

¹ *Jaa də ajew a jəŋ haa də hel naata də ke awalnaŋ a Pepeŋ. Kaŋ a bə ke awalna taŋa haa giidə *muryuki də minti yə a doona haa té.

² Muryuki taŋ, giidə ɓasi. Giidə bə ajew na kannaŋ, kooso bə gaɓte lampaŋ bə kəəsu seeɗa'iŋ, daana tabul də minti mappa də ayə-aye a Pepeŋ bə vaa-ve cəərəŋ, haa ada. Yə mante ko toŋ minti *ko cetcetiŋ.

³ Kerkə dəməəmə də gaɓə-geɓe də minti ɓarsaŋ giidə muryuki taŋ, ko baalaŋ yaŋ ada na, yə məntu minti *ko cetceti bə deŋe kumsuŋ.

⁴ *Ko bə jəəti keere bə yoorə-yoore də maaway də welɗə-welɗe bə kuuti son bə siisi pisiŋ yaŋ a ko toŋa ada. *Cokrom bə minti kirku wəra bə satə-sete keɗe də maaway də welɗə-welɗe pisi, yə məntu minti cokrom bə jaa kə Pepeŋ, yaŋ ada gəm. Kormə hodi bə yoorə-yoore də maaway də welɗə-welɗe də hame kəman giidu, yə məntu minti «man», gədəwa kə *Aroŋ bə minti a huuvuŋ hõy, daana karmə pərki gə ceɗə-ceɗe gə minti ku gili bə jaŋ gə jeerə-jeere cuuruŋ, yə giidə cokrom toŋa ada keɗe.

⁵ Cəərə cokroma ha'aŋ, kar kəman gə əstə-əsti ada damdi *kaa kə digi kə Pep gə minti yə məntu minti «serubiŋ» ana. Yə lakaŋ bə ge dər haa minti Pepeŋ a ko toŋa ada. Yə baarlətaŋ gəraŋ di wəra bə ge kəsaatərna cəərə ko bə minti yə malte kor bə keere bə cəərə baymele kə kaŋ ada. Səma áŋ a de cəərə áŋ bə tope gud kel teŋa wəra anə məna-məna keɗe hebkəna ba.

⁶ Kar gə ɗampə-ɗampe a diri bədoona ta'-ta'i taŋ, *kaa kə keere Pepeŋ kalte haa giidə ko bə acekjewa dər hitiŋa saksaki bə ɗe a ji joŋre neeteŋ.

⁷ Giidə ko bə ɓasiŋa ha'aŋ, hulum bə minti kele ada naŋ haa *kumna boblo bə keere Pepeŋ ɗaaməna daana kampa ɗaaməna dər leŋa faɗi gəm. Wə kir kele ada na də kor bə ji keereŋ kəəsu bə ɗe a aye a Pepeŋ. Kor bə keere toŋ haa bə cəərə baymele nuutuŋ daana bə cəərə kə kaa kə Pepeŋ bə minti yə a juunu kas bay aseŋ gəm.

⁸ Tiiru Cetcetaŋ bə ke dər áŋa də kar teŋ haa minti muryuki də ajew jəəne hebkəna gar, haa kəkəy kəm paapa bə bəŋə-biŋi a kaŋ bə kalte giidə ko cetcetiŋ bə daŋə-deŋe kumsuŋa ba.

⁹ Muryuki taŋ ɗəkəm cəərəm cəərə kar gə minti bə ji hebkənaŋ faɗi. A ge dər haa minti, anə kar daana keere gə minti yə əyəy a Pepeŋ ha'aŋ, paapa gə nakə-neke bə kole ɗiki də hulum bə minti kaw awalna də hel taŋ wəra anə kaŋkaŋ *cetceti ba.

¹⁰ Gud maa mo, ke bə awalna taŋ də əsə-isi haa cəərə ke bə gədəəgi də kar kə hame kəmana, kar kə se, daana anə gidiirə baade bə minti kole kaŋ wəra cetcetiŋ. To'osi taŋ haa cəərə kar gə minti áŋ bə əsəya wəra kəna gal taakawaŋ. Pepeŋ jiiniy bə isi anə sawəwa təwa, hãã bə minti tó kole karman baalaŋ kimirwi a kuɗi.

Keere bə ger Kristuŋ

¹¹ Bə hebkənaŋ, Kristu bə bəə-bi damdi *kumna boblo bə keere Pepeŋ ana, haa də kar pəsaŋ gə minti wə fəlnəy da bə aye a áŋ. *Muryuki də minti wə bə kalə-kele giidə bə ji joŋreŋaŋ, a mooto faɗi daana a wəra də doo-de ku dəŋaŋ nayta də ajew. Jəŋ muryuki taŋ paapa kaa kəsarkaŋ ba, a paapa də tapə-tepe də kar kaayaŋ gə minti Pepeŋ jiiniy cəərə seŋkaŋa ji bə gəm.

¹² Wə kəlaŋ a *ko cetceti bə deŋe kumsuŋ naŋ kampa ɗaaməna faɗi. Wə kəlaŋ də kor kəəsu na bə ɗe a aye a Pepeŋ, haa paapa kor də kəparkaw ba, paapa kor də karmə kərkəw bə gəm, səma haa də kor du gadi faɗi. Wə ɓətəŋ áŋ wəra bə faɗnə-faɗna haa bədoona ana.

¹³ Bə poore kusrə kaa gə minti paapa dər Pepeŋa *cetceti baŋ, yə awte anə kəparkaw daana kərkəw bə tupuy kor di bə jitu sar kaa teŋa. Yə de si terewka, yə kuurə wəra, yə rayte koroy dəŋ ciiri gəm. Kəya kusrə kaa teŋ wəra gə poorə-poore faɗi.

¹⁴ Jəəne doloy bədoona ana tə kəm, səɓaki də kor də Kristu bə ji naanaanə ba ga'i pə mo! Də səɓaki kə Tiiru də bay teweŋ, wə ayaŋ kusru wəra a Pepeŋ damdi karman bə keere bə minti bay kel kə malə-mele suru ana'i. Kor du kole ɗiki də áŋ wəra cetceti kir minti áŋ a jəəti joŋre bə minti ɗe a mele áŋ a meŋa pəda, áŋ jəə joŋre la máŋ a Pep bə dədərgəŋ ɗaw.

Jaa də doo-de təmarwaŋ gud keere kə Kristuŋaŋ

¹⁵ Kristu jəŋ bədoona tə kəm, wə aduubə də kaŋa də Pepeŋ minti *jaa təmarwaŋ doo la, daana minti kefter kimirwi bə waate sam gubliŋ jəə la bəy haa sə teŋ. Wə jəŋ bədoona kir minti kaa gə minti Pepeŋ məntənəy wardaŋ, yə nakə la bə fele kar pəsaŋ gə bay tewe gə minti wə a wəətənəy səməy warda a niiniŋ. Kel teŋ neke bə ɗe a ji wəra bədoona, haa gud bə minti hulum a meŋ wəra daana wə bədəŋ kaŋ wəra ku baymele bə minti yə a juutunu dər jaa də ajew daŋ.

¹⁶ Wəra də dər áŋ minti, bə ɓarse kar gə giidə kefter bə waate sam gubliŋ, burduŋ jəə la bə mee-me kəm.

¹⁷ Jəəne minti bərdə kefter toŋ kəm caw, áŋ neke bə ji joŋre duuru ba. Áŋ ji joŋre duuru ha'aŋ, adordə me du.

¹⁸ Gud teŋa ta, yə jəŋ joŋre də jaa də ajew ha'aŋ, yə gaŋ kor wəra kəm.

¹⁹ Gud maa mo, *Moyisi vəɗaŋ kel kə ku giliŋ wəra kəm məna-məna a kaŋ keɗe damdi yə gə jeerə-jeere giidə kefter bə *ku giliŋa ana. Kəya wə humuŋ kor də kəparkaw daana kərkəw, kan, tərnə saama hərlə də jəə-ji də kaaɗe də kaamaŋ, kəbaŋ gə minti yə məntəy «hisopiŋ», kəya wə jeteŋ kor sar kaŋ na daana wəra cəərə kefter bə ku giliŋa diiri.

²⁰ Wə waataŋ wəra ada anə gil faɗi minti: «Kəya haa kor bə minti Pepeŋ doŋ jaŋ dəərəŋ duuruŋ minti aŋ ɗee la dəərə a koɗoŋaŋ.»

²¹ Wə jeteŋ kor wəra sar *muryukiŋa daana kar gə minti yə ji joŋre diiri bə ke awalna a Pepeŋ ada giidəŋ gəm.

²² Giidə ku giliŋaŋ ha'aŋ, daŋge də kar keɗe kole wəra *cetceti haa də kor me'i. Baymeleŋ fele vəəgə bə giidu ha'aŋ, kor ãye wəra kəm me'i gəm.

²³ Kar té gə minti haa tiirə kar gə apəyaŋ ŋaanaanə moŋ, yə kir kole wəra cetceti haa də kəkəy toŋ. Səma, kə kar kaayaŋ gə minti apəy na haa naŋ, yə kir kole cetceti haa də keere bə minti bə daŋə-deŋe nayto bə minti yə jəw du də begeŋ.

Kor də Kristu baade baymele kə kaŋ wəra

²⁴ Bədoona ana, Kristu kəlaŋ haa paapa giidə *ko cetceti bə minti kaa kəsarkaŋ kəman a ɗəmpunu, bə minti tiirə ko bə gəəzə-gəəziŋ təwa'i ba. Wə kəlaŋ haa giidə ko bə apəya bə minti Pepeŋ bə əsə-isi adaŋ gadi faɗi, wə ada na tiinu na gud kel də áŋ na.

²⁵ *Kumna boblo bə keere Pepeŋ bə tiinə kaanə Ziwifiŋ kalte də kor də begeŋ kəəsu giidə *ko cetcetiŋa bə deŋe kumsuŋ haa dər laateŋa saksaki. Səma kə Kristuŋ ha'aŋ, wə dogtoŋ bə kalte ada ha'aŋ paapa kampa anə pər bə ɗe a ayte kusru wəra damdi keere anaŋ ba.

²⁶ A jəə la bədoona ana'iŋ, hãã bə minti seŋkaŋ a məlaŋ guudə daŋ, wə a kəna bə dogte se lasiŋ da anə hãã gəm. Səma wə vəɗaŋ kusru wəra hebkəna a tewe bə hitiŋa, bə he baymele kə kaŋ wəra də keere bə minti wə juunu də kusru kampa ɗaaməna faɗi.

²⁷ Hulum mundu mundu mo caw, cuuru ɗe a awe haa a meŋa kampa ɗaaməna faɗi, adordə teŋa kəyaŋ, Pepeŋ jəmu kəəti du.

²⁸ Kristu ana gəm ha'aŋ, wə ayaŋ kusru wəra damdi keere ana kampa ɗaaməna faɗi gəm bə pi baymele kə kaa kə ablaw wəra. Wə hare da kampa bə ɓasiŋ ha'aŋ, paapa bə bi a he baymele wəra pəda, səma bə aye seereŋ a kaa gə minti bə məwa kəəsuŋ.