HEBEREŊ 6 - JAA TƏMARWAŊ

¹ Gud teŋa ta, áŋ a isi laki bə de cəərə áŋa cəərə kar té gə minti áŋ a sə a hətəy warda ajew da cəərə Kristu daŋ pəda. Áŋ hare dər áŋ la máŋ haa cəərə karman bə minti tó də aŋar də kaa kəmtəŋ. Áŋ a hare bə mele gud áŋa bə hate kar teŋa ha'aŋ pəda: anə kole bə kerkem a joŋre bə baymele bə minti ɗe a məlam a meŋaŋ, daana de bə gud Pepeŋ,

² hate cəərə gidiirə batemaŋ daana mele bə kasiŋ, cəərə hare bə dədərgəŋ wəra adordə meŋa daana kəəti bə bay tewe kə Pepeŋ.

³ Pepeŋ doŋ haa neŋ, áŋ raawe máŋ haa də karman bə minti də aŋar də kaa kəmtəŋ.

^4-6 Gud maa mo kel haa bə ha'aŋ ana: kə kaa gə minti gaŋ de neete bə gud Pepeŋ ne wəraŋ, hulum neke bə hərəy bə kole kirki a baymele neeteŋ bə hare bə de gud Kristu paŋ, yə ji ba. Kaa teŋ ha'aŋ, Pepeŋ a wəlnəy tərməyi wəra də gəəziŋ, yə a wəra gə falə-fele pisiŋ kəəsu ablaw, Tiiru Cetcetaŋ a wəra də ɓarsə-ɓarse a niini gəm. Kel kə Pepeŋ disi naanaanə me'i moŋ, yə a wəra gə asə-ase diiri. Səɓaki də ko bə minti Pepeŋ ɗe a ji kumnaŋ duru na ajew naŋ naanaanə moŋ, yə a wəra gə asə-ase dəərə gəm. Də teŋ keɗe yə haraŋ bə ɗe a ji kar gə minti yə a jəŋ bə jiya ajew də bə minti yə a kəm bay de gud Pepeŋaŋ! Gud teŋa ta, bə hare bə kuluya bə kole kirki a baymele neeteŋ ji bə pa, gud bə minti yə bə ji haa damdi yə haraŋ bə ɓele Kormə Pepeŋ wəra a kəbaŋ gə largaŋa máŋ té də kusri gadi faɗi, daana bə kulu kese wəra də dər kaŋ anə pəɗaki laki ana.

⁷ Aŋ asaŋ ne, bə minti koŋ jəəne bə hage saksaki cəərə aka kəmana daana a ji kar a kaa gə minti bə kəɗaŋ, ge dər haa minti Pepeŋ bə gaa-ge pisi cəərə faɗi.

⁸ Səma jəəne minti a ve haa kəjəm daana pəbal, joŋre də pa pəda, Pepeŋ maŋ bə gaarə guɗbusi wəra haa ge ɗaw daana cəərə ɗe a awe haa minti wə ɓalkə wəra də cəwaŋ.

⁹ Aŋ gə minti giidə are bəlaŋ, jəəne nuutu minti are harnaŋ waate toŋ ne bədoona ana ɗawmay moŋ, are wəra gə asə-ase cəərə are kaŋkaŋ minti aŋ gə haa-he agal pəsaŋ; agal də seereŋ.

¹⁰ Gud maa mo Pepeŋ paapa gula ba. Cuuru paapa bə gaa-ge joŋre nəəti bə minti aŋ bə jəw duŋ daana minti aŋ bə bəluŋ ba. Wə bə asə-ase haa cəərə keye bə minti aŋ a kaytaŋ kaa nuutuŋ daana aŋ kəm bə kəyəya hebkəna paŋ.

¹¹ Səma giidə are gə balə-bele haa minti, mindi mindi mo guudəŋa raawə la ajewa bə bande bədoona ana hãã warna a tewe də hiti nuutuŋ na kir minti, karman bə minti aŋ gə malə-mele ɗiki dəŋ cuuruŋ ɗee la a de ku wəra pisi kaŋkaŋ.

¹² Aŋ a arse wəra a kəkəya ba. Aŋ haa la haa kel kə kaayaŋ gə minti doŋ gud Pepeŋa daana məətəŋ ku kelaŋ ɗaw. Kaa teŋ fele kar gə minti Pepeŋ a wəətənəy səməy wəra a niiniŋ.

Kar gə minti Pepeŋ a wəətənəy səməy wəraŋ, wə ɗe a əyəy wəra gəəzi

¹³ Dər dayday daŋ, bə minti Pepeŋ a waataŋ sam karman wəra a *Abraham, wə kəlaŋ ku haa kele. Karman baalaŋ bə dəŋu boblo paapa tə kəm, wə kəlaŋ ku haa də səmu faɗi.

¹⁴ Wə minti: «Gəəzi, ten bə gam pisiŋ yaŋ cəərəma, ten bə jəwam kaasaw dəm yaŋ ablaw-ablaw.»

¹⁵ Abraham məŋ kel teŋ duru ɗəl, kəya wə bə fəlaŋ karman bə minti Pepeŋ a wəətunu səmu wəra a nuunuŋ.

¹⁶ Bə minti hulum kele ku ha'aŋ, wə ge ada haa sam karman bə minti dəŋu cuuruŋ. Bədoona ana ta, awəy raawe ajewa pəda.

¹⁷ Pepeŋ jəŋ haa bədoona gəm. Kir minti kaa gə minti tó a wəətənəy sam kar wəra asə la wəra kaŋkaŋ minti tó kole ɗiki də tó baŋ, wə kəlaŋ ku faɗi.

¹⁸ Bədoona ana, kel té ɓasi gə minti Pepeŋ jiiniy haa kənaŋ, haa kel gə minti wə waataŋ sam karman daana wə kəlaŋ kuŋ, yə kole ba, daana wə neke bə ŋe kel ciiri ŋe bə pa. Áŋ gə minti yaakaŋ kar wəra keɗe bə de karman bə minti ɗiki də áŋ wəra bə malə-mele cuuruŋ, aye səɓaki də teŋe bə dər a áŋ bə isi ŋəŋ bə ji kel teŋ, haa té.

¹⁹ Karman tó bə minti áŋ gə malə-mele ɗiki də áŋ cuuruŋ, ɓali də áŋ adawra minti áŋ jəə la gə əsə-isi ŋəŋ-ŋəŋ haa tó. Áŋ gə malə-mele ɗiki də áŋ bədoona taŋ, áŋ bə ji haa damdi áŋ bə ve na warna gud dəməəmə də minti ɓarsaŋ dər *ko cetcetiŋ wəraŋ bə ɗe a tuli warna a ko bə minti Pepeŋ bə əsə-isi ada naŋ ana.

²⁰ Yeesu kəlaŋ gud kel də áŋa ajew na tiinə áŋ na haa a ko toŋ na, gud maa mo wə bə kolə-kole *kumna boblo bə keere Pepeŋ bə faɗnə-faɗna damdi Melkisedeki ana.