HEBEREŊ 13 - JAA TƏMARWAŊ

Kel gə minti de dər Pepeŋ

¹ Aŋ raawə la bə ji beleŋa aduubə də kumsəŋa damdi kəsaanə kumsiŋ kir jəw ana.

² Cəərəŋ a ge tope bə kə irkuŋa ba. Gud maa mo, a kəkəy bə tope ke irkuŋaŋ, sərdə kaa kəman topoŋ kə irku də *kaa kə digi kə Pepeŋ bay ase ceki.

³ Cəərəŋ jəə la ɗəki a kaa kə daŋgaya damdi aŋ diiri a daŋgay na keɗe ana. Cəərəŋ jəə la ɗəki a kaa gə minti yə bə ləsəyaŋ gəm, gud bə minti aŋ də kusuki bə minti neke bə leseŋ sarəŋa gəm.

⁴ Aŋ humi kosoŋ la cəərə kel gə minti Pepeŋ wəətənəy cəərə kuli bə veŋa, daana hulum koŋkor mo, həlgə mo, a kele wəra taakawa ba. Gud maa mo Pepeŋ bə ɗe a jeme kəəti də kaa kə karway, də kaa kə ji piwpiw gəm.

⁵ Aŋ a yaake soloy bə kole cəərəŋa kumna ba. Aŋ doo haa la də karman bə minti kaasəŋa hebkənaŋ, gud bə minti Pepeŋ də kusru waataŋ wəra minti: «Ten yaakam wəra ba, ten bəyam warna bə gəm.»

⁶ Gud teŋa ta, áŋ gə nakə-neke bə waate wəra bay ɗiki də áŋ hoye minti: «Barkaŋ haa hulum bə jəman tulul dən, walka də karman jən pəda. Kaa kəsarkaŋ neke bə ji maa sarəna mo?»

⁷ Cəərəŋ harə la bə ɗəkti cəərə kaa kə tiiniŋ gə ajew gə minti a waatənaŋ kel kə Pepeŋ wəraŋ. Aŋ golə la cəərə ɗe neeteŋ, minti wə ɗeŋ a awe cuuru naanaanə mo, daana aŋ doo la gud Pepeŋa damdi yə a doŋ ana gəm.

⁸ Yeesu Kristu kole ba. Wə dayna haa damdi bə deegŋ ana, bə ji bə faɗnə-faɗna ajew na haa tó bə məna.

⁹ Aŋ a yaake kusrəŋ wəra bə laŋte də gidiirə hate kəman bə minti bə tultəŋa kimirwiŋ ba. Gud maa mo karman pisiŋ haa minti áŋ falə səɓaki náŋ la ku tarmə áŋa haa də pisi bə minti Pepeŋ jəw sar kaŋaŋ, paapa də ku gili bə camə-ceme bə cəərə kar kə hameŋ ba. Ku gili bə cəərə kar kə hameŋ toŋ, wə kəyaŋ kaa gə minti ɗeŋ duuruŋ hõy ba.

¹⁰ Ko bə *keere náŋ yaŋ, səma *kaa kə keere gə giidə kuli bə minti kaanə Ziwifiŋ ke awalna a Pepeŋ adaŋ, neke bə hame kar gə ayə-aye gə minti cuuruŋ ba.

¹¹ *Kumna boblo bə keereŋ he kor də begeŋ, wə kele duuru giidə *ko cetcetiŋa bə ɗe a əyu a Pepeŋ wəra cəərə baymeleŋa. Səma yə ɗe a ki kusuki bə keere toŋ bə cəərə baymeleŋ warna taakaw na kerkə ko, a ko bə minti kaŋ paapa gə əsə-isi ada na baŋ.

¹² Yeesu də kusru meŋ warna taakaw na kerkə vil na haa sə teŋ, kir minti wə pi baymele kə kaŋ la wəra də kor du.

¹³ Bədoona ana ta, áŋ vaa da warda bə ɗe warna sar Yeesu na taakaw na, daana áŋ doo haa la minti kaŋ hagə la də áŋ baahãy damdi yə hagaŋ duuru baahãy ana gəm.

¹⁴ Gud maa mo, vil náŋ də minti áŋ ɗe a isi ada na bə faɗnə-faɗna paapa adawra kəna ba. Vil náŋ kəm tiinə áŋ na ajew na, aŋ haa bə golda saksaki gəm.

¹⁵ Bədoona ana, gud Yeesuŋ, áŋ tokɗə Pepeŋ la saksaki. Haa keere bə minti áŋ əyu duŋ a kəkəy bə minti áŋ bə wəətu səmu wəra də ku áŋ minti wə Barkaŋ náŋ.

¹⁶ Aŋ jəə la wəra anə kaŋkaŋ bə ji pisiŋa daana bə keye kumsəŋa aduubə də kumsəŋa. Haa kəya gom də keere bə minti bə doo-de dər Pepeŋ faɗi.

¹⁷ Aŋ doo ku kaa kə tiinəŋ la, aŋ humə kosoŋ la ciiri, gud maa mo, yə bə amaŋa saksaki haa té. Yə wəra gə asə-ase minti té bə ɗe a tope bəlam də joŋre kə teŋ wəra hõy a Pepeŋ gəm. Aŋ jəə la bədoona kir minti yə doo ku joŋre neeteŋ la wəra də waale, paapa də nuumi ba, gud bə minti kel teŋ kəyaŋ a ko kəmana bə gəm.

¹⁸ Aŋ toostə la cəərə are. Are wəra gə asə-ase kaŋkaŋ cəərə are minti ɗiki də are bay kel daana are gə balə-bele minti, dər ko muntu muntu mo, ɗe də are jəə la wəra pisi.

¹⁹ Ten bə mante kaasəŋa ablaw daŋgeŋ haa minti aŋ toosə Pepeŋ la minti wə ayan kəkəy la bə hare səraŋ na pisi cəlammaŋ.

Kel gə tewe cəərə kefter

²⁰ Pepeŋ bə kəkaɓiŋ haraŋ Barkaŋ náŋ Yeesu wəra dədərgə adordə meŋa. Wə kulnu hulum boblo bə ameŋ bə gole cəərə áŋ, daana wə doŋ *jaa təmarwa də faɗnə-faɗna də kaŋ haa gud kor du.

²¹ Pep toŋ koloŋ la gə nakə-neke bə ji gidiirə pisiŋ wəra keɗe, kir minti aŋ jəə la haa karman bə minti giidu bəluŋ. Də Yeesu Kristu, wə jəə joŋre nuutu la cəərə áŋa bə kole áŋ wəra bə ji karman bə minti daw duruŋ. Aŋkeŋ jəə la kə Yeesu Kristu bə faɗnə-faɗna! *Amen.

²² Kəsaananti, kel kə teŋe dər teŋ gə minti ten a jeereneŋ dəŋ daŋ keɗe, aŋ doy la də talma də miŋ, ten raawənaŋ jeereŋ na anə raawa-raawa ba haa sə teŋ ɗaw.

²³ Aŋ asə la gəm minti seenə áŋ Timoteŋ hebkəna paapa a daŋgaya pəda, wə wəra bə gaa-ge. Wə tulnun ne ga'iŋ, are ɗe yaŋ na a goloŋ.

²⁴ Aŋ mirkə kaa kə tiiniŋ la, də kaa kə Pepeŋ keɗe. Kəsaanə áŋ gə doo-de gə minti bəŋ Italiŋ daŋ bə mirkiŋ na gəm.

²⁵ Pisi kə Pepeŋ jəə la dəərəŋ keɗe! Amen.