HEBEREŊ 2 - JAA TƏMARWAŊ

Áŋ a boome də seere bə minti Kormə Pepeŋ əyuŋ ba

¹ Gud teŋa ta, áŋ doo kel gə minti áŋ a iskiniy la pisi kaŋkaŋ, kir minti áŋ a ɗe a ɓaare warna ba.

² Wəra də dər áŋ minti, ku mini bə minti *kaa kə digi kə Pepeŋ əytunu wəra cəərə ku giliŋaŋ, a də səɓaki anə kaŋkaŋ. Hulum muntu muntu mo bə minti a cakɗaŋ ne wəra ku, kumundu ba a humuŋ kosoŋ cuuru baŋ, fəlaŋ daŋgay də aŋar də kel gə minti wə a jiiniy.

³ Kəya áŋ boomoŋ ne də seere tó bobloŋ gila keɗeŋ, áŋ bə deŋe wəra ku ji bə daŋgaya naanaanə deŋə mo? Gud maa mo, Barkaŋ də kusru waataŋ sam seere toŋ wəra kəm ajew haa tó. Adoro kaa gə minti a əskəŋ ku daŋ waataŋ áŋ wəra cuuru anə kaŋkaŋ minti wə gəəzi.

⁴ Pepeŋ də kusru jəŋ bərdə kəkəy wəra cuuru gəm a kəkəy bə minti wə jəətəŋ kar gə ke dər kaŋ cəərə gəəziŋaŋ, kar kə ŋili kaŋ, kar gə məɗ-miɗiŋ, daana bə minti wə ayaŋ gidiirə hel də minti bi kasi Tiiru Cetcetaŋ daŋ a mindi mindi mo damdi giidu bele ana'iŋ.

Hulum bə minti ɗe a mele kaŋ a seereŋaŋ

⁵ Gud maa mo, Pepeŋ ayaŋ ame bə ko bə ajew bə minti áŋ bə wəətu səmu haa kənaŋ paapa kasi *kaa kə digi nuutuŋa ba.

⁶ Ana ɗaw ha'aŋ, ko kəman yaŋ wəra giidə Kefter kə Pepeŋa bə waatə-waate minti: «Ana hulum kisirkiŋ haa maa gəm mo bə minti tam ɗəkəŋ cuuruŋ? Ana kormə kaa kəsarkaŋ haa maa gəm mo bə minti tam jəw guuduŋ?

⁷ Dər ko anə cepa, tam kulnu konce minti kaa kə digi nəmtiŋ dəŋu la. Adoro, tam əynu bobloŋ daana aŋke kə kəkamnaŋ,

⁸ tam usnu abay cəərə kara keɗe gəmə.» Pepeŋ usnu abay cəərə kara keɗe, haa minti karman yaakaŋ wəra anə məna minti wə paapa abay cuuru baŋ, paapa. Səma bə hebkənaŋ, wə də abay cəərə kara keɗe naanaanə moŋ, áŋ paapa gə asə-ase kəm ba.

⁹ Kel gə minti áŋ asaŋ teŋ wəraŋ haa kənaŋ: dər ko anə cepa, Pepeŋ koloŋ Yeesu konce minti *kaa kə digi nuutuŋ dəŋu la kir minti, gud pisi bə minti Pepeŋ jəw sar kaŋaŋ, wə mee la wəra guudi keɗe. Aŋ gə asə-ase hebkəna minti Pepeŋ əynu bobloŋ daana aŋke kə kəkamnaŋ ha'aŋ, gud bə minti wə saŋ lasiŋ daana wə meŋ wəraŋ.

¹⁰ Pepeŋ jəŋ kar keɗe haa tó, yə lam haa kir kəəsu gəm. Bədoona ana ta, haa a kuɗiŋa minti Pepeŋ koloŋ Yeesu wəra bə nakə-neke də lasi də minti wə saanaŋ, kir minti kaa ablaw kolə la wəra karmə tó daana yə ɗee la a ve a məyan kə tó naŋ. Gud maa mo, Yeesu haa hulum bə minti ɗe a mələy a seereŋaŋ.

¹¹ Yeesu, hulum bə minti kole kaŋ wəra *cetceti ku baymele neeteŋa daana kaa gə minti wə kulnuy wəra cetcetiŋ, yə keɗe duuru haa karmə hulum bə məna. Gud teŋa ta, Yeesu ji kese bə məntəy minti yə kəsaanə toŋ ba.

¹² Gud maa mo wə waataŋ Pepeŋ minti: «Ten bə waatam səmam wəra a kəsaanan; aduubə də kaa nəmti gə lawə-lewe ciiriŋaŋ, ten tokɗom yaŋ ada.»

¹³ Wə waataŋ pa: «Katən ha'aŋ, ten bə malə-mele ɗiki dən cəərə Pepeŋa.» Daana pa minti: «Golə laŋ, ten haa kəna də kaa gə minti Pepeŋ aynan diŋ, yə haa karməyan».

¹⁴ Bədoona ana, kərmuyu té gə minti wə wəətənəy simiy kənaŋ, yə haa kaa kəsarkaŋ də kusuki di daana kor di siri gadi faɗi. Tó də kusru wə koloŋ bə té ana gəm, kir minti tó ɓalkə səɓaki kə Nərtitiŋ la wəra də me kə toŋ, gud bə minti kaŋ fele meŋ gud kel də.

¹⁵ Wə jəŋ bədoona haa bə bidi kaa gə minti dər walka də meŋa wəra. Kaa teŋ a dər laate neeteŋ da anə hãã gə kolə-kole kafkam kas walka taŋ.

¹⁶ Bədoona ta, kel wəra anə pəɗaki minti, wə bəŋ paapa a keye kaa kə digi kə Pepeŋ ba, wə bəŋ a keye haa kaasaw də *Abraham.

¹⁷ Gud teŋa ta, wə kir ji wəra damdi kəsəənu ana cəərə kara keɗe kir minti wə kolə la *kumna boblo bə keere neete bə minti ji giidu pəsaŋ sar kaŋaŋ daana ji joŋreŋ a Pepeŋ wəra a kuɗuŋaŋ. Wə jəŋ bədoona haa kir minti Pepeŋ pəə baymele kə kaŋ la wəra.

¹⁸ Bə hebkənaŋ, wə bə nakə-neke bə keye kaa gə minti Nərtitiŋ bə kay kuyaŋ gud bə minti tó də kusru wə ləsaŋ ku ke ku kə Nərtitiŋa gəm.