HEBEREŊ 4 - JAA TƏMARWAŊ

¹ Pepeŋ waataŋ wəra minti ko bə faake kə tó yaŋ, kaŋ ɗee la a isi ada. Ko bə faake toŋ, səmu kəm dayna bə waatə-waate haa a áŋ gəm. Gud teŋa ta, áŋ amə kusrə áŋ la pisi kir minti hulum guudəŋa anə məna a he kel kə bay kele a ko bə faake toŋ naŋ cuuru ba.

² Gud maa mo áŋ əskəŋ *Kel pəsaŋ kəmarwaŋ minti faake yaŋ, damdi kaa teŋ ana gəm. Yə a əskəŋ kel teŋ nuutu, səma yə fəlaŋ karman diiri ba gud bə minti yə doŋ guudi baŋ.

³ Áŋ kaa gə minti doŋ gud Pepeŋaŋ, áŋ ɗe a ve a ko bə faake tó bə minti Pepeŋ a waataŋ wəra cuuru minti: «Ten koloŋ wáŋ siri tə pə moŋ, ten kəlaŋ kun wəra minti yə ɗe a ve a ko pisi bə minti ten sə a əyəy faakeŋ ada naŋ pəda», haa áŋ ɗaw. Pepeŋ waataŋ bədoona ana, səma ko bə faake yaŋ nuutu gud bə minti Pepeŋ faakaŋ da hãã də ko bə minti wə jəŋ seŋkaŋ.

⁴ Gud maa mo, wəra gə jeerə-jeere a ko kəmana giidə Kefter kə Pepeŋa cəərə hi bə seeɗaŋa minti: «Pepeŋ jəŋ joŋreŋ hiti kənki, wə faakaŋ dər hi bə seeɗaŋa.»

⁵ Kel kə jeerə-jeere gə minti tiinə áŋa kənaŋ, Pepeŋ bə waate ada minti: «Yə ɗe a ve a ko pisi bə minti ten sə a əyəy faakeŋ ada naŋ pəda.»

⁶ Kaayaŋ gə ajew gə minti a əskəŋ Kel pəsaŋ kəmarwaŋ teŋ, yə vaŋ a ko bə faake pisi toŋ na ba, gud bay humi kosoŋ neete bə cəərə Pepeŋaŋ. Bədoona ana ta, kəkəy kəm hebkəna bəy saksaki cəərə kaa gaalaŋa bə ve ada naŋ.

⁷ Gud teŋa ta, Pepeŋ haraŋ bə ŋeme hi baalaŋa, wə mante toŋ minti «daynaŋ». Laate jəŋ wəra kəm ablaw bə minti wə waataŋ sam hi toŋ də kel gə minti áŋ a fəlnəy kanda gə jeerə-jeere kasi *Davidi. Kel teŋ haa minti: «Aŋ əskəŋ dordə Pepeŋ ne daynaŋ, aŋ a hẽŋe ku tarməyaŋ wəra ba.»

⁸ Gəəzi, a jəə la kəna minti Zosuwe vaŋ kəmoomo də áŋ wəra a ko bə faake toŋ naŋ, Pepeŋ sə a waate sam hi kəman baalaŋ adordə teŋa pəda.

⁹ Bədoona ana ta, hi baalaŋ yaŋ bə yaakə-yaake a kaa kə Pepeŋ. Hi toŋ ha'aŋ, wə bə hi bə seeɗa bə minti Pepeŋ həənu wəra bə faake nuutuŋ ana.

¹⁰ Gud teŋa ta, hulum bə minti kəlaŋ ne wəra a ko bə faake kə Pepeŋaŋ, wə faake máŋ ku joŋre bə minti wə a juunu damdi Pepeŋ faakaŋ ku nuutuŋa anaŋ gəm.

¹¹ Bədoona ana ta, áŋ bandə la haa bande bə ɗe a ve a ko bə faake toŋa. Áŋ amə kusrə áŋ la kir minti hulum a awe gud bay humi bə kosoŋ bə cəərə Pepeŋa damdi kəmoomo də áŋ a humuŋ kosoŋ baŋ ana ba.

¹² Gud maa mo, kel kə Pepeŋ yə də dədərgə, yə anə də'əfi də səɓaki gəm. Yə də kəsəŋ dəŋaŋ macəlam bə minti kusnu gə kaa-ke wəra agala ɓasi keɗeŋ. Yə hame sar huluma haa anə pəɗamɗam faɗi, hãã bə minti yə ɗe a ɗoote ko bə minti dədərgəŋ daana ɗikiŋ gə əsə-isi adaŋ, ko bə minti dər kəskəŋ gə maltə-malteŋ daana son bə diriŋ gə əsə-isi adaŋ warda gəm. Ge gud kar gə ku tarmə áŋ gə minti áŋ bele jəy wəra minti yə bayməlaŋ mo, pəsaŋ mo, haa té gəm.

¹³ Kar gə minti Pepeŋ jiiniy keɗeŋ, kumundu guudi anə məna neke bə ji bə ŋoyə-ŋoye wəra duru ba. Karman paapa bə baarə-baare ciiri anə weseki ba, yə wəra bə anə ɗar-ɗar laki də duru. Mindi mindi mo ɗe a tope bəlam də kel gə minti wə a jiiniy haa tiinu.

Yeesu kumna boblo bə keere bə minti ze də áŋ sar Pepeŋaŋ

¹⁴ Doloy *kumna náŋ boblo bə keere bə minti kooroŋ apəya hãã bə ɗe a tuli warna tiinə Pepeŋ na yaŋ, haa Yeesu Kormə Pepeŋ. Gud teŋa ta, áŋ əsə la ŋəŋ dər de bə minti áŋ bə wəətu səmu wəra minti wə haa de bə gəəzə-gəəziŋ.

¹⁵ Gud maa mo, kumna náŋ boblo bə keereŋ bə nakə-neke bə tepe kusru dər dewe bə sar áŋa. Ana ha'aŋ, wə ŋaftaŋ də gidiirə ke ku bə cəərə kar keɗe damdi áŋ bə ŋafte duuru ha'aŋ ana gəm, səma wə awaŋ dər baymele hõy ba.

¹⁶ Bədoona ana, áŋ a ji walka ba bə ze sar Pep bə minti ji pisiŋ a kaŋ kir minti wə asə caadə áŋ la, daana wə jəə pisiŋ la a áŋ anə ɓeti də ko bə minti áŋ a də tay də keye toŋ.