HEBEREŊ 11 - JAA TƏMARWAŊ

Kaa gə dayday gə minti gə doo-de gud Pepeŋaŋ

¹ De bə gud Pepeŋ haa hel də minti áŋ ase wəra cəərə áŋa kaŋkaŋ minti, karman bə minti áŋ gə malə-mele ɗiki də áŋ cuuruŋ ɗe a ji wəra gəəzi, daana karman bə minti áŋ əsu də dər áŋ baŋ, wə yaŋ nuutu gəəzə-gəəzi.

² Pepeŋ jəŋ bərdə kəkəy wəra cəərə kaa kə daydaya minti yə kaa pəsaŋ haa gud de neeteŋa.

³ Gud deŋaŋ, áŋ wəra gə asə-ase minti Pepeŋ jəŋ ko bə apəyaŋ də ko bə adawraŋ keɗe haa də kel kə kuŋ faɗi. Karman toŋ ge dər haa minti Pepeŋ jəŋ joŋreŋ haa də karman bə minti dər áŋ əsu baŋ bə ji kar gə minti áŋ bə əsəyaŋ.

⁴ Gud deŋa, Abel jəŋ keere pisi a Pepeŋ dəŋaŋ kə Kayen. Haa guudu pa minti Pepeŋ kulnu hulum ɗekeri daana wə doŋ haa də kar gə minti wə a kiirunu diiriŋ. Haa gud de toŋa pa minti, wə nuutu bə mee-meŋ, karman bə minti wə a juunuŋ kəm hebkəna bə waate kela a áŋ.

⁵ Gud de kə Enokiŋaŋ, Pepeŋ həənu warna suru na dədərgə, wə asaŋ meŋ ba. Kəya hulum haraŋ bə əsu hõy pəda gud bə minti wə həənu warnaŋ. Kefter kə Pepeŋ wəra bə waatə-waate cuuru gəm minti, ajew də minti wə həənuŋ, wə a duunu duru faɗi.

⁶ Ana ha'aŋ, bay deŋ hulum paapa bə nakə-neke bə de dər Pepeŋ ba. Gud maa mo, hulum bə minti bele ze suruŋ, jəə la wəra bə doo-de haa minti wə yaŋ, daana minti wə ji pisiŋ sar kaa gə minti bə gulduŋ.

⁷ Gud deŋa, Nowe jəŋ joŋreŋ də kel gə minti Pepeŋ a wəətunu du cəərə karman bə minti ɗe a ji yaŋ hõy na, səma wə kəm bay əsu də duru. Kəya wə ɗampaŋ turti mooto, yə luŋ giidə də gə girduŋ, yə seereŋ wəra ku meŋa faɗi. Bədoona ana, ɗe du gaŋ dər wəra minti ɗe də kaa kaayaŋ baymele daana wə goloŋ dər Pepeŋa hulum ɗekeri haa gud de nuutuŋa.

⁸ Gud deŋa ha'aŋ, bə minti Pepeŋ mantaŋ *Abraham minti wə ɗee la giidə seŋka kəman də minti tó ɗe a əyu du yaŋ hõy, wə humuŋ kosoŋ cuuru faɗi. Kəya wə kooroŋ bay ase ko bə minti wə ɗe ada naŋ ceki.

⁹ Haa gud deŋa, wə jəŋ giidə seŋka tá də minti Pepeŋ a waatəna sama wəra a nuunuŋ, səma kəm damdi hulum bə aŋay ana. Wə həətəŋ haa giidə muryuki, damdi anə *Izaki daana *Zakopi həətəŋ giidəŋ ana, yə haa kaa gə minti Pepeŋ a wəətənəy sam seŋka taŋ wəra gəm.

¹⁰ Abraham jəŋ bədoona gud bə minti wə bə mi bə kele giidə vil də minti Pepeŋ ɗəknə daana hərsənə haa tó daana də minti guudə daɓye hõy ba.

¹¹ Gud deŋaŋ, Sara nəkaŋ bə kole nər də beebe də ko bə minti a nuutu wəra təərəŋka kə ablaw daana də gedə-gedeŋ gəm. Kel teŋ jəŋ sara bədoona gud bə minti a wəra də doo-de haa minti, hulum bə minti waataŋ sam karman toŋ wəraŋ, wə yəəku bay de ku wəra ba.

¹² Haa gud teŋa, kaa gə minti ablaw diŋ damdi seska də apəyaŋ anaŋ, daana gə minti hulum neke bə əŋkəy ba kas ablaw damdi ajããya də kəsnə vor boblo anaŋ, yə bəŋ haa gud hulum bə məna tó bə minti a wəra nuutu bə tawə-tewe pəərəŋkiŋ ɗaw.

¹³ Kaa teŋ gil daŋ keɗe doŋ gud Pepeŋa hãã a me di. Yə meŋ bay fele kar gə minti Pepeŋ a wəətənəy simiŋ, səma yə əsnəy ciiri wəra bə heere, daana yə waalaŋ wəra guudi faɗi. Yə a wəra bə waatete gəm minti té haa cəərə seŋkaŋa kənaŋ kaa kə aŋay daana kaa gə cə kampa faɗi.

¹⁴ Kaa té gə minti bə waate kel teŋa kəyaŋ, ge dər wəra faɗi minti yə bə golde seŋka də minti taŋ bə ji yaŋ neeteŋ.

¹⁵ Yə a raawə la də ɗiki də seŋka də minti yə a vaŋ warda da adaŋ giidi bəy, karman bə hay kuy minti yə a hare ada na paŋ, a paapa.

¹⁶ A gəəzi diŋa ha'aŋ, yə a bə golde haa seŋka də minti də daŋə-deŋe kumsəŋ, nayta də minti apəy naŋ. Gud teŋa ta, kese paapa dər Pepeŋa ba minti yə bə məntu Pep neeteŋ. Aŋ asaŋ ne, wə ɗəmpənəy vil a niini haa tó gəm.

¹⁷ ,

¹⁸ Gud deŋa, Abraham ayaŋ kurmuyu Izakiŋ bə ji keere wəra duuru a Pepeŋ a kəkəy bə minti wə gulnu kuɗuŋ. Pepeŋ a waataŋ sam karman wəra haa a Abraham minti: «Bə gam kaasaw dəm haa Izaki.» Də teŋ keɗe, wə a wəra maŋ bə əyu kurmuyu məna'i.

¹⁹ A wəra cəərə Abrahama kaŋkaŋ minti Pepeŋ bə nakə-neke bə hare hulum bə mee-meŋ wəra dədərgə. Gəəzi ha'aŋ, Pepeŋ bə hərnu kurmuyuŋ a nuunu. Kel teŋ ge dər haa cəərə karman bə minti bə ji yaŋ ajew naŋ.

²⁰ Gud deŋa, Izaki gaŋ pisi cəərə Zakopi daana Ezo cəərə ko bə minti tiiniy na ajew naŋ.

²¹ Gud deŋa, anə weseka ajew də me duŋ, Zakopi gaŋ pisiŋ wəra cəərə karmə Zosefiŋa məna-məna keɗe. Kəya wə kaŋ awalna a Pepeŋ kəəsu ku guɗmur nuutuŋa ta'i.

²² Gud deŋa, Zosefi waataŋ sam ve də kaanə *Israyel warda Eziptə da ajew-ajew faɗi. Wə waataŋ kel teŋ haa də ko bə minti wə wəra maŋ ku meŋa, daana minti yə jəə la naanaanə də kəskəŋ də tó moŋ.

²³ Gud deŋa, kamnə *Moyisiŋ ŋuynu wəra adordə we du hãã kitir soope. Yə əsnu kəya minti wə beebe pisi ŋaanaanə moŋ, walka də kel gə minti kumna a kəlnəy wəraŋ jiiniy pəda.

²⁴ Gud deŋa, bə minti Moyisi koloŋ wəra puranul, wə yaakaŋ kusru bə mante minti kormə tərnə Farawoŋ pəda.

²⁵ Ana ɗaw ha'aŋ, wə ŋəmaŋ nuutuŋ haa bə ɓarse gəəli də kaa kə Pepeŋ bə minti wə a sə a ji waale sawəwa tó bə dər baymeleŋ.

²⁶ Sarte bə minti kaŋ bə sərtu duuru goloŋ duru karman bə daŋə-deŋe bege bə giidə seŋka də Eziptəŋ keɗe, gud bə minti wə haŋ sar sarte bə minti Kristu, Hulum bə minti Pepeŋ ŋəmnuŋ, bə ɗe a fəlu yaŋ hõy gəm. Gud maa mo, duru a də malə-mele cəərə werke bə minti Pepeŋ bə ɗe a əyu na ajew naŋ.

²⁷ Gud deŋa, wə yaakaŋ seŋka də Eziptəŋ wəra, koo wáŋ kə kumnaŋ juunu walka ba. Wə əsəŋ wəra kəŋkəŋ, damdi wə bə ase Pep bə minti hulum əsu də duru baŋ, wəra də duru ana.

²⁸ Gud deŋa, wə məlaŋ gud *kəɗwəy gə Pakiŋ, wə waataŋ kaanə Israyel minti yə jetə kor la ku kuli neeteŋa minti hulum bə digi kə Pep bə minti meŋ kəəsu, a awe kərməyi kaŋkar kəmtəŋ wəra ba.

²⁹ Gud deŋa, kaanə Israyel cakɗaŋ kan kəmtəŋ gə minti yə məntəy «kan kəələŋ» warna ha'aŋ, kan ɗokloŋ wəra tiini, yə vaŋ warna máŋ haa cəərə ko keeŋeŋ na faɗi. Səma bə minti kaanə Eziptəŋ gosoŋ bə ji bədoona gəm taŋ, kan haraŋ wəra ciiri werle faɗi.

³⁰ Gud deŋa, kaanə Israyel ɓəktəŋ cəərə goŋ bə hərsə-hərsi kəmtəŋ bə ɓəkə-ɓiki cəərə vil də Zeriko dər hiti seeɗa, kəya wə fəkaŋ nuutu warna anə hursul-hursul faɗi.

³¹ Gud deŋa, Rahabi, həlgə də booboŋ, doŋ kə irku də kaanə Israyel də kəkaɓiŋ, yə a bəŋ haa a gole koŋ warna. Gud teŋa ta, a meŋ wəra aduubə də kaa gə minti a bəyaŋ ku Pepeŋ warnaŋ ba.

³² Ten raawə la bə waate kəna cəərə anə mindi pa ɗawŋa? Ko paapa jəəne minti ten waatə sam anə Zedeyoŋ, Baraki, Samsoŋ, Jefte, *Davidi, Samiyel daana *kaa kə jogte ku mini kə Pepeŋ laŋ.

³³ Gud deŋa, yə təkaŋ seŋka, yə hamtaŋ kəkamna neeteŋ haa bə ji ɗekera, yə faltaŋ kar gə minti Pepeŋ a wəətənəy səməy wəra a niiniŋ. Yə ɓəktəŋ ku googoŋ wəra,

³⁴ yə noktoŋ anə cəwa hərhəraŋ, daana yə seerteŋ wəra ku macəlama. Yə a wəra gə gayə-geye, yə haraŋ bə falte səɓaki, yə jəətəŋ kaa kə samsam a duuriŋa daana yə taktaŋ kaa kə acukur neeteŋ a tara.

³⁵ Sərdə kəram haraŋ bə falte kaa neete gə meetə-meete gə minti hartaŋ wəra dədərgə adordə meŋaŋ. Sərdə kaa kaayaŋ fəlaŋ lasi minti yə kaa sam la. Yə kaataŋ sam ku kel teŋa minti yə foktə té la ba, gud bə minti yə bəlaŋ haa hare bə dədərgə bə minti dəŋaŋ kə kaa kaayaŋ gə minti bə ləsəyaŋ.

³⁶ Sərdə kaa pa haltaŋ hin bə minti yə əwtu ciiriŋ, ajewɗekiŋ, anə ənti bə gaalay a daŋgaya gəm.

³⁷ Yə awaŋ sirdiŋ wəra də pərki, yə ɗokloŋ dər sirdi wəra ɓas-ɓasi, yə awaŋ sirdi wəra də caafay gəm. Sirdiŋ haa lam bə ɗe faɗi, ko bə isi neete paapa, gə əntə-ənti golgo də kaamaŋ mo, kaaraŋ mo siri bə ana anəkay. Yə wəra gə kolə-kole caaca, yə fəlaŋ gidiirə leseŋ ablaw kasi kaŋa.

³⁸ Kaa teŋ ha'aŋ, seŋkaŋ a paapa də nakə-neke kir fələy ba anə gadi ɗaw! Yə jəŋ haa lam bə ɗe saksaki giidə fula, cəərə pərkiŋa, bə həəti giidə huluki duŋa daana giidə tələŋkəŋa.

³⁹ Kaa teŋ gila keɗeŋ, Pepeŋ jəŋ bərdə kəkəy wəra ciiri minti yə kaa pəsaŋ haa gud de neeteŋa. Də teŋ keɗe, karman bə minti Pepeŋ a wəətənəy səmu wəraŋ, yə fəlnu ba.

⁴⁰ Gud maa mo, Pepeŋ a haŋ ɗiki də karman pisi wəra a áŋ ajewa, kəya wə bəlaŋ minti yə kolə la wəra bədoona gə nakə-neke duru kaŋkaŋ bay áŋ ada ba.