HEBEREŊ 5 - JAA TƏMARWAŊ

¹ Kumna boblo bə keere muntu muntu mo, Pepeŋ ŋəmu haa aduubə də kaa kəsarkaŋa toki. Wə bə əsə-isi bə ji joŋre a nuunu aduubə di də kaa kəsarkaŋ teŋ. Joŋre bə minti kəəsuŋ haa bə aye kar daana bə ji keereŋ a Pepeŋ cəərə baymeleŋaŋ.

² Kaa gə minti yaakte kəkəy ɗekeri wəra haa gud bay ase bə gud kela, wə bə nakə-neke bə iski kel gə siriŋ gud bə minti, wə də kusru, dewe bə suruŋ yəəku bə gəm.

³ Gud dewe toŋa ta, wə kir keere paapa cəərə baymele kə kaŋa təwa ba, səma dər nuutuŋa gəm.

⁴ Joŋre bə kumna boblo bə keereŋ daana aŋke duŋ, haw a kusru paapa hulum də kusru faɗi ba. Məntu ada haa Pepeŋ damdi kə *Aroŋ jəŋ ha'aŋ ana gəm.

⁵ Kel jəŋ cəərə Kristu haa bədoona ana gəm. Haŋ joŋre bə kumna boblo bə keereŋ daana aŋke duŋ paapa tó də kusru anə faɗi ba. Əynu du haa Pep bə minti a wəətunu minti: «Tam haa kormon faɗi, ten koloŋ dayna haa bəram faɗi gəm.»

⁶ Wə waataŋ a ko baalaŋa pa minti: «Tam ji yaŋ *hulum bə keere Pepeŋ bə faɗnə-faɗna damdi Melkisedeki ana.»

⁷ Bə minti Yeesu a jəŋ kəm caw cəərə seŋkaŋaŋ, wə wəra bə asə-ase minti Pepeŋ bə nakə-neke bə de tó wəra ku meŋa tə kəm, wə tuusunu də kamkam guudu ada, bə naakte ku wəra anə koloŋ-koloŋ, bə hage də kan kə duru gəm. Kəya Pepeŋ uskunu ku gud humi bə kosoŋ nuutu bə cuuruŋa.

⁸ Wə nuutu Kormə Pepeŋ, də teŋ keɗe wə hataŋ humi bə kosoŋ wəra kasi gidiirə lasi də minti wə saanaŋ keɗe.

⁹ Bə minti wə koloŋ wəra bə doo-de ku a kara keɗeŋ, wə koloŋ máŋ hulum bə aye seere bə bay teweŋ a kaa gə minti humi kosoŋ cuuruŋ keɗe.

¹⁰ Gud maa mo Pepeŋ wəətunu minti: «Tam ji yaŋ saksaki kumna boblo bə keere Pepeŋ damdi Melkisedeki ana.»

Aŋ amə kusrəŋ la pisi kir minti aŋ a yaake de wəra ba

¹¹ Are a kəm də waate ablaw cəərə kel teŋa, səma yə əsəŋ bə kole kasi are gəəli bə topoŋ guudi, gud bə minti aŋ koloŋ bə əski wəra ɗəlla kə ablaw faɗi.

¹² Hitiŋ gila keɗe a máŋ bə nakə-neke bə minti aŋ a máŋ kəna kaa kə hate. Ana pə ɗaw, aŋ bə jəŋ kəm də caadə minti hulum hataŋ kel kə Pep gə minti kaŋ hətəy a kəkəy bə minti yə de kəm deŋ. Bə minti aŋ a sə a hame máŋ karman gagraŋiŋ, aŋ haraŋ də caadə kaw damdi kəmar koncoŋ koloy-koloy ana.

¹³ Hulum bə minti raawaŋ ne bə se haa kaw saksaki, ŋeme bə karman ɗekeriŋ tiinə Pepeŋaŋ paapa də duru ba, gud bə minti wə haa bə beebe koloy-koloy ana faɗi.

¹⁴ Karman bə hame gagraŋiŋ, toŋ haa kə kaa kəmtəŋ. Kaa teŋ yə wəra gə hatə-hate də zuuri bə kel bə ase karman pisiŋ də karman bə baymeleŋ, gud bə minti yə juutu saksaki.