HEBEREŊ 7 - JAA TƏMARWAŊ

Boblo kə Melkisedeki, hulum bə keere kə Pepeŋ

¹ Melkisedeki toŋ ha'aŋ, a jəŋ dayday da kumna bə vil də Salem haa tó daana wə *hulum bə keere Pep bə Daŋə-Deŋe gəm. Bə minti *Abraham haraŋ da bə pəə-pi bulum cəərə kəkamna gə minti wə a jəŋ bə duuriy daŋ, Melkisedeki kooroŋ a ŋəfu warda daana wə gəənu pisiŋ cuuru da gəm.

² Kəya Abraham əynu gal hora də kar gə minti wə a humnuy ku duuriŋ da keɗeŋ. Karman bə ajew bə minti yə waate cəərə Melkisedekiŋ haa minti wə «kumna ɗekeriŋ» gud bə minti gud sam toŋ haa bədoona. Karman bə ɓasiŋ haa minti wə «kumna bə Salem», ge dər haa minti wə «kumna bə kəkaɓiŋ» gud bə minti Salem haa minti kəkaɓiŋ.

³ Bar Melkisedeki mo, nuru mo, kəmoomo du mo, hulum asaŋ karman cəərə teŋa ba. Hulum waataŋ sam we du daana me du bə gəm. Bədoona ana, wə haa damdi Kormə Pepeŋ ana gud bə minti wə hulum bə keere Pepeŋ bə faɗnə-faɗna.

⁴ Aŋ asaŋ ne, boblo kə hulum toŋ paapa ba ga'i ba. Abraham, hulum bə minti a məlaŋ gud moomo náŋ, ayaŋ agal horaŋ, agal pəsaŋ də kar gə minti wə a humnuy ku duuriŋ da keɗeŋ haa a nuunu gadi faɗi.

⁵ Ana ha'aŋ, *ku gili kə *Moyisiŋ ayaŋ kəkəy haa a gidiirə *Levi təwa, yə haa kaa kə keere Pepeŋ, bə fele agal hora də kar gə kasi kaanə *Israyel, anaaŋa yə haa kəsəəni gə minti a kaasaw də Abrahama damdi té ana gəm.

⁶ Melkisedeki a paapa nuutu a kaasaw də Levi ba, də teŋ keɗe wə fəlaŋ agal hora də kar gə kasi Abraham daana wə gaŋ pisiŋ cəərə Abraham tó bə minti Pepeŋ a wəətunu sam kar wəraŋ ɗaw.

⁷ Ana teŋ kəya paapa kel gə minti lente hulum ba minti, ge pisiŋ cəərə huluma haa hulum bə minti dəŋnu bobloŋ.

⁸ Karman baalaŋ ada pa, haa bə minti kaasaw də Levi gə tope agal horaŋ, yə kaa gə minti meete wəra gəm. Səma kə Melkisedekiŋ ha'aŋ, wə haa hulum bə minti dədərgə saksaki damdi kefter kə Pepeŋ bə waatə-waate wəra cuuru bədoona ana'iŋ.

⁹ Karman baalaŋ pa, bə minti Abraham ayaŋ agal hora də kar nuutuŋ a Melkisedekiŋ, áŋ gə nakə-neke bə waate minti, Levi bə minti kaasaw du de agal horaŋ haa teŋ, əynəy a nuunu haa tó gadi faɗi.

¹⁰ Gud maa mo, bə minti Melkisedeki ɗeŋ a ŋefe də Abraham, Levi a kəm bay we, səma wə a wəra giidə moomo du Abrahama.

Kumna boblo bə keere baalaŋ damdi Melkisedeki ana

¹¹ *Ku gili kə Pep bə minti wə əynu a kaanə *Israyel bə əsə-isi haa cəərə joŋre bə kasi *kaa kə keere Pepeŋ gə minti a kaasaw də *Leviŋa. Kaa kə keere teŋ a jəə la gə nakə-neke bə de ku kel wəra kaŋkaŋ a kuɗiŋaŋ, yə sə a isi hulum bə keere baalaŋ ada damdi Melkisedeki ana haa səm pə mo? Kaa kə keere gə minti a kaasaw də Levi, damdi *Aroŋ ana, sə a raawe haa teŋ faɗi.

¹² Jəəne minti Pepeŋ kole hulum bə keere baalaŋ, kel teŋ ge dər haa minti ku giliŋ kole pərak-pəraki faɗi gəm.

¹³ Gud maa mo, Barkaŋ bə minti kel bə waate haa kəna cuuruŋ, wə paapa a kaasaw də Levi ba, wə a kaasaw də kaa gaalaŋ gə minti a jəŋ joŋre hõy a *ko bə jəəti keere a Pepeŋ baŋ.

¹⁴ Áŋ wəra gə asə-ase kaŋkaŋ minti Barkaŋ náŋ toŋ bəŋ haa a kaasaw də Zuda da. Bə minti *Moyisi waataŋ sam kaa kə keere Pepeŋ, wə gaŋ sam kaasaw də kaa teŋ kəya hõy ada ba.

¹⁵ Kel gə keye náŋ bə ase gud kel teŋ wəra hebkəna pisi kaŋkaŋ minti yə haa bədoona, haa minti hulum naayaw toŋ bə keere damdi Melkisedeki ana wəra bə vaɗə-veɗe.

¹⁶ Wə koloŋ hulum bə keere haa paapa gud kel kə ku giliŋa gə minti waate minti wə sə a waa la haa a gidiirə hulum kəmana anəkay me'iŋ ba. Wə koloŋ haa gud kel də səɓaki də dədərgə du də minti ji yaŋ bə faɗnə-faɗnaŋ.

¹⁷ Gud maa mo, kefter kə Pepeŋ wəra bə waatə-waate cuuru minti: «Tam ji yaŋ hulum bə keere Pepeŋ bə faɗnə-faɗna damdi Melkisedeki ana.»

¹⁸ Bədoona ana ta, gədəəgi də kel gə minti Pepeŋ a kəənəy, wə paapa bə əŋkəya cuuru pəda, gud bə minti yə kerpeteŋ wəra ku kela, yə nəkaŋ bə keye kaŋ bə gəm.

¹⁹ Gud maa mo ku gili kə Moyisiŋ doŋ ku karman anə məna wəra kaŋkaŋ ba. Bə hebkənaŋ, karman baalaŋ bə minti áŋ gə malə-mele ɗiki də áŋ cuuruŋ yaŋ bə minti dəŋaŋ ku giliŋ. Áŋ gə nakə-neke bə ze sar Pepeŋa haa guudu.

²⁰ Karman baalaŋ yaŋ ada pa haa minti, Pepeŋ əsəŋ Yeesu hulum bə keereŋ, wə kəlaŋ ku wəra də kel teŋ haa kele. Ana kə kaayaŋ gə minti a kaasaw də Leviŋ, wə kəlaŋ ku cəərə neeteŋa ba.

²¹ Səma bə minti Yeesu koloŋ hulum bə keereŋ, Pepeŋ kəlaŋ ku də kel wəra ada minti: «Ten Barkaŋ, ten kəlaŋ kun wəra, ten hare ɗiki dən adoro cəərə kel katəna ba. Tam ji yaŋ hulum bə keere bə faɗnə-faɗna.»

²² Bədoona ana ta, *jaa təmarwa də daŋə-deŋe yaŋ; Yeesu haa bərdə kəkəy də minti a ji yaŋ pal-pal.

²³ Karman yaŋ hal-hal ada pa, haa minti kaa kə keere Pepeŋ jəŋ ablaw gud bə minti meŋ tupuy, kəya yə neke bə raawe də joŋre neeteŋ na anə hoŋ pəda.

²⁴ Səma kə Yeesu ha'aŋ, wə caw bə faɗnə-faɗna səm moŋ, joŋre nuutu bə hulum bə keereŋ raawe na bə faɗnə-faɗna gəm.

²⁵ Gud teŋa ta, wə bə nakə-neke bə seere kaa gə minti gə zee-ze sar Pepeŋa maŋ kir kəəsuŋ wəra bə faɗnə-faɗna, gud bə minti wə saksaki caw dədərgə bə waate kela tiinə Pepeŋa gud kel diŋ.

²⁶ Bədoona ta, Yeesu haa nuutu *kumna tó boblo bə keere bə nakə-neke bə cəərə áŋ faɗi. Wə bə doo-de dər Pepeŋ, kel gə malə-mele paapa suru ba anə ceki, baymele paapa bə ha'-he'e suru bə gəm, Pepeŋ ziinu wəra dəra'i sar kaa kə bayməlaŋa daana wə usnu warna apəy na suru na.

²⁷ Kaa kaayaŋ gə ji keere a Pepeŋ kir ji keere dər hitiŋa saksaki kəm cəərə dər baymele neeteŋa, adoro yə ji cəərə kə kaa kə ablawa gəm. Kə Yeesu ha'aŋ, wə paapa kir ji bədoona ba, gud maa mo, a kəkəy bə minti wə ayaŋ kusru wəra damdi keere ana, wə keereŋ warna ɗaaməna cəərə baymele kə kaŋ na haa suy faɗi.

²⁸ Də ku gili kə Moyisi, yə əsti kaŋ kəmtəŋ bə ji keere a Pepeŋ ha'aŋ, kaa gə minti də dewe ku baymeleŋa faɗi. Səma kel gə minti Pepeŋ a kəlaŋ ku wəra diiri adoro də ku gili kə Moyisiŋaŋ, əsəŋ hulum boblo bə ji keereŋ haa Kurmuyuŋ faɗi, bə minti koloŋ wəra bə nakə-neke dər Pepeŋa bə faɗnə-faɗnaŋ.