HEBEREŊ 10 - JAA TƏMARWAŊ

Keere bə nakə-nekeŋ wə məna'i

¹ *Ku gili kə *Moyisiŋ haa tiirə kar gə minti bə ji yaŋ ajew naŋ, wə də kusru haa paapa kar teŋ derra faɗi ba. Kaa gə minti bə ke awalnaŋa a Pepeŋ də kəkəy nuutuŋ ha'aŋ, wə paapa bə nakə-neke bə kuluy wəra *cetceti ba. Gud maa mo yə bə dogte keere bə mənaŋ na anə hoŋ dər laateŋ na kəm paŋ.

² Wə a jəə la bə nakə-neke bə kole kaa gə minti bə ke awalnaŋa a Pepeŋ də kəkəy nuutu toŋ wəra cetceti warna kampa ɗaaməna faɗi, ɗiki bə baymele bə minti yə a juutunu sə a ji ciiri bəy pəda, daana yə a kəna yaakaŋ jəəti bə keere toŋ ne wəra gəm.

³ Ana ha'aŋ, keere tó bə minti yə juutu dər laateŋa saksaki hare bə ɗiktiy ciiri cəərə baymele bə minti yə a juutunuŋ pə ɗaw.

⁴ Gud maa mo, kor də kərkəw daana kəparkaw paapa bə nakə-neke bə he baymeleŋ wəra ba.

⁵ Gud teŋa ta, bə minti Kristu ɗəlaŋ bə koore da cəərə seŋkaŋ daŋ, wə waataŋ pa minti: «Tam bəlaŋ paapa keere ba, tam bəlaŋ paapa kar kə ayə-aye bə gəm. Səma tam jəənən də kusuki sarəna.

⁶ Keere bə minti yə ki bege duŋ wəra ki a nəənəm, daana keere bə cəərə baymeleŋ, doonom dərəm paapa teŋ ba.

⁷ Bədoona ta ten minti: ‹O Pepeŋ, ten haa kəna bə jəm karman bə minti giidim bəluŋ, damdi kefter nəmti bə hayɗə-hayɗeŋ bə waate wəra cəərəna bədoona ana'iŋ.›»

⁸ Kəya Kristu a waataŋ kəm anə faɗi haa minti:«Kar kə ayə-ayeŋ, keereŋ, keere bə minti yə ki bege du wəra kiŋ, keere bə cəərə baymeleŋ, yə doonom giidim ba, yə doonom dərəm bə gəm.» Ana ha'aŋ, keere toŋ nuutu bə ayə-aye haa damdi ku gili bə waatə-waate cuuruŋ ana.

⁹ Kel nuutu gə ɓasiŋ haa minti: «Ten haa kəna bə jəm karman bə minti giidim bəluŋ.» Kəya wə zeŋ kəkəy bə ajew bə minti yə a bə ke awalnaŋa duuru a Pepeŋ wəra, bə kole baalaŋ a kuɗu.

¹⁰ Haa gud giidə Pep gə balə-bele teŋa minti áŋ wəra gə kolə-kole cetceti ku baymeleŋa, gud bə minti Yeesu Kristu ayaŋ kusru wəra damdi keere ana kampa ɗaaməna faɗi.

¹¹ *Hulum bə keere Pepeŋ mundu mundu mo haa bədoona saksaki gil dər jeŋa bə de ku joŋre nuutuŋa wəra, daana bə dogte keere bə məna'i bə minti neke bə pi baymeleŋ wəra hõy ba anə cekiŋ.

¹² Ana kə Kristuŋ ha'aŋ, wə jəŋ keere nuutuŋ warna cəərə baymeleŋ na kampa ɗaaməna faɗi, daana wə bə nakə-neke bə faɗnə-faɗna gəm. Kəya wə ɗeŋ a isi warna je'i a kasi kemer kə Pepeŋ na.

¹³ A ko toŋ na ta, wə bə mi kəm haa minti Pepeŋ kolə kaa kə acukur kə toŋ la wəra kəm kar gə minti tó təytəy la wəra kuuri.

¹⁴ Bədoona ana ta, kaa gə minti wə kulnuy wəra cetceti ku baymeleŋa, wə kulnuy wəra gə nakə-neke duru bə faɗnə-faɗna gəm, haa də keere məna toŋ faɗi.

¹⁵ Haa kel gə minti Tiiru Cetcetaŋ bə waate áŋa wəra ciiriŋ gəm. A waataŋ kəm anə faɗi minti:

¹⁶ «Barkaŋ minti: ‹*Jaa də minti ten bə doora diiri dər hi bə ajew naŋ haa bə ha'aŋ ana: ten bə əyəy ku gili katən haa ku tərməyi, daana ten jiiriy di yaŋ haa dər ɗiki di faɗi gəm.›»

¹⁷ Kəya wə waataŋ ada pa minti: «Ten bə de baymeleŋ daana laŋte neeteŋ cəərəna kay bə gəm.»

¹⁸ Bədoona ana ta, Pepeŋ vəəgəŋ giidu cəərə baymele kə kaŋa wəra tə kəm, keere paapa kirka ji bə pəw wəra pəda.

Áŋ zee la máŋ sar Pepeŋa

¹⁹ Bədoona ana ta kəsaananti, kəkəy wəra cəərə áŋa anə var bə ve giidə *ko cetceti bə deŋe kumsuŋa gud kor də Yeesu bə minti ãyaŋ wəra a kəkəy bə minti wə keereŋ wəra də kusruŋ.

²⁰ Wə bəŋəŋ kəkəy kimirwi wəra daana bə dərgə-dərgə bə minti cakɗe warna dər dəməəməŋ na bə ɗe a ve áŋ a *ko cetcetiŋa. Wə jəŋ karman toŋ bədoona haa də ko bə minti wə ayaŋ kusru wəra bə keereŋ.

²¹ Kəya áŋ hebkəna də *kumna boblo bə keere bə əsə-isi cəərə *Kuli bə apəya kə Pepeŋ na.

²² Gud teŋa ta, áŋ zee la sar Pepeŋa də ku tarməyaŋ də gəəzə-gəəziŋ, bay girmi ku ada anə weseki gəm, də talma də minti wəra də kolə-kole *cetceti sar kel kə bayməlaŋ gə minti aye ɗiki bə baymeleŋ, kusrə áŋ jəə la wəra bə baadə-baade də kan pəsaŋ gəm.

²³ Áŋ əsə la ŋəŋ dər de náŋ bə gud Pep bə minti áŋ bə waate kaŋa wəra cuuru minti wə haa bə gəəzə-gəəzi. Gud maa mo, Pepeŋ ɓeti, wə de ku kar gə minti wə a wəətənəy simiy wəra a áŋ gəm.

²⁴ Dər áŋ jəə la cəərə kumsə áŋa ta'-ta'i bə teŋe dər kumsə áŋa bə ji beleŋa daana bə ji pisiŋa.

²⁵ Áŋ a yaake tapte náŋ damdi sərdə kaa kəman yaaktətaŋ neeteŋ ana ba. Ana ɗaw ha'aŋ, áŋ teŋə dər kumsə áŋ la aduubə də kumsə áŋa. Áŋ jəə la bədoona pisi jəə gud maa mo aŋ bə ase ha'aŋ, hi kə Barkaŋ bə zeede da sar áŋ da.

²⁶ Jəəne minti áŋ asaŋ gəəzi wəra, áŋ raawaŋ máŋ bə ji baymeleŋa də dər áŋ re'iŋ, áŋ asə la wəra minti keere baalaŋ bə cəərə baymele náŋ pa pəda.

²⁷ Hulum bə minti jəəne bə ɗe haa bədoona, karman bə minti yaakaŋ tiinu məna'iŋ haa bə minti duru bə fərti wəra anəkay-kay kas walkaŋ, bə mi kəəti kə Pepeŋa daana cəwa ŋilik-lika də minti bə saawte kaa gə acukur kə Pepeŋ yaŋ.

²⁸ Aŋ wəra gə asə-ase minti, hulum bə minti humuŋ kosoŋ cəərə *ku gili kə *Moyisiŋa baŋ, ji bə giidu pəsaŋ suru paapa, yə əwu wəra faɗi. Yə əwu haa bə minti kaa ɓasi mo, soope mo, waataŋ ne minti té əsnu bə ji karman toŋa gəəziŋ.

²⁹ Jəəne bədoona anaŋ, hulum bə minti hage də Kormə Pepeŋ baahãy, wə hage də kor bə minti Pepeŋ doŋ *jaa duuru də kaŋ daana bə minti kulnu wəra cetceti, karman bə boobo, wə sarte Tiiru Cetcetaŋ də minti aye pisi kə Pepeŋ a áŋ, a ɗiki nəətiŋa, daŋgay də minti wə ɗe a fəlaŋ, a gəəli dəŋaŋ kə naytoŋ kampa aniinə mo?

³⁰ Áŋ wəra gə asə-ase minti Pepeŋ waataŋ kel teŋ kəna haa tó minti: «Hulum bə ke abal haa ten, werke mindi mindi mo haa ten gəm.» Wə waataŋ pa minti: «Jeme kəəti də kaa kətan, haa ten Barkaŋ.»

³¹ Gəəli ablaw cəərə hulum bə minti kəəti kə Pep bə Dədərgəŋ duunuŋ neŋ!

³² Səma aŋ harə la bə ɗiki karman bə minti aŋ a məlaŋ guuduŋ ajew da duuru naanaanə moŋ. Də ko toŋ ateŋa bə minti pəɗaki kə Pepeŋ walnaŋ ku tarməyaŋ wəra anəkay təwaŋ, aŋ ləsaŋ bə duuri ablaw bay daɓye.

³³ Gud maa mo, bə jəŋ hõy anə jəə, yə sartənaŋ daana yə lasnaŋ wəra anə kəkər laki gəm. Bə jəŋ hõy anə jəə, aŋ wəra maŋ bə tepe də kaayaŋ gə minti yə bə ləsəya bədoona ana'iŋ gəm.

³⁴ Gəəzi, aŋ kəyaŋ kaŋ ku gəəli bə daŋgay neeteŋa. Bə minti yə vurmunuŋ kar nəətiŋ wəraŋ, aŋ doŋ haa də kel teŋ də waale gud bə minti, aŋ wəra gə asə-ase minti bege nəəti bə deŋe naytoŋ, bə minti toŋ tewe hõy baŋ, yaŋ wəra kaasəŋa ɗaw.

³⁵ Gud teŋa ta, aŋ a dere hor ba, gud bə minti aŋ fele werke bobloŋ kasi Pepeŋa haa gud karman toŋa.

³⁶ Aŋ kir ji kaa gə minti isi ŋəŋ ku kela bə de ku karman bə minti giidə Pepeŋ bəluŋ wəra. Bədoona ana ta, aŋ fele kar gə minti wə a waatənaŋ simiy wəraŋ gəm.

³⁷ Gud maa mo, wəra gə jeerə-jeere giidə kefter kə Pepeŋa minti: «Hitiŋ yaakaŋ paapa ablaw pəda, wə máŋ anə weseeka bagŋ, hulum bə minti a yaŋ kir biŋ, wə bə bi, wə paapa bə de cuuru da ba.

³⁸ Hulum bə minti dər ten Pepeŋa ɗeker, ji yaŋ caw gud de nuutu bə guudəna. Səma, jəəne minti wə haraŋ kusru ne wəra adoroŋ, wə bə don dərən pəda gəm.»

³⁹ Kə áŋ kaayaŋ teŋ, áŋ paapa kaa gə minti hare kusri wəra adoro bə ɗe a bese wəraŋ ba; áŋ haa kaa gə minti gə doo-de gud Pepeŋa bə ɗe a fele seereŋ ɗaw.