HEBEREŊ 8 - JAA TƏMARWAŊ

Yeesu hulum boblo bə keere náŋ

¹ Kəmtəŋ də kel gə minti áŋ bə wəətiyaŋ haa kənaŋ: *kumna boblo bə keere Pepeŋ damdi áŋ a waataŋ sam naytoŋ haa kəna anaŋ, náŋ yaŋ hebkəna ɗaw. Wə bə əsə-isi apəy na a kasi kemer kə Pep bə minti kumna cəərə kara keɗeŋ.

² Joŋre nuutu bə kumna boblo bə keere Pepeŋ ha'aŋ, wə bə jəw na apəy na giidə *ko cetcetiŋ na. Ko cetceti toŋ, haa muryuki də gəəzə-gəəzi də minti Barkaŋ jəŋ taŋ haa toŋ, paapa kaa kəsarkaŋ də kəəsi ba.

³ Hulum boblo bə keere muntu muntu mo bə əsə-isi haa bə aye kar daana bə ji keere a Pepeŋ. Bədoona ana gəm, hulum náŋ boblo bə ji keereŋ doŋ kir ji də karman bə aye a nuunu gəm.

⁴ Kristu a jəə la kəna cəərə seŋkaŋaŋ, wə a paapa *hulum bə keere ba anə gadi ɗaw, gud bə minti kaa kə aye kar a Pepeŋ damdi *ku gili kə *Moyisiŋ waate anaŋ, a yaŋ faɗi.

⁵ Joŋre neete bə minti yə jəw, haa tiirə nayto bə minti bə ji na apəy naŋ, yə siitu haa ku. Haa kel kə məna gə minti jəŋ də Moyisiŋ. Bə minti wə ɗəlaŋ bə de muryuki kə Pepeŋaŋ, wə gəənu kusnu wəra də kel minti: «Golə la, doorə la damdi nayta də minti ten vaɗnam dəm cəərə pərkiŋ daŋ ana.»

⁶ Səma bə hebkənaŋ, joŋre bə kasi Kristuŋ dəŋaŋ kə kaa kaayaŋ teŋ gud bə minti wə aduubə də kaŋa də Pepeŋ minti *jaa təmarwaŋ doo la. Jaa taŋ dəŋaŋ nayta də dayday gud bə minti, kel gə minti Pepeŋ bə wəətiya giidə taŋaŋ, dəŋaŋ kaayaŋ gə minti wə a wəətənəy giidə nayta də dayday daŋ.

Jaa də ajew də jaa təmarwaŋ

⁷ *Jaa də ajew a a nakə la bə tope ku kel wəra a kuɗiŋaŋ, Pepeŋ a sə a kola me'i də daalaŋ də ɓasi pəda.

⁸ Áŋ ase minti a a paapa də nakə-neke baŋ, haa gud bə minti Pepeŋ jəmaŋ haa kəna təbay a kəkəy bə minti wə waataŋ kaa nuutuŋ minti: «Barkaŋ minti aŋ əskə la, hi bə bi yaŋ minti ten de jaa təmarwaŋ də kaanə *Israyel, kaa gə ger Zudaŋ.

⁹ A ji yaŋ paapa damdi nayta də minti ten a doona də kəmoomo di a kəkəy bə minti ten humnuy kəəsiy bə vay warda giidə seŋka də Eziptə daŋ ana ba. Yə jəŋ ɗeketi dər jaa katəna bə tə gəm, ten yəəkənəy anə kapi. Waataŋ bədoona haa ten Barkaŋ.

¹⁰ Jaa də minti ten bə doora yaŋ də kaanə Israyel dər hi bə ajew naŋ bə ji haa bə ha'aŋ ana: ten bə əyəy ku gili katən haa dər ɗiki di, ten jiiriy di yaŋ haa ku tərməyi faɗi gəm. Ten bə ji yaŋ Pep neeteŋ, té bə ji yaŋ kaa katən gəm. Waataŋ kel teŋ haa ten Barkaŋ.

¹¹ Mindi mindi mo bə ji paapa də caadə minti wə hatə siinu bə giidə seŋka la, ɗalba kusul duŋ la me'i pəda minti: Barkaŋ jəə la wəra də dərəm! Gud maa mo koo kaa kəmtəŋ, koo kaa gə minti kəncəŋ, ten bə ji yaŋ wəra də diri keɗe.

¹² Ten vəəgi giidən yaŋ wəra cəərə laŋte neeteŋa, ten bə de baymele neeteŋ cəərəna kay bə gəm.»

¹³ Bə minti Pepeŋ gaŋ sam jaa təmarwaŋ təwa kəyaŋ, də dayday koloŋ paapa kir keye pəda faɗi. Wəra də dər áŋ minti, karman bə minti koloŋ ne wəra bə dayday daana wəra bə həwə-həwiŋ, wə máŋ bə tewe wəra haa tewe faɗi.