HEBEREŊ 3 - JAA TƏMARWAŊ

Yeesu dəŋaŋ Moyisi

¹ Gud teŋa aŋ kəsaanan gə minti Pepeŋ mantənaŋ wəra minti aŋ kolə la kaa kə toŋ, aŋ malə dərəŋ la cəərə Yeesu, hulum bə minti Pepeŋ gəənuŋ. Wə haa *kumna boblo bə keere bə minti tepe aduubə də áŋ də Pepeŋ, áŋ gə doo-de gud kel teŋaŋ.

² Wə ji joŋreŋ wəra a kuɗuŋa a Pep bə minti usnu a joŋre toŋaŋ, damdi *Moyisi a jəŋ nuutuŋ wəra a kuɗuŋa aduubə də gə ger Pepeŋaŋ keɗeŋ ana gəm.

³ Hulum bə minti a hərsəŋ kuliŋ, yə əyu aŋkeŋ dəŋaŋ kə kuli bə minti wə a hərsunuŋ. Aduubə də anə Yeesu də Moyisi haa bədoona gəm: Yeesu kir fele aŋkeŋ dəŋaŋ Moyisi.

⁴ Aŋ gə asə-ase wəra minti kuli ji gar bay hulum bə hursu ba. Ana kar neŋneŋ keɗe ha'aŋ gəm, jiiniy haa Pepeŋ.

⁵ Kə Moyisiŋ ha'aŋ, wə jəŋ joŋre nuutuŋ wəra a kuɗuŋa aduubə də gə ger Pepeŋa damdi hulum bə joŋre ana. Wə jəətəŋ bərdə kəkəy wəra cəərə karman bə minti Pepeŋ a yaŋ kir ɗe a wəətu hõy naŋ.

⁶ Səma kə Kristuŋ ha'aŋ, wə jəŋ nuutuŋ a kuɗuŋa haa bə Kormə Pepeŋ ana bə minti gole cəərə kuli nuutuŋ. Áŋ jəəne gə əsə-isi ŋəŋ də karman bə minti áŋ əsnu wəra cəərə áŋa kaŋkaŋ, daana áŋ jəəne wəra holoŋ-holoŋ də karman bə minti áŋ gə malə-mele ɗiki də áŋ cuuruŋ, áŋ haa bə kuli nuutuŋ ana.

Faake bə minti Pepeŋ ɗe a əyu a kaa nuutuŋ

⁷ Gud teŋa, aŋ jeɓrə kel gə minti Pepeŋ wəətənəy wəra ku Tiiru Cetcetaŋa la minti: «Aŋ əskəŋ dordə Pepeŋ ne daynaŋ,

⁸ aŋ a hẽŋe ku tarməyaŋ wəra damdi kəmoomo dəŋ a hẽŋeŋ ku tərməyi wəraŋ ana ba. Də ko bə minti yə ateŋa giidə ful daŋ, yə balnan kel dən pəda daana yə golnon koɗon.

⁹ A ko toŋ da taŋ, dər laate hor-hor waaɗe'iŋaŋ, yə asaŋ kar kəmtəŋ gə minti ten jiitiniy wəra də diri. Də teŋ keɗe, yə luŋ wəra kardəna bə golon koɗona.

¹⁰ Gud teŋa ta, ten koloŋ wáŋ cəərə kaa teŋa. Kəya ten minti: ‹Ɗiki neeteŋ bə jele wəra jele saksaki, kəkəy bə minti ten a kəənəy diŋ, guudu əskəŋ kəəsi ba.›

¹¹ Ten koloŋ wáŋ siri tə pə moŋ, ten kəlaŋ kun wəra minti yə ɗe a ve a ko pisi bə minti ten sə a əyəy faakeŋ ada naŋ pəda.»

¹² Kəsaananti, aŋ amə kusrəŋ la pisi kir minti hulum guudəŋa anə məna a yaake Pep bə dədərgəŋ wəra gud tərmuyu də bayməla də minti de gud Pepeŋa baŋ ba.

¹³ Ana ɗaw ha'aŋ, aŋ teŋə dər kumsəŋ la a hitiŋa saksaki kir minti hulum guudəŋa anə məna a hẽŋe ku tərmuyu wəra a Pepeŋ gud bə minti baymeleŋ juunu tiniini du wəraŋ ba. Aŋ jəə la bədoona hãã bə minti keɗepi gə minti waate minti «daynaŋ» kəm bə waate kela a áŋ.

¹⁴ Jəəne minti áŋ əsəŋ ne ŋəŋ a de náŋ bə minti áŋ a doŋ də ajew bədoonaŋ hãã a tewe də hiti náŋaŋ, áŋ haa kaa gə minti bə ji joŋre də Kristu keɗe.

¹⁵ Bədoona ana kel wəra gə jeerə-jeere minti: «Aŋ əskəŋ dordə Pepeŋ ne daynaŋ, aŋ a hẽŋe ku tarməyaŋ wəra damdi kəmoomo dəŋ a hẽŋeŋ ku tərməyi wəraŋ ana ba, bə minti yə balnan kel dən pədaŋ.»

¹⁶ Kaa gə minti a əskəŋ dordə Pepeŋ wəra, yə bə bəlnu kel du baŋ, haa kaa məntəŋ mo? Paapa kaa gə minti *Moyisi vəənəy warda ku kafkam da Eziptə daŋ keɗe bə mo?

¹⁷ Pepeŋ bə laataŋ hor-hor waaɗe də wáŋ haa sar kaa məntəŋa mo? Paapa sar kaa té gə minti jəŋ baymeleŋ, minti titi di basətaŋ giidə ful daŋ bə mo?

¹⁸ Pepeŋ kəlaŋ ku wəra minti yə ɗe a ve a ko pisi bə minti tó sə a ɗe a əyəy faakeŋ ada naŋ pəda, haa cəərə kaa məntəŋa mo? Paapa cəərə kaa té gə minti a humuŋ kosoŋ cuuru baŋ bə mo?

¹⁹ Bədoona ana, áŋ wəra gə asə-ase minti yə nəkaŋ bə ɗe a ve a ko bə minti Pepeŋ sə a əyəy faakeŋ ada naŋ ba, gud bə minti yə doŋ haa bə de guudu ba.