HEBEREŊ 12 - JAA TƏMARWAŊ

Áŋ malə dər áŋ la cəərə Yeesu

¹ Bədoona ana, kaa teŋ gila keɗe gə minti jəŋ bərdə kəkəy cəərə de neeteŋa, yə wəra bə ɓəkə-ɓiki cəərə áŋ cẽẽ tə pə moŋ, áŋ raytə kar kə eele gə sar áŋ la wəra keɗe, bə fi taraŋ də minti áŋ kir fəərəŋ tat-tatiŋ bay dere hor. Kar kə eeleŋ daŋgeŋ haa baymele bə minti larkete sar áŋa bay gəəli anə faɗ-faɗi.

² Áŋ malə dər áŋ la cəərə Yeesu, wə haa hulum bə minti məlaŋ gud deŋ giidə áŋaŋ daana wə bə ɗe a daw ku wəra a áŋ gəm. Wə asaŋ waale bə minti Pepeŋ bə ɗokə-ɗoke duuru na a nuunu tə bə moŋ, wə yaakaŋ kusru wəra bə me a kəbaŋ gə largaŋa, cuuru jəŋ a kel kə kes-kese gə gud me toŋa ba. Wə hebkəna bə əsə-isi agal kemer də jaaŋa də kumna kə Pepeŋa.

³ Aŋ ɗəkə la haa cəərə hulum tó bə minti, də kel kə bayməlaŋ gə minti kaŋ juunu diiriŋ gila keɗeŋ, wə teŋeŋ duru, kir minti aŋ a yaake kusrəŋ bə dere hora hãã bə minti gəraŋ dəŋ lawɗə la wəra ba.

⁴ Gud maa mo aŋ kuuruŋ kəm də baymeleŋ hãã bə minti kor dəŋ koloŋ bə ke wəra kəm bə ɗaw.

⁵ Cəərəŋ kaŋ kel gə teŋe dər kə Pepeŋ gə minti wə waatənaŋ dəŋ bə kərmuyuŋ ana wəra mo? Wə minti: «Kormonti, daŋgay də minti Barkaŋ jəənəm dəm neŋ, a haara karman ga'i ba. Wə jamnam neŋa təbay, a dere hor bə gəm.

⁶ Gud maa mo Barkaŋ ji haa daŋgay də hulum bə minti wə bəluŋ, wə witi haa kaa gə minti wə bə asə-ase diiri minti yə karmə toŋ.»

⁷ Gəəli toŋ, aŋ saw la, wə haa karman bə minti ɗekreŋ. Kel teŋ ge dər haa minti Pepeŋ jəŋ haa damdi aŋ kərmuyu ana. Beebe kəman yaŋ mo minti buru gilu baŋ?

⁸ Pepeŋ gili kərmuyuŋ keɗe'i. Jəəne minti wə paapa bə giliŋa baŋ, ge dər haa minti aŋ paapa kərmuyu gə gəəzə-gəəzi ba.

⁹ Aŋ golə la kəm, kamnə áŋ gə minti sar áŋa adawra kənaŋ giliŋ áŋ, kəya áŋ humuŋ kosoŋ ciiri. Jəəne bədoona anaŋ, áŋ kir humi kosoŋ kampa aniinə mo cəərə Bar áŋ a tiiruŋa minti áŋ falə dədərgə la kəəsuŋ?

¹⁰ Kamnə áŋ teŋ giliŋ áŋ dər ko bə koncoŋ də áŋ da haa cəərə ɗiki neete bə minti duuniy diriŋ. Səma Pepeŋ gili áŋ ha'aŋ, bə ji pisi a áŋ kir minti áŋ kolə la wəra cetceti damdi tó ana gəm.

¹¹ Gəəzi ha'aŋ, bə minti yə bə gilima hebkəna anəkay faɗiŋ, gole dərəma paapa karman bə waale ba, gole dərəma karman bə laawe. Səma, tam raawaŋ ko bə ji daŋgay toŋ ta'iŋ ne wəra, karman bə minti tam fəlu guuduŋ, haa minti ɗe dəm kole wəra ɗeker, kəya tam dər kəkaɓiŋa gəm.

¹² Bədoona ana ta, aŋ coŋə kaasaŋ gə gayə-geyeŋ la, daana gəgəərəŋ gə ŋalwə-ŋalweŋ.

¹³ Aŋ haa la haa kəkəy ɗekeriŋ kir minti kampa gə dəlay a ze guudi ada pisi ze ba, yə seerə la wəra haa seere ɗaw.

Ɗe də kaa kə doo-deŋ jəə la cetceti

¹⁴ Aŋ jəə la wəra anə keɗe-keɗe kir minti aduubə dəŋ jəə la kəkaɓi də kaŋ keɗe, daana bə aye kusrəŋa pisi aye a Pepeŋ bə kole wəra *cetceti. Gud maa mo, hulum koloŋ cetceti baŋ, wə neke bə ase Barkaŋ də duru ba.

¹⁵ Aŋ amə kusrəŋ la pisi kir minti hulum guudəŋa anə məna a kole kirku a pisi kə Pepeŋ ba. Wə a kole damdi kəbaŋ gəlag-gəlagi ana ba, gə minti ɓalke aduubə də kaŋ wəra daana gə minti bə jogte kaa ablaw gəm.

¹⁶ Hulum a ji anə məna guudəŋa də karway ba, daana bə bay humi kosoŋ cəərə kar kə Pepeŋa damdi Ezo jəŋ ana bə gəm. Gud maa mo, cəərə hame bə kampa məna'i faɗi, wə gusuŋ boblo nuutuŋ wəra a siinu bə cuuruŋ duuru.

¹⁷ Aŋ gə asə-ase karman bə minti ɗeŋ a jəw ajew na. Bə minti wə a bəlaŋ minti bar tó gaa pisi la cəərə tó tə bə moŋ, buru bəlaŋ pəda. Wə nəkaŋ bə kole kel gaalaŋ pəda, koo bə minti wə hagaŋ nuutu anə keɗe-keɗe də kan kə duruŋ.

¹⁸ Aŋ dəyaŋ maŋ haa paapa sar karman bə minti hulum neke bə ɗuutu də kəəsu damdi pərki bə Sinay bə minti kaanə *Israyel a dəyaŋ warna suru naŋ ana ba. Cəərə pərki toŋa, yə asaŋ cəwa də do'ə-do'e hərhəraŋ, ko bə darə-dere jirvinniŋ, ko bə tilmə ɗilik-likiŋ, daana kaŋkaw kəmtəŋ.

¹⁹ Yə əskəŋ hage bə atoltom daana dordə karman bə waate kela anə koloŋ-koloŋ. Kəya yə dəraŋ kuy bə mante faɗi minti karman toŋ a waate kel da a té pəda.

²⁰ Gud maa mo yə nəkaŋ bə hale kel gə minti wə wəətənəy di daŋ ba, minti: «Hulum bə minti ɗootoŋ pərki toŋ ne, koo jəəne nuutuŋa bege ɗaw, kaŋ əwu la wəra də pərki.»

²¹ Kel teŋ kəya jiiniy walka wəra hasi hãã bə minti *Moyisi də kusru koloŋ bə waate minti: «Walka bə jəna wəra hasi, ten bə miiri!»

²² Aŋ ana ha'aŋ, aŋ dəyaŋ maŋ haa sar pərki bə Siyoŋa, vil kə Pep bə dədərgəŋ, haa Zeruzalem də apəy, də *kaa kə digi naata guɓ-guɓi aniinə moŋ a kəɗwəya.

²³ Aŋ dəyaŋ maŋ sar Tapi kə karmə Pep gə minti beskeŋ, gə minti səməy gə jeerə-jeere apəy naŋ. Aŋ dəyaŋ maŋ sar Pepeŋa, hulum bə minti jeme kəəti də kaŋ keɗeŋ, daana sar tiirə kaa gə minti wə a kulnuy wəra ɗeker duru daana gə minti wə a kulnuy wəra gə nakə-neke duru.

²⁴ Aŋ dəyaŋ maŋ haa sar Yeesu, hulum bə minti bə əsə-isi aduubə də kaŋa də Pepeŋ cəərə de bə *jaa təmarwaŋaŋ, daana sar kor du bə minti a jeteŋ wəra bə poore kaŋ. Kor du toŋ dayna bə waate kela a áŋ dəŋaŋ kə Abel.

²⁵ Aŋ amə kusrəŋ la, aŋ jeɓrə ku hulum bə minti bə waataŋ kelaŋ la pis-pisi! Kaanə Israyel gə minti a bəlaŋ əski ku hulum bə minti a bə wəətəy kela kəna adawra baŋ, dəŋaŋ wəra ku ji bə daŋgaya ba. Jəəne bədoona ana tə kəm, áŋ bə deŋe wəra naanaanə deŋe mo, jəəne minti áŋ koloŋ kerkə áŋ ne a hulum bə minti bə waate kel da a áŋ apəy daŋ?

²⁶ Hulum tó bə minti durdu a miiriŋ seŋkaŋ warda hõy, wə bə waate kel teŋa lama pa minti: «Ten bə miiri seŋkaŋ yaŋ ada kampa məna pa, səma paapa tá təwa pəda, ko bə apəyaŋ gəm.»

²⁷ Kel té gə minti wə wəətənəy minti: «ada kampa məna paŋ», ge dər áŋ wəra minti, kar gə minti a gə jəə-ji wəra lam dayday keɗe miiri yaŋ daana yə bə ji yaŋ pa pəda kir minti, kaayaŋ gə minti neke bə miiri baŋ, yaakə la lam haa teŋ.

²⁸ *Kumna bə minti áŋ ɗe a fəlu kas Pepeŋaŋ, wə neke bə miiri ba. Bədoona ana ta, áŋ jəə suuse la a Pepeŋ, bə jəw joŋre də kəkəy bə minti daw duruŋ, bə humi kosoŋa cuuru, daana bə jəw walka du ada gəm.

²⁹ Gud maa mo, Pep náŋ haa damdi cəwa də minti neke bə ki hulum wəraŋ ana faɗi.